ЧОННАР ЫНАРХАЗЫ ТЫЫПЧА
17.05.2023
Хабарлар
Тывадағы чоннар аразындағы ынархас клубының устағҷызы
Светлана СЫРГАШЕВА паза араласчылары
Фестиваль. Н.Ф.Катановтың адынаң Хакас национальнай гимназияда «Очы пайрам-2023» чоныбыстың спорт ойыннарының фестивальы ирткен
Пайрамны Хакасияның ӱгредіг паза наука министерствозы Хакас национальнай гимназиянаң тӧстееннер. Пӱӱл ол республикада чарлалған Чииттер чылына чарыдылған. «Очы пайрам» 2007 чылдаң «Ынархас чоллары» фестивальнаң теестезіп иртірілче. Полған на сай аның таныхталчатхан оңдайлары чахсы саринзар алызып одырчалар. Іди пӱӱл фестиваль чоннар аразындағы синде ирткен. Тиксі фестивальда читі делегация араласхан: Монголияның Улангом городының 2 № паза 5 № школаларынаң, Тываның Сосновка аалынаң, Хакасияның Н.Н.Коковтың адынаң Тоғыр чул аалдағы, В.Г.Карповтың адынаң Пыдырахтағы, Аршаннар аалдағы школалардаң, Асхыстағы лицей-интернаттаң паза Хакас гимназиязынаң.
Гимназия директорының тоғызын толдырчатхан Лилия Ахпашева аалҷыларны удурлаан паза фестивальны асхан. Ідӧк араласчыларның алнында ӱгредіг паза наука министрінің пастағы орынҷызы Марина Сагатаева, Россияның пасха хан киректерінҷе Хызылчардағы представительствозының ікінҷі хачызы Денис Макин, Тывадағы чоннар аразындағы ынархас клубының устағҷызы Светлана Сыргашева паза Улангом городтың спортча специализі Даваадорж Лодон чоох тутханнар. Прайзы даа мындағ фестиваль иртірілчеткені чоннар аразындағы палғалыстарны тыыдар, олғаннарға наа арғыстар табар оңдай пирче тіп таныхтаан.
«Очы пайрамның» пастағы кӱнінде 11 – 17 частығ олғаннар тобит, хазых, хол пазызары, урух тастиры, ағас тартызары, охчаадаң атары паза кӱрес спорт кӧрімнерінде марығласханнар. Ікінҷі кӱнінде, тізең, делегациялар устағҷылары тегілек столға чыылысханнар. Мында олар ӱгренҷілерні чир-сууна, чонына хынысха ӱгредер сурығларны ӱзӱргеннер. Ідӧк аймах мастер-класстар иртірілгеннер, мооллар сиргекті сыныхтир чапсых ойыннарынаң таныстырғаннар. Пайрам тоозылчатханда, марығлар чиңісчілерінің аттары чарлалған.
Таныхтирға кирек, полған на марығ араласчызы позын чахсы кӧзіткен. Сыйыхтығ орын чох ибзер айланған школа чох таа полған полар.
Лилия Ахпашева аалҷыларны Хакасиязар килер оңдай тапхан ӱчӱн алғыстаан. «Пайрам марығларында утханы ӧӧні нимес. Пасха регионнардағы араласчылар чайаачы номерлер тимнеп килчелер, оларның кибірліг кип-азаан кӧріп аларға чарир. Чылдаң чылға «Очы пайрам» нанҷыларының саны ӧзіп одырча. Анзы тың ӧріндірче», – теен ол.
Даваадорж Лодон Хакас гимназиязын Улангомда иртер футболҷа паза баскетболҷа нанҷыластығ матчтарда аралазарға хығырған. Олар июньның 20 числоларында иртер осхастар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде