ЧАРАДЫҒЛАРНЫ ТУЗЫНДА АЛАРҒА
10.03.2023
Хабарлар
Устағҷылар ӱгредіг хайди парчатханын ӱзӱргеннер
МЧС ӱгредіглерi. Асхыста сағыбаан саайлар салтарларын чох идерінҷе паза чуртағҷыларны арачылирынҷа алғым ӱгредіглер ирткен
Хакасияның гражданскай арачыланысча, сағыбаан саайларҷа паза ӧрттердең тоғыр управление специалисттері иртiрген ӱгредіглерде Россия МЧС-ының Хакасияҷа ӧӧн управлениезінің паза Асхыс аймааның устағ-пастағлары араласханнар.
Ӱгредіглернің кип-чооғы хоостыра, хар табырах хайыл сыхханнаңар паза пус тығылызы пасталыбысханнаңар, Ағбан суғ, тазып, дамбаны ас парыбысхан, кізілер чурттарынзар чит парған. Ол сылтағнаң Асхыс аймаа администрациязында сағыбаан саайларҷа комиссия (КЧС) чыылии ирткен. Анда Россия МЧС-ының Хакасияҷа ГУ-зының пастығы, істіндегі службаның генерал-майоры Александр Мулл, Асхыс аймаа пазының тоғызын толдырған Евгений Костяков, аймахтағы ГО, ЧС паза ПБ управление пастығы Вячеслав Кучученов паза табырах полызығ пирчеткен службаларның кізілері араласханнар.
Хайди таныхтаан Вячеслав Кучученов, пӱӱл сілкер айының 28-ҷі кӱнінде сағыбаан саайларны сыныхтағда тутчатхан кінзер (ЦУКС) Ағбан суғ тазып пастабысханнаңар искіріг кірген. Анзы, чылығ кӱннер турып, хар табырах хайылғанынаң палғалыстығ полча. Тығын парчатханда, пус ікі орында турыбысхан. Аны хоостыра Асхыс аалдаң 1 километр ырахта, ӱстӱнзарых-іскеркі дамба хыринда, суғ, табырах кӧдіріліп, дамбаны ас парыбысхан. Сағыбаан саай тӧрт орамаа читкен. Іди суға 30 тура кір парған, оларда 78 кізі, ол санда 30 пала, чуртапча. Тураларзар читкен суғның сині 50 – 100 сантиметрге читкен. Иң сидік киректер Речная паза Паромная орамаларда парча.
Аймахтағы КЧС кнезінің орынҷызы, ӧрттердең тоғыр службаның 4 № отрядының пастығы Аркадий Сунчугашев таныхтаан:
– Мындағ хыйал пол парғанда, чуртағҷыларға полыс пирер пӧгіннең прай оңдайларнаң тузаланарға кирекпіс. Табырах имнег полызии тоғынҷылары палығлаттыр салған кізілерге полызарға тимделер, полиция тоғынҷылары сағыбаан саай участогын ибірібізер. Ідӧк ӧрттердең тоғыр служба полызыға килерге тимде. Полызығ службаларының транспортын чығҷаң орын табылған. Чуртағҷыларға полызар ӱчӱн прай кӱзібісті саларға кирекпіс. Сағыбаан саайлар салтарларын чох итчеткен службалар тимделер.
КЧС чыылиинда Асхыста сағыбаан саайлар режимін кирібізерге чарадығ алылған паза табырах полызығ пирчеткен службаларның толдырар тоғызы таныхталған.
КЧС чыылии соонаң Таштыпскай орамада техниканың кӧзідии ирткен. Александр Мулл полған на автомобильні сыныхтабысхан. Ідӧк сағыбаан саай салтарларын чох идерге суғны сығара тартчаң помпалар тоғысха кирілген. Прай техника сыныхтал парғанда, службалар хыйалға кірген чуртағҷыларға полызыға парғаннар. Полиция тоғынҷылары сағыбаан саай орнын ибірібіскеннер, арачылағҷылар полған на туразар кіргеннер.
Хыйалға кірген кізілерні ӱр нимес чуртаҷаң орынзар автобустар читіргеннер. Аны орындағы Культура туразында тимнеп салғаннар. Анда орғаннар турғызылған. Суға кір парған тураларның ээлерін социальнай службалар тоғынҷылары, санға алып, хайдағ полызығ киректелчеткенінеңер сурастырғаннар.
Хайди таныхтаан Евгений Костяков, Асхыс аал чурағҷылары 2021 чылда улуғ хыйалға кіргеннер. Андада Ағбан суғ, тазып, кізілернің чурттарынзар читкен. Андағ саайны паза полдыртпас ӱчӱн азынада тимненерге кирек.
– Пу ӱгредіглерде піс хыйалдаң тоғыр кӱрезер кӱзібісті паза оңдайларыбысты сынапчабыс. Анзы, сағыбаан саайлар читсе, чуртағҷыларға полызыға килерге асхынах тус хорадарына киректелче. МЧС управлениезінің устағҷылары тоғызыбыстың читпестеріне хайығ айландырчалар, сизіндірчелер паза тузалығ чӧптер пирчелер. Комиссияның ӧӧн пӧгіні – орта чарадығны тузында алары, – таныхтаан Евгений Юрьевич.
Ӱгредіглер соонаң аймах администрациязында чыылығ ирткен. Анда ӱгредіглер салтарлары иділген.
Хайди таныхталған, КЧС чыылиинда алылған чарадығнаң хаҷан даа тузаланарға чарир полар. Аны табырах полызығ пирчеткен прай службаларға читірерге киректелче. Анда сағыбаан саай тузында полған на ведомство хайдағ тоғыс толдырары таныхтал парзын. Улуғ хайығ тоғыс ӧмезіне айландырылзын.
Пӧзік тимненіс режимі, сағыбаан саай сынап улуғ хорғыс полза ла, кирілче.
Ідӧк сағыбаан саайдаң тоғыр кӱрезер кӱсті сынап аларға киректелче, аны хоостыра аймахха хоза полызығ пирілер. Аннаң пасха, хыйал килчеткеннеңер искіріг прай чуртағҷыларға читірiлзін. Чыылығда пасха даа ағырсымнығ сурығлар ӱзӱрілген.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде