ИПТИ НААҶЫЛАЛҒАН КУЛЬТУРА ТУРАЗЫ
10.03.2023
Хабарлар
«Культура» нацпроектче
тыхталған клубты азарға улуғ пастыхтар килгеннер
Нацпроект. Таштып аймааның Кiчiг Арбыт аалында тыхтағ тоғыстары соонаң Культура туразы пайрамни азылған
Пылтыр анда алғым тыхтағ апарылған, тастынаң даа, iстiнең дее. Пӱдіріг кӧрiмi хай-хай чахсылан парған. Улуғ алызығлар «Культура» нацпроектте араласханынаң палғалыстығ, прай 13 млн 600 муң азыра салковай хорадыл парған. Паза пылтыр Арбыт аал чӧбi, «Чонға кирек иң артых проект» марығда аралазып (аны Хакасияның национальнай паза территориальнай политика министерствозы иртiрче), Культура туразының ибіркізін иптиріне 650 муң салковай утып алған. Амды тура алнында пас чӧрерге уғаа истiг – чалбах тротуар тӧзелген, сiлiг фонарьлар, одырҷаң орыннар турчалар.
Аарлығ аалҷыларға хызыл чаламаны хыплир оңдай пирерге чаратханнар – Хакасия пазының орынҷызы Михаил Побызаковха, культура министрi Светлана Окольниковаа, Таштып аймаа пазы Николай Чебодаевке, Арбыт аал чӧбi пазы Сергей Чебодаевке. Михаил Анатольевич «Пiс олғаннарға асчабыс нимес пе?» тіп, хыринда турчатхан хызыҷахтарны чаламаны хада кизерге кӧӧктiріп алған. Пiди сағынып алзаң, Культура туразы прай чонға азылча, че Кiчiг Арбыттағы ортымах школа клуб хыринда орныхча, аннаңар палалар кружоктарға алай библиотеказар пеер кiр турарлар, неке.
Анаң пастыхтар чыылған чоннаң хада улуғ залда концерт кӧрерге одырыбысханнар. Арбыттағы паза Таштыптаң килген артисттер постарының чайаачы устарын кӧзiт пиргеннер паза ӱлгӱ алғыстас сӧстерiнең чуртағҷылар алнынзар сыххан.
– Улуғ Арбыт аалда пiс ӱр ле ниместе iдӧк тыхтағ тоғыстары соонаң Культура туразын асхабыс, Кiчiг Арбытта, тiзең, Наа чыл алнындох азарға пӧгінгебіс, че наа одырчыхтарны ағылғалах полғаннар. Мына пу сценаа тӧзелген ағас пiр дее Культура туразында паза чоғыл, мин андар тасхархы ӧдiктiг сығарға хынминчам. Пӱӱл Арбыт аал чӧбiнде iзестiг алызығлар узарадылча, «Казачья усадьба» музейнi нааҷылирбыс, «Арбатская писаница» музейзер наа оборудование аларбыс, – теен Светлана Окольникова.
– Пiстiң оой нимес туста культура паза духовность, пастағы орынға сығып, хазна хырығларында хадағдағы чiли турчалар, – чоохтаан Николай Чебодаев. – Культура тоғынҷылары пiстiң кӧңнiбiстi кӧдiрчелер, чуртас ағынын чарытчалар. Светлана Анатольевнаа улуғ алғыс, ол Хакасияның культура тилiзiне илееде кӱс пирче. Сағынчам, пiс хада Таштып аймаанда культураны чахсыландырарына кӧп ниме идiп аларбыс.
Таштып аймаа пазы, Хакасия пазы паза культура министерствозы хабазиинаң Кiчiг Арбыттағы культура туразына 120 кресло алылған, библиотека залына – наа компьютерлер. Амды тоғынҷаң оңдайлар хай-хай истiг – чылығ, чарых кабинеттер, сiлiг сцена. Мының алнында турада соох полҷаң, Арбыт аал чӧбiнiң пазы Сергей Чебодаев ам чылыға ӱгренерге кирек теен, чылығ пирілчеткенін ӱзірерге дее килiсче нооза – иртiре iзiг пол парарға айабас. Сизінгенде, пiрее кӧрiгҷiлер иргi сағыснаң залда киптіг одыр салтырлар.
Тыхтағ тоғыстарын Арбыттағы Чучалиннер сӧбiрезi апарған, орта чоохтаза, «Востоксантехмонтаж» ООО-ның ӧмелерi. Пылтыр Виталий Артемьевич Чучалин ӱреен, аның iкi оолғына Культура туразын читiре тыхтирға килiскен. Олар прай нименi иптiг ит салғаннар, прайзы Чучалиннернi махтапча. Виталий Артемьевич ачых-чарых кiзi полтыр, ол Арбыт аалда тигiриб пӱдiрген, пасха даа халых киректеріне хабасчаң. Пір минута сым турып, чыылысхан чон аны хумартхылаан.
– Халғанҷы чылларда республика бюджедi iкi хати ӧс парған, – таныхтаан Михаил Побызаков, – аннаңар полған на аалда хайдағ-да чахсы алызығлар кӧріндіре, оңдай пар, пiс аннаң тузаланчабыс. Пу Культура туразына, тiзең, ахча ӧӧнiнде федеральнай бюджеттең нацпроект хоостыра тартылған. Пу пайрамнаң аал чуртағҷыларын алғыстапчам, сценада чуртас «хайназын», наа «чылтызахтар» тӧрiзiн, чайаачы чолларың азых ползын.
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде