"Ӧлімі чох полк" чӧрім иртірілбес, че...
Хакасияда, тиксі Россиядағы чіли, "Ӧлімі чох полк" кибірліг чӧрім иртірілбес. Ӱлгӱлер андағ чарадығны, федеральнай штабтың чарадиина тӧстеніп, чонға хорғыс чох ползын тіп алыбысханнар. Ирткен чылда андағох чарадығ алылған. Че, пасха оңдайларнаң тузаланып, матырлар аттарын хумартхылирға паза чӧрімге хозыларға чарир. Чӧрімні иртірчеткеннер чуртағҷыларға чӧрімнің наа кӧрімнерінең тузаланарға чӧп пирчелер:
- ниикке чӧрҷең машинада Илбек Ада чаа матырының сомын хаптырарға;
- соцсетьтердегі позының страницазында пос сомы орнына матырның сомын турғызарға паза аннаңар искіріг пас саларға;
- бейджте ал чӧрерге;
- кип-азахта сомын сығарарға;
- чӧрімнің сайтынзар искірігні ызарға паза пасхазы.
– Пӱӱл "Ӧлімі чох полк" чӧрім сілкер айының 12-ҷі кӱніне читіре иртер, анзы полған на чуртағҷаа чӧрімде хынған оңдайҷа аралазар оңдай пирер, – чоохтап пирген "Ӧлімі чох полк" исполкомының устағҷызы Наталья Шадрина. – Чуртағҷылар матыр сомын пос кип-азаанда сығардырып алчалар, аны кизіп, сӧбіренең тасхар сыхчалар. Сомны сіліг чазаҷаң ӧнетін конструкторнаң тузаланарға чарир: https://www.polkrf.ru/shtender. Анда сом кистін килістіре алыстырарға, ады-солазын пазарға, аның тыл істенҷізі алай партизан полғанын таныхтирға чарир. Аға-ууҷаларың чоохтаан киректерні сағысха киріп, соцсетьтерде паза чӧрімнің сайтында пазыңар. Пос матырына хынчатханын паза поғдархапчатханын кӧзідіңер!
"Хакас чирі" республика газетазы нинҷе-де чыл изере чуртағҷыларға "Ӧлімі чох полк" чӧрімде онлайн аралазар оңдай пирче: сайтта чӧрімге чарыдылған алынҷа пӧлік пар: https://www.khakaschiry.ru/lim-chokh-polk/; ВКонтакте социальнай сетьте ӧнетін страница тӧстелген: https://vk.com/public194721279.
Матырдаңар искірігні ӧменің адына ызыңар: портредін, толдыра ады-солазын, чуртаан чылларын, званиезін, чааласхан орнын, сыйыхтарын паза ағаа кем килісчеткенін таныхтаңар.
Сомнар газета редакциязы архивінең
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |