Аалларны тилiдерге полысчатхан проекттер
03.05.2024
Хабарлар
Ибiг аал чӧбi пазы Анатолий Тодояков
Марығ. С.П.Кадышевтiң адынаң чон чайаачызының национальнай кiнiнде Хакас Республиканың муниципальнай пӱдiстерi аразында «Чонға кирек иң артых проект» марығ ирткен
Пу марығны Хакасияның национальнай паза территориальнай политика министерствозы иртiрче. Пӱӱл анда 69 муниципальнай пӱдiс араласхан, оларның 35-i финалға сығып алған. Ол марығның iкiнҷi чардығы, хайзында аал чӧптерi проекттерiн арачылапчалар.
Марығның iкiнҷi чардығы пайрамни азылған. Ол 14-ҷi хати иртiрiлдi. Чылдаң чылға араласчылар саны даа, марыға пирiлчеткен ахча синi дее ӧсче. Пу марығ полызиинаң аалларда олған паза спорт площадкалары пӱдiрiлчелер паза тиксi тыхталчалар, тахталар паза чоллар иптелчелер, Илбек Ада чаа ветераннарына чарыдылған хумартхы тастар нааҷылалчалар, тыхталчалар паза пасха тоғыс толдырылча.
– Марығ 2007 чылдаң сығара иртiрiлче. Ағаа тиксi 133 миллион салковай хорадылған. Пӱӱл 45 миллион салковай позыдылған. Халғанҷы ӱс чыл аразына марыға пирiлчеткен ахча синi нинҷе-де хати ӧскiрiлген. Пiстiң бюджет оңдайын санға алып, ахча синiн ӧскiрербiс. Килер чылда 50 миллион салковайдаң асхынах нимес позыдарбыс.
Сiрер пирген сурыныстарыңны кӧрiп алғанда, пӱӱл марығ патриот кӧстеглiг полчатханын таныхтирҷыхпын. Сiрернiң кӧбiзi Илбек Ада чаа, ӧнетiн чаа операциязы чааҷыларына чарыдылған хумартхы тастар турғызарына проекттер тимнеп салған. Анзы орта, пiс Илбек Чиңiстiң 80 чылына тимненчебiс. Чуртағҷыларыбыс анзын чахсы сизiнчелер. Аалларны иптирiне парктар, скверлер, тахталар паза чоллар кирек, че пiстi культурабыс, кибiрлерiбiс пiр чонға пiрiктiрче. Аал чӧптерi пастарына мындағ тоғыс апарчатхан ӱчӱн алғызым читiрчем! Марығның iкiнҷi чардығы азылчатханынаң прайзын алғыстапчам! – теен Хакасия пазы Валентин Коновалов.
Анаң муниципальнай пӱдiстер пастары проекттерiн арачылааннар.
Таштып аймаандағы Аңчул аал чӧбi «Полғанын на адынаң cағысха кирербiс!» проектiнiң iкiнҷi чардығын арачылаан. Пылтыр аал чӧбi проекттiң пастағы чардығын чуртасха кирерiне марығда грант утып алған. Ол ахчаа Аңчул аалда Россияның Матыры Аймир Миягашевке бюст паза ӧнетiн чаа операциязы паза кизек чаалазығлар араласчыларына чарыдылған хумартхы тас турғызылған. Пӱӱл аал чӧбi проекттiң iкiнҷi чардығын чуртасха кирерге пӧгiнче. Аңчул аал чӧбiнiң пазы Олег Тибильдеевтiң чооғынаң, Аймир Миягашевке чарыдылған бюст облицовочнай материалнаң чабылар, успас от тӧстелер, хумартхы тас хыринда одырчыхтар турғызылар, ибiре тротуар плитказы тӧзелер, сиден нааҷылалар. Тоғыстар ӱртӱн айына теере толдырыл парарға киректер. Пу проект пастағы орынны алып алған.
Таштып аймаандағы Пыдырах аал чӧбi Илбек Ада чаада чат халған чааҷыларға чарыдылған хумартхы тасты нааҷылирынҷа проект тимнебiскен. Аны хоостыра наа гранит плиталары турғызылар, сиден алыстырылар. Пыдырах аал чуртағҷылары хумартхы тас ибiркiзiн иптирiнде ӧткiн аралазарлар. Пу проект iкiнҷi орынға турысхан.
Ибiг аал чӧбi пазы Анатолий Тодояков хайдағ проекттi арачылааннаңар чоохтап пирген:
– Пиҷе хол паза Харой кiчiг аалларда хумартхы тастар турғызарынҷа проекттi арачылаабыс. Пу ааллардаң Илбек Ада чааға кӧп кiзi парған, че оларға чарыдылған хумартхы тастар чоғыл. Килер чылда Илбек Чиңiске 80 чыл толар, аннаңар мындағ тоғысты толдырарға кирек. Хумартхы тастар турғызарына 1 миллион 725 муң салковай кирек. Таштып аймаа бюджедiнең 50 муң салковай пирiлер, аал чӧбiнең – 100 муң салковай, фермерлер Михаил Бозыков паза Марина Амзаракова ахча хосханнар. Чуртағҷыларнаң тоғасханда, олар проекттi чуртасха кирерiнде аралазарлар тiп чоохтааннар, хайда холнаң, хайда техниканаң. Пылтыр пу марығда ӱзiнҷi орын утып алғабыс. Ол ахчаа Чоғархы Ибiг кiчiг аалда хумартхы тас турғыс салғабыс. Аннаңар аал чӧбiне кiрчеткен пасха даа аал чуртағҷылары хумартхы тас турғызарға кирек тiп кӧңнiлерiн искiргеннер.
Пу проект iкiнҷi орынға турысхан.
Пии аймаандағы Кирбi аал чӧбi пазы Валентин Карчигашев ӧнетiн чаа операциязында чуртастарын пир салған чааҷыларға чарыдылған хумартхы тас турғызарынҷа проекттi арачылаан. Проект пастағы орынға турысхан.
– Пiстiң аал чӧбiнең, ӧнетiн чаа операциязында аралазып, ӱс чааҷы ӱреен: Владимир Андреевич Козлов, Валерий Владимирович Тахтобин, Александр Викторович Злобин. Оларға чарыдылған мемориал турғызарға пӧгiнчебiс. Ол хара граниттең тимнелер, ибiре брусчатка салылар, чарытхы тартарбыс, кiчiг скульптура турғызылар, – сағызынаң ӱлескен Валентин Карчигашев.
Кирбi аал чӧбi пазы Валентин Карчигашев
Пии аймаандағы Новомихайловка аал чӧбi Илбек Ада чаада чат халған чааҷыларға чарыдылған мемориал комплексiн нааҷылирынҷа проект тимнебiскен Ол 1973 чылдох турғызылған. Новомихайловка аал чуртағҷылары аны нааҷылирдаңар сурығны пiр ле хати кӧдiрбееннер. Олох проектче кизек чаалазығларда паза ӧнетiн чаа операциязында ӱреен чааҷыларға чарыдылған мемориал плиталары тимнелер. Проект хоостыра иргi хумартхы тас хыйа алылып, наа турғызылар. Аның алнында хызыл граниттең успас от тӧстелер. Мемориал комплексiнiң чирiнде тротуар плитказы тӧзелер, одырчыхтар турғызылар паза тӧрт сыбы одыртылар. Пу тоғысха ӧткiн чуртағҷылар тартыларлар. Идiнҷектер сай, одырчыхтар, хорбылар паза тоғысха кирек техника пирерлер. Пу проектке пастағы орын пирiлген.
«Чонға кирек иң артых проект» марығда ӱзiнҷi орынны алған муниципалитеттерге 1 миллион салковайдаң 1 миллион 400 муң салковайға теере грант пирiлген, iкiнҷi орынға сыхханнарға – 1 миллион 300 муң салковайдаң 1 миллион 500 муң салковайға теере, пастағы орынға турысханнарға – 1 миллион 450 муң салковайдаң 1 миллион 650 муң салковайға теере.
Сомнар Альбина Чистогашевани
Автор :
Оксана Челтыгмашева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде