Ӧӧн пӧгін – кізілер аалларда чуртазыннар
20.03.2024
Хабарлар
Аалҷыларға культура-ӱгредіг кінінҷе экскурсия иртірчеткен туста
Танығлығ кирек. Асхыста кӧп тоғысха кӧріл парған палаларға паза чииттерге культура-ӱгредіг кіні пайрамни азылған
Ол «Аалларның тиксі тилізі» хазна программазы хоостыра пӱдірілген. Пайрамнығ мероприятиеде Хакасия пазы Валентин Коновалов, республиканың аал хонии министрі Сергей Труфанов, Асхыс аймаа пазы Абрек Челтыгмашев араласханнар.
Халғанҷы ӱс чыл аразына Асхыс аалда пу хазна программазы хоостыра алғым пӱдіріглер парча. Прай тоғыстарға 1 миллиард артиинаң салковай позыдылған. Амды пір пӱдірiг тимге сых парды. Анзын олғаннар паза ӱгретчілер чидікпин сахтааннар. Искусство школазының иргі туразы ӱгредіге киліспин сыхханда, палалар чайаачыларын орыннарда тиліткеннер. Амды хоосчылар, теелбекчiлер паза пасха даа ӱгренҷілер ӱс хадыллығ истіг турада ӱгренерлер. Аның пӱдіриине 200 миллион артиинаң салковай позыдылған.
Улуғ аалҷыларны чылығ удурлааннар, іпекнең паза айраннаң сыйлааннар, чайаачы ӧме кӧг тиріглерінең ойнаан. Хызыл чаламаны Валентин Коновалов, Абрек Челтыгмашев, Ӧӧркі Чӧптің аал хонии комитедінің кнезі Иван Вагнер паза ӱгренҷі Настя Бызова хыплааннар. Кін ізіктерін азыбысханда, аалҷыларға экскурсия иртірілген. Амды олғаннар истіг, чарых класстарда ӱгредіг аларлар. Экскурсия тузында палалар улуғ аалҷыларны чайаачы номерлерiнең хайхатханнар. Ӱгренҷілер теелбектер салғаннар паза кӧг тиріглерiнең ойнааннар.
Анаң ӱгретчілер паза аалҷылар актовай залда чыылысханнар, анда улуғ нимес концерт ирткен. Мероприятие алнында культура-ӱгредіг кіні хайди пӱдірілгеннеңер видео кизегін кӧзіт пиргеннер.
Хайди таныхталған, Россия президентінің пастаанҷа чуртасха кирілчеткен «Аалларның тиксі тилізі» программа хоостыра мындағ алғым проект тимге сых парған. Наа ӱгредіг туразы кӧп тоғысха кӧріл парған. Ол алғым паза истіг. Анда чайаачы олғаннар кӧг тиріглерiнең ойнирға, сарнирға паза теелбек саларға ӱгренерлер паза пасха даа саринаң чайаачыларын тилідерлер.
Ӱгретчілерні паза ӱгренҷілерні алғыстирға Валентин Коновалов сыххан.
– Пӱӱн піс уғаа ӧріністіг киректі таныхтапчабыс. Асхыс аалда тиксі тиліс программазын толдырчабыс. Мында специалисттерге кӧп хадыллығ тура паза олған сады пӱдіріл парған. «Аалларның тиксі тилізі» программа хоостыра школа паза пасха объекттер пӱдірілчелер. «Хазых хайраллиры» национальнай проектче Асхыста наа имнег туразы тимге сых парир. Мындағ тоғыс чахсы салтарлар пирче, аал чахсы тиліпче, городтардаң даа халбинча. Ӧӧн пӧгін – кізілер аалларда чуртазыннар. Улуғ алғызым хазна ӱлгӱлеріне читірчем. Улуғ тоғысты республиканың аал хонии, культура министерстволары паза Асхыс аймаа устағ-пастаа пірге толдырыбысханнар, – таныхтаан Валентин Олегович.
Чооғын тоозып, Валентин Коновалов Хакасия правительствозының алғыстас пічіктерін читірген. Іди сыйыхха турысханнар Асхыс аймаа устағ-пастааның пӱдіріг паза чурт политиказынҷа устаныс пастығының тоғызын толдырчатхан Раиса Куянова, Асхыстағы искусство школазының директоры Неля Иптышева, директор орынҷызы Денис Саражаков.
Аның соонаң Абрек Челтыгмашев, сценаа сығып, таныхтаан, культура-ӱгредіг кінiнің проекті Магаданнаң килген, че анда ол ам даа толдырылбаан. Россияда мындағ пӱдіріл парған тура чалғыс ла. Алғым тоғыс толдырыл парғаны ӱчӱн ӧрінiстіг. Че мыннаң ол орында тоғыстар тоозылбааннар, ибіркізі чахсыландырылар. Улуғ алғыс аймах устағ-пастаа специалисттеріне, ол санда аймах пазының орынҷызы Роман Чугунековха. Оларның улуғ тоғызы сылтаанда хазна программазы мариинда Асхыс аймаа улуғ регионнарны азып алған. Чооғын тоозып, Абрек Челтыгмашев пӱдірігҷілерге Асхыс аймаа устағ-пастааның алғыстас пічіктерін читірген.
Ідӧк Асхыс аал чуртағҷыларын Иван Вагнер алғыстаан. Аның сӧстерінең, Асхыс аалда улуғ пӱдіріг пӱт парды. Анзы пасха аймахтарға кӧзідім ползын. Асхыс аймаанда халғанҷы чылларда кӧп проект чуртасха кирілче. Анзы аймахтың устағ-пастааның тӱзімніг тоғызын киречілепче. Мындағ программада аралазар ӱчӱн проектті паза пасха даа пічіктерні тимнирге кирек. Анзы муниципалитет бюджедіне хоза хорадығлар иткен. Че, іди дее полза, Асхыс аймаа тиліпче.
Аннаң пасха, чыылысхан чон алнында Асхыс аймааның улуғлар чӧбінің кнезі Леонид Горбатов чоох тутхан. Аның таниинаң, Асхыс аймаанаң кӧп чайаачы кізі сыххан. Чыл пазы алнында мындағ сыйых хакас чоныбысха кӱс пирер. Аның ӱчӱн республика паза Асхыс аймаа устағҷыларына улуғ алғыс.
Хакасияның аал хонии министрі Сергей Труфановтың чооғынаң, «Аалларның тиксі тилізі» программа 2030 чылға теере узарадылча, Хакасия ол программаа 2020 чылда кірген. Регион прай муниципалитеттернең андар хозылған. Республиканың аал хонии министрі полған на аймахтың пічіктерін Москвазар читірген. Анда улуғ таллағ хоостыра Хакасия программаа кір парған. Иң пастағы проект хоостыра Хубачар аалда суғ арығлаҷаң пӱдіріг тимге сых парған. Аның соонаң республикада алғым пӱдіріглер пасталғаннар.
Пайрамнығ мероприятиеде алғыстас сӧстері кӧп читірілген. Искусство школазының ӱгренҷілері аалҷыларны сарыннарнаң паза теелбектернең ӧріндіргеннер. Культура-ӱгредіг кiні Асхыста пӱдіріл парғанда, аймахтаң кӧп чайаачы кізі сығарына ізеніс пар.
Сом авторни
Автор :
Антон Чертыков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде