Студенттер ӧткiн араласчалар
06.03.2024
Хабарлар
Хакасия пазы Валентин Коновалов СВО-зар ызылчатхан гуманитарнай полызығны таарлирында араласча
Полызығ. Украинада иртiрiлчеткен ӧнетiн чаа операциязы зоназынзар пiстiң чааҷы-чир-суғҷыларыбысха республикадаң теестегi гуманитарнай таарлағ ызылған
Хакасия правительствозының пастаанҷа республиканың сағыбаан саайлар полдыртпазынҷа искiрiглер кiнiнiң базазында гуманитарнай полызығ чығҷаң пiрге пункт тоғынча. Ол пу тоғысты 2022 чылның март айынаң сығара апарча. Пiрге пункттаң амға теере ӧнетiн чаа операциязында араласчатхан пiстiң чааҷыларға ДНР-зар паза ЛНР-зар 200 тонна азыра гуманитарнай таарлағ ызылған. ЛНР-дағы Свердловск городта Хакасияның правительствозы склад тимнеп салған. Анда республикадаң ызылчатхан полызығны алып, хайраллапчалар паза таратчалар. Мындағ тоғыснаң устапча Хакасияның кiзiзi Сергей Комаров.
Амғы теестегi гуманитарнай таарлағны СВО зоназынзар ызарында араласхан Хакасия пазы Валентин Коновалов. Ол пiстiң чааҷыларға хабазарында ӧткiн араласчатхан прай кiзiлерге, ол санда пiрге пунктсар автофургонзар полызығны таарлирға килген Хакасияның олимп резервi училищезiнiң (техникумының) cтуденттерiне алғыс сӧстерiн читiрген:
– Пiс ам ӧнетiн чаа операциязында араласчатхан чир-суғҷыларыбысха теестегi гуманитарнай таарлағ ысчабыс. Мин чааҷыларыбысха хабазарында ӧткiн араласчатхан cтуденттерге, полызығны чыыпчатхан прай кiзiлерге, чааҷыларға чӱленҷең сетьтернi палғапчатханнарға алғыс сӧстерiн читiрчем. Прай Хакасия чааҷыларыбысха хабасча, андағ тоғыстаң пiрдеезi оортах турбинча. Правительство чир-суғҷыларыбысха полызар ӱчӱн кӧп ниме итче. Чиңiс тудары пiстiң полызиибыснаң палғалысча, армияа прай чон хабасча. Хада-пiрге тудынып ла, пiс чиңiс тударбыс!
Хысха чооғын тоозып, Валентин Олегович олимп резервi училищезiнiң cтуденттерiне Хакасия правительствозының алғыстас пiчiктерiн читiрген. Сыйыхтарнаң таныхтатханнар аразында хакас ооллар Данил Барашков, Николай Кучелаев, Максим Пидюров паза Денис Нарылков адалғаннар.
Алғыстас пiчiктерi читiрiлген соонда, cтуденттер (18 кiзi полған) складта чыылған гуманитарнай полызығны автофургонзар таарлап пастааннар. Ол тоғыста оларнаң хада араласханнар Хакасия пазы Валентин Коновалов, аның орынҷызы Владислав Мингела, Хакасияның ГО, ЧС паза ПБ устааның пастығы Владимир Карамашев паза «Боевое братство» халых пiрiгiзiнiң региондағы пӧлиинiң устағҷызы Александр Векшин.
Iди чыылған полызығны СВО зоназынзар апарар «фуразар» таарлалғаннар «Буханка» адалчатхан УАЗ автомобиль, квадроцикл, квадрокоптерлер, аккумуляторлар, аймах имнер, чӱленҷең сетьтер, аймах ас-тамах, чылығ кип-азах, госпитальларда имненчеткеннерге кирек ниме-ноо, бензопила, автомобильлернi тыхтаҷаң тирiглер, сварка аппарады, домкрат, блиндажтарда, окоптарда тузаланҷаң свечiлер, сотовай телефоннар, дроннарны тӱзiрҷең блокиратор, рациялар паза даа пасха чааҷыларға кирек ниме-ноо. Прай 20 тонна гуманитарнай таарлағ ызылған. Iдӧк Хакасиядағы школаларның ӱгренҷiлерi чааҷыларға постарының пiчiктерiн ысханнар.
Таарлағны чыырында араласханнар республикадағы халых пiрiгiстерi, предприятие-учреждениелернiң профсоюзтары, пос киреенең айғасчатханнар паза олаңай даа чуртағҷылар. Прайзын адаза, уғаа улуғ список пол парар. Мындағ оңдайнаң даа Хакасия ӧнетiн чаа операциязында араласчатхан пiстiң чааҷыларыбысха чиңiстi чағдадарға полысча.
Cом Дмитрий Сунчугашевти
Автор :
Николай Султреков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде