Ӧӧн пӧгін – ынархасты тыыдары
01.03.2024
Хабарлар
Фестиваль араласчыларынаң тоғазығ тузында
Тоғазығ. Пу кӱннерде Хакас хазна университедiнде тиксi тилекейдегi чииттер фестивальында аралазар оол-хыстарнаң тоғазығ ирткен
Пӱӱл фестиваль 1 – 7 мартта Сочи город хыриндағы «Сириус» федеральнай орында иртер. Анда Россиядаң паза пасха хан чирлерiнең килген, аймах кӧстеглерҷе iстенчеткен (наука, спорт, пос кӧңнінең полызары, бизнес, культура паза пасхазы даа), халых тоғызын апарчатхан 20 муңҷа чиит кiзi аралазар тiп кӧрiлче. Ол фестивальның ӧӧн пӧгiнi – чииттернi таныстырып, хазналар аразындағы ынархасты тыыдары. Аны Чииттер киректерiнҷе федеральнай агентство иртiрче. Тиксi тилекейдегi чииттер фестивальы халғанҷызын 2017 чылда ирткен. Пiстiң регионнаң чииттер анда араласханнарох.
Пӱӱл Хакасиядаң фестивальға 28 кiзi парар. Олар ХГУ-ның, республиканың техникум-колледжтерiнiң студенттерi, аймах-городтардағы олған садтарының, школаларның тоғынҷылары, Росгвардияда, ФСИН-да служба иртчеткеннер паза пасхазы даа. Аймах кӧстеглернең айғасчатхан чииттернi пiр ниме пiрiктiрче – олар прайзы Хакасияның халых чуртазында ӧткiн араласчалар. 14 волонтёр «Сириуссар» азынада парыбысхан. Олар фестиваль иртiрер тимненiсте полысчалар.
Республикадағы араласчыларнаң Хакасияның ӱгредiг паза наука министрiнiң тоғызын толдырчатхан Анатолий Бутенко, аның орынҷызы Юлия Ворошилова, ХГУ-ның чииттер политиказынҷа проректоры Светлана Шмидт тоғасханнар. Анатолий Алексеевич оол-хыстарға ӧткiн поларға паза республикабысты турыстығ кӧзiдерге алғаан.
Чииттерге ӧнетiн тимнелген кип-азах читiрiлген. Оларны кӧре, прайзы пiлер – пу чиит улус Хакасиядаң килген. Оол-хыстарыбыс Конго паза Мали республикалардағы чииттернiң полысчылары поларлар. Хакас хазна университедiнде Африкадаң студенттер ӱгренчелер, олар тiл алызарға полызарлар. Чорых алнындағы тоғазығда фестиваль араласчылары видеопалғалыс хоостыра подшефнай чииттернең чоохтасханнар, хада тоғынар оңдайларны ӱзӱргеннер.
Фестивальға парарға сағынчатханнар таллағ ирткеннер. Гульсара Мамышева Асхыс аймааның чииттер халых палатазының кiзiзi полча. Фестивальдаңар ол социальнай сетьтердең пiлiп алған, анда аралазарға сағыныбысхан. Таллағ нинҷе-де чардыхтаң пӱткен. Сурыныс пiчиин ысхан соонаң пос чидiглерiнеңер чоохтирға кирек полған. Анаң пирiлген темалар хоостыра эссе пасханнар. Халғанҷы чардығында постаңар видеовизитка суурарға киректелген. Прай пу чахығларны толдырған соонаң чиит хыс таллағны иртiбiскеннеңер пiлiп алған. Ол мындағ улуғ мероприятиеде аралазар оңдай пирiлгенiне тың ӧрiнген. Сағынчам, пу чорых пасха даа чииттернiң сағыстарында хаҷанға даа халар.
Сом Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде