Табығларда хайди даа аралазарға
01.03.2024
Хабарлар
Табығлар-2024. Республика чуртағҷылары Россия президенті табығларында аралазардаңар сағыс-кӧріcтерінең ӱлесчелер
Любовь Аёшина, Хакасияның Улуғлар чӧбі президиумының хачызы, Россия чоннары ассамблеязының Хакасиядағы пӧлиинiң кнезі:
– Хакасияда 2022 чылда Россия чоннары ассамблеязының регион пӧлии пічікке кирілген. Аның кнезіне мин табылғам. Ол хазнаның халых организациязы полча. Піс Россияның национальнай политиказын Хакасияда апарчабыс. Аннаңар республикада хазна паза аймах чоннар ӱлӱкӱннерін пасха халых пірігістерінең хада таныхтапчабыс. Ол санда поэт Расул Гамзатовтың 100 чазын Дагестан чонынаң хада иртіргебіс, саблығ хырғыс оолғы Чингиз Айтматовтың 95 чазын хырғыстарнаң хада таныхтаабыс. Генрих Батцтың адынаң немецтернің культура кінінең тӧремiл тоғынчабыс. Пии аймаанда азербайджаннарның культура кӱннерін иртіргебіс.
Пір сӧснең чоохтаза, Хакасиядағы прай национальнай организациялар пістің республикадағы хазна паза чон ӱлӱкӱннерін иртірерінде ӧткін араласчалар. Ол пайрамнарда концерттер ле полбинча, че iдӧк аймах кӧзідіглер иртірчелер, видеофильмнер кӧзітчелер, книгалар сатчалар. Хакасияда аймах нациялығ чоннар пілізіп ынағ чуртапчалар.
Ам iдӧк піс прайзыбыс Россия президентінің табығларына тимненчебіс. Анда пістiң республикадағы чоннар ассамблеязының кізілері араласчалар. Кӧзідімге алза, мин Л.Р.Кызласовтың адынаң национальнай чир-суғ ӱгренҷең музейде прай ӱс кӱн табығлар кӧрігҷілерi штабында тоғынарбын. Анда мобильнай группаның устағҷызы поларбын. Ол штабта тиксі республиканы хаапчатхан видео мониторлары поларлар. Піссер прай табығ участоктарынаң телефон пастыра кирек сурығларнаң айлан турарлар. Кӧбізін кізілер постарының ӱн пирҷең участоктарын пілбинчелер. Хайди ӱн пирердеңер сурчалар, пiреезі сайбағ итчетсе, сығдыратчалар. Хайзы, ибдең сығар оңдайы чох полып, позынзар килерге сурынча.
Табығлар тузында Ағбандағы паза хости ааллардағы табығ участоктарынҷа сыныхтағнаң чӧрербіс. Амғы туста, США паза Европа хазналары пiстің хазнадаң тоғыр чоо кӱресчеткеннеңер, піске сизіктіг поларға кирек.
Табығларда піске полғаныбысха ла хайди даа аралазарға кирек. Кӧрзіннер, пістің чонның ынағ паза чӧптіг полчатханын. Піcтің кӱстіг хазна паза кӱстіг президент ползын!
Сом интернеттең алылған
Автор :
Пазып алған Илья Топоев
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде