Ибзер чиңіcнең айланзыннар
28.02.2024
Хабарлар
Хакасия пазының орынҷызы Михаил Побызаков 7922 № чааҷы частьының чааҷызы Ростислав Топоевке Хакасия правительствозының алғыстас пічиин читірген
Ӱлӱкӱн. Ада чир-суубыс арачылағҷызы кӱні алнында тиксі Хакасияда ағаа чарыдылған пайрамнығ мероприятиелер паза концерттер иртірілгеннер
Чааҷыларға алғыстас
Ағбанда орныхчатхан Познанскай Хызыл Знамялығ тимір чол бригадазының Культура кініндегі пайрамнығ мероприятиеде Хакасия пазының орынҷызы Юрий Курлаев регион устағҷызы Валентин Коноваловтың адынаң бригаданың чааҷыларын ӱлӱкӱннең алғыстаан:
– Пістің Чир-суубыстың ӱстӱнде амыр тигірні хайраллапчатхан ӱчӱн улуғ алғыс читірчем сірерге. Пик хазых, службада пӧзік чидіглер, сӧбіреңерге паза чағыннарыңа чахсы чуртас алғапчам!
Хакасияның Аарластығ пічиинең Познанскай тимір чол бригадазының командирі, полковник Андрей Баринов сыйыхтатхан. Пӧзік профессионализм паза чаа пӧгіннерін чалтырама толдырчатхан ӱчӱн бригаданың чааҷылары паза гражданскай служащайлары Хакасия правительствозының алғыстас пічіктерінең таныхтатханнар.
Ағбанның чайаачы ӧмелері чааҷыларға улуғ концерт кӧзіткеннер.
Хумартхылас
Ада чир-суубыс арачылағҷызы кӱні алнында Ағбандағы Чиңіc паркында, Илбек Ада чаада чуртастарын пир салған чир-суғҷыларыбысты хумартхылап, Успас от тӧзінзер чахайахтар салылған.
Тасхар соох таа кӱн полза, илееде чон чыылысхан. Анда юнармеецтер, кадеттер, волонтёрлар, чааҷылар, олаңай чуртағҷылар даа полғаннар.
Чааҷылар сабланызы мемориал алнындағы Успас от тӧзінзер чахайахтарны салғаннар Хакасия пазының орынҷызы Михаил Побызаков, республика Ӧӧркі Чӧбінің кнезі Сергей Сокол, Ағбан городтың пазы Алексей Лёмин, Хакасияҷа МВД-ның, УФСИН-ның, республиканың чааҷы комиссариадының, Росгвардияның Хакасияҷа устааның, МЧС-тың Хакасияҷа Ӧӧн устааның, республикада турчатхан чааҷы частьтарының устағҷылары паза тоғынҷылары. Оларның соонаң – волонтёрлар, юнармеецтер, халых пірігістерінің кізілері паза олаңай чуртағҷылар.
Мындағ мероприятие Илбек Ада чаада, пасха даа кизек чаалазығларда, ағаа хоза ам апарылчатхан ӧнетін чаа операциязында чуртастарын пир салған матыр чир-суғҷыларыбысты піс хаҷан даа ундутпазын таныхтапча. Улам анда чиит тӧл араласчатханда, мындағ хумартхылас тӧлдең тӧлге пиріл турарына ізеніс пирче. Матырларны хаҷан даа ундутпаспыс, олар пістің чӱреебісте хаҷанға даа халарлар.
Пайрам
С.П.Кадышевтің адынаң чон чайаачызының национальнай кінінің улуғ залында Ада чир-суубыс арачылағҷызы кӱніне чарыдылған пайрамнығ улуғ концерт ирткен. Аны кӧрерге чон залға толдыра чыылыс парған. Кӧрігҷілер аразында таныс таа кізілер учурапчатханнар, олар, постарының сағыстарынаң ӱлезіп, Украинада иртірілчеткен ӧнетін чаа операциязында араласчатхан постарының туған-чағыннарынаңар чоохтааннар. Полғаны ла СВО-да араласчатхан чир-суғҷыларыбыс чиңіcнең табырах ибзер хазых айланзыннар тіп сағыстарын читір турған.
Пайрамнығ концертті Хакас филармониязының симфоническай оркестрі асхан. Аның музыканттары сценаа толдыра одырғаннар. Концерт саблығ чааҷы дирижёры паза композитор Василий Агапкиннің «Прощание славянки» марш кӧӧнең азылған. Мероприятиені апарчатхан тоғынҷы, залзар хакас тілінең айланып, чонны ӱлӱкӱннең алғыстаан, Василий Агапкиннің чуртас чолынаңар искірген. Анаң ол пу ӱлӱкӱн хайди тӧстелгеннеңер, Хызыл Армияның, Совет Армиязының паза амғы Тирігліг кӱстернің тархындағы матыр чолларынаңар чоохтаан.
Аның соонда Хакасияның Ӧӧркі Чӧбінің кнезі Сергей Сокол чыылған чонны ӱлӱкӱннең алғыстирға сценазар сыххан. Кӧрігҷілерзер ол «Офицер арғыстар! Аарлығ нанҷылар!» сӧстернең айланған.
– Ада чир-суубыс арачылағҷызы кӱні ӱлӱкӱнні піс ам пасха оңдайнаң оңарчабыс. Россия президенті Владимир Владимирович Путин ӧнетін чаа операциязының ӧӧн кӧстеглерін толдырар пӧгін турғыс салған. Піс аны хайди даа толдырарбыс. Президент хазнаның наа регионнарында, наа чирлерінде чуртасты иптеп саларға чахығ пирген. Нацисттер оларда пос тілінең чоохтазарға, сағынарға даа чаратпинчатханнар. Орыс тілін саңай чох ит саларға пӧгінчеткеннер. Піске тиріг кӱзінең нацисттер бандазын чох идерге киліскен.
Амды пістің алныбыста пӧгін турча – нацизмні Украинада чиңіп, пістің матыр чир-суғҷыларыбысты аннаң ибзер хазых айландырарға. Ӧнетін чаа операциязы пасталғанда, пастағы туста сидіксіністер сығысханнар, че соонаң Хакасияның Ӧӧркі Чӧбінің, Правительствозының кӱстенізінең ол киректер чахсы саринзар айландырылғаннар. Піс Хакасия пазы Валентин Коноваловнаң хада ӱр ниместе ӧнетін чаа операциязы зоназында полғабыс, чир-суғҷыларыбыснаң анда тоғасхабыс. Піс оларға полызығлығ таарлағлар ысчабыс, хайдағ даа оңдайнаң хабазарға кӱстенчебіс.
Оларға олаңай чолабит тее читірзе, чир-суғҷыларыбысха чахсы пілдірче. Пістің чааҷыларыбыс пілчелер – оларны ибде, кічіг чир-суунда ундутпинчалар, олар айланарын чидікпин сағыпчалар. Піс, оларны Ада чир-суубыс арачылағҷызы кӱнінең алғыстап, туғаннарының посылкаларын, пічіктерін читіргебіс. Полған на пічік, открытка оларның кӧңнін кӧдірче. Чағынғы туста улуғ чиңіc тударларына ізеніс пирче.
Прайзын Ада чир-суубыс арачылағҷызы кӱнінең алғыстапчам!
Анаң чыылған чонны Хакасия пазының орынҷызы Михаил Побызаков ӱлӱкӱннең алғыстаан. Ол ідӧк республика пазының адынаң алғыстас сӧстерін читірген:
– Хакасия пазы Валентин Коновалов республика кирексіністерін аймах площадкаларда арачылапча. Аның адынаң сірерні ӱлӱкӱннең алғыстапчам. Ирен сӧбіреде, прай даа чирде пасхазына тірег полчатханына, аар чӱкті позына артынчатханына пісті кічігдең, школадаң сығара ӱгретчеңнер, ағаа піс кӧнік тее парғабыс. Амды муңар ирен Ада чир-суубысты арачылапча. Пір дее сӧбіре халбаан, хайзынаң ирен чаалазығларда араласпинча. Украинада пазын кӧдірчеткен фашизмні чох идіп, піс хайди даа чиңіc тударбыс. Пір дее ікінҷілес чох андағы нацизм чох иділер. Пістің кӧп нациялығ ынағ чоныбыс, хада-пірге тудынып, чиңіc тудар, Россия президенті Владимир Владимирович Путин турғысхан пӧгіннерні толдырарбыс.
Пӱӱн мин піcтің чааҷыларыбыстың ипчілеріне, іҷелеріне, пиҷе-туңмаларына хыныстары ӱчӱн алғыс сӧстерін читірчем. Оларға амыр чуртас, айас тигір алғапчам. Пістің чир-суғҷыларыбыс, ӧнетін чаа операциязында махачы чаалазып, чиңіcті чағдатханнар. Олар прайзы кӧксілерінде кӧп орден-медальлығ табырах ибзер чиңіcнең хазых айланзыннар. Прайзын Ада чир-суубыс арачылағҷызы кӱнінең алғыстапчам!
Чооғын тоозып, Михаил Анатольевич постарының службазында пӧзік чидіглер кӧзітчеткен тоғынҷыларға Хакасия правительствозының алғыстас пічіктерін читірген. Іди андағ сыйыхтарға турысханнар Хакасияҷа МВД-ның, Росгвардия устааның, УФСИН-ның, УФСБ-ның, республиканың чааҷы комиссариадының, Ағбан городча УМВД ГИБДД ДПС-ының, прокуратураның тоғынҷылары. Алғыстас пічіктерін алғаннар санында полғаннар Харатас городтың прокуроры Константин Абдин паза 7922 № чааҷы частьының чааҷызы Ростислав Топоев. Сыйыхтар читірілген соонда Михаил Побызаков прай чааҷыларны ӱлӱкӱннең алғыстаан.
Сценазар, чонны ӱлӱкӱннең алғыстап, чоох тударға ідӧк сыхханнар Ағбандағы епархияның архиепискобы Ионафан, «Боевое братство» тиксі Россиядағы халых пірігізінің региондағы пӧлиинің устағҷызы Александр Векшин паза СВО араласчызының ипчізі Ирина Мамонтова.
Симфоническай оркестр аймах кӧглер ойнаан, филармонияның солисттері патриот сарыннарын изере толдырғаннар.
Прай чонның ӱлӱкӱніне айлан парған Ада чир-суубыс арачылағҷызы кӱні Хакасияда тиксі таныхталған.
Сом Дмитрий Сунчугашевти
Автор :
Николай Султреков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде