Ӱзӱрігде – наука тилізi
14.02.2024
Хабарлар
Наукаҷа эксперт чӧбі чыылииның араласчылары
Ӧӧркі Чӧп. Россия науказының кӱнiнде Хакасияның Ӧӧркi Чӧбiнiң наукаҷа эксперт чӧбiнiң пастағы чыылии ирткен
Эксперт чӧбiнiң чыылиин аның кнезi, Хакас хазна университедiнiң ректоры, экономика наукаларының докторы Татьяна Краснова апарған. Аннаң пасха президиумға Хакасия Ӧӧркi Чӧбiнiң кнезi Сергей Сокол паза культураҷа, ӱгредiгҷе паза наукаҷа комитедiнiң кнезi Оксана Разварина кiргеннер.
Наукаҷа эксперт чӧбi 20 кiзiдең пӱтче. Олар Хакасияның наука-ӱгредiг организацияларында iстенчелер. Хайди таныхталған, эксперт чӧбiне толдырығлығ ӱлгӱдегi кiзiлер кирiлбинчелер, че оларны чыылығларға аалҷыларны чiли хығырчалар.
Иң пастап эксперт чӧбi кнезiнiң орынҷылары табылғаннар. Оларға ХакНИИЯЛИ-ның директоры, филология наукаларының кандидады Нина Майнагашева паза Хакас техническай институттың директоры, биология наукаларының докторы Елена Бабушкина турғызылғаннар.
Анаң республика науказының тилiзi амғы туста хайдағ синде полчатханын паза мыннаң мындархы пӧгiннернi ӱзӱргеннер. Пӱӱнгi кӱнде Хакасияда 400 азыра наука докторы паза кандидады тоғынчаттыр. 310 ученай, ол санда 55 наука докторы паза 255 наука кандидады, Хакас хазна университедiнде icтенче, ХТИ-да – 40 ученай, ХакНИИЯЛИ-да – 28, аал хонии сидiксiнiстерi наука-iстезiг институдында – 22. Хакасияның аал хонии сидiксiнiстерi наука-iстезiг институдында алызығлар пол парған. Ол амды Россияның наукалар академиязының Сибирьдегi пӧлиинiң Хызылчардағы наука кiнiнiң филиалы полча, директоры – техническай наукаларның кандидады Олег Иванов.
Татьяна Краснова, Елена Бабушкина, Нина Майнагашева, Олег Иванов организацияларының наука чидiглерiнеңер, апарылчатхан тоғыстарынаңар, проекттерiнеңер искiрiглерiн хығырғаннар. Iдӧк чыылығда видеопалғалыс пастыра Россияның чон хонии паза хазна службазы академиязының конкурентнай право кафедразының устағҷызы, юридическай наукаларның кандидады Андрей Тенишев араласхан.
Хакасияда ученайлар кӧп аймах кӧстегҷе iстезiглер апарчалар. Че кӧрiндiре чидiглерге чидер, оларны хазна синiне сығарар ӱчӱн, проекттернi улуғ ӧмелернең тимнирге кирек тiп таныхтаан эксперт чӧбiнiң кнезi. Аннаңар, iстезiглернiң нинҷе-де ӧӧн кӧстеен таллап, пасха-пасха институттарның тоғынҷыларына пiрiгерге кирек.
Iдӧк полған на устағҷы кадрлар чидiспинчеткенiнең палғалыстығ сурығны кӧдiрген. Амғы туста чииттер науказар парарға тың на хынминчалар. Пу сидiксiнiстi чарадар ӱчӱн чиит ученайларға хабазығларны кирерге кирек, кӧзiдiмге, мының алнында чиит ученайларға стипендия пирiлтiр. Алай ба ӱгретчiлерге, имҷiлерге чурт пирiлчеткен программа осхас полызығ кирер оңдайларны табарға.
Чыылығда кӧдiрiлген прай сурығларны алынҷа ӱзӱрерге паза Хакасия ӱлгӱлерiне читiрерге чарадығ алылған.
Сом Альбина Чистогашевани
Автор :
Татьяна Кыштымова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде