Харатаста Ӧӧркі Чӧптің депутады Дмитрий Ивановты халғанҷы чолға ӱдескеннер
28.04.2023
Хабарлар
Хакасияның Ӧӧркі Чӧбінің депутады Дмитрий Анатольевич Иванов, ӧнетін чаа операциязында аралазып, «Вагнер» ЧВК-да служба иртчеткен. 27 мартта бандеровецтердең тоғыр чаалазығда ол матыр чіли чуртазын пир салған, ағаа 47 час полған. Аның ипчізі, пис палазы ибде ӧкіс халғаннар.
Харатастағы «Луначарский» культура туразында Дмитрий Ивановты халғанҷы чолға ӱдезер траур мероприятиезі ирткен. Анда араласханнар Хакасияның устаа, Ӧӧркі Чӧптің депутаттары, министерство-ведомстволарның устағҷылары, Харатас городтың устаа паза депутаттары, халых пірігістерінің кізілері паза чуртағҷылар.
Траур митингінде чоох тутхан Хакасия пазы Валентин Коновалов:
– Пӱӱн піс Дмитрий Анатольевич Ивановты халғанҷы чолға ӱдесчебіс. Ол пістің арғызыбыс, коммунист, палаларының пабазы полған. Сын матырны ӱдесчебіс. Чуртаста ол пасха кізінің кӧңнінҷе полбаҷаң, кӧні чоохтығ полҷаң. Арғысха арғыс полған, ыырҷаа – ыырҷы. Ол піснең хада чуртаан, тоғынған, аны прайзы аарлаҷаң. Позының туразына, сӧбірезіне, палаларына хынған. Іҷезі, ипчізі, палалары аны чідір салдылар. Чуртаста сыбыра сын кӱресчі полған. Ӧнетін чаа операциязы пасталғанда, Чир-суубыс хығырғанда, ол чаалазығ полар орынзар парарға кӱстенген, анда чаалазығны позына алынған. Чуртаста Харатастағы олаңай оолах полған, мин аны чахсы пілгем, ол сыбыра сын ӱчӱн турысчаң, хараны хара тіҷең, ахты – ах, хаҷан даа хойралбаҷаң
Махачызын кӧзідіп, ниме ол сағынған? Ноо даа киректі, чалтанмин, кӧӧлҷе толдыр салҷаң. Аның махачы тудынызын олаңай сӧстернең чоохтап полбассың. Дима ӧлім пілбес чирзер парыбысты. Іҷезі, палалары ӱчӱн. Піс аның алнында тӧлеп полбас алымнығбыс. Ол Матыр атха турысчатхан кізі. Харатаста аның адын пірее орама ал чӧрзін. Амыр узу, харындас. Сині хаҷан даа ундутпастар. Пістің оолларыбыс пірее ниме идерге пастазалар, хаҷан даа аны читіре толдыр салчалар. Піс сині хаҷан даа ундутпаспыс. Сын Матырға, Хакасия оолғына сабланыс хаҷанға даа!
Митингте, хомзынызын читіріп, ідӧк чоох тутханнар Хакасияның Ӧӧркі Чӧп кнезінің пастағы орынҷызы Юрий Шпигальских, Харатас городтың пазы Василий Белоногов, Ӧӧркі Чӧптің депутады Григорий Назаренко, Кизек чаалазығларда араласхан ветераннар пірігізінің Харатастағы пӧлиинің кнезі, Ӧӧркі Чӧптің депутады Петр Синьков.
Матыр депутат Дмитрий Ивановты, чааҷы чіли чеестеп, Ағбан пилтіріндегі сыыратта чыып салғаннар.
Автор :
Николай Султреков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде