МАХАЧЫЗЫ ӰЧӰН СЫЙЫХ
28.04.2023
Хабарлар
Альберт БЕЛЯКОВ іҷезі Елена Николаевнанаң хада
Матырларыбыс. Пу наада Ағбан город устағ-пастаанда чир-суғҷыбыс Альберт Беляковха Мужество ордені читірілген
Россия иртірчеткен ӧнетін чаа операциязында аралазып, Альберт Беляков миномет орудиезінің командир орынҷызы, улуғ наводчик полған.
Сыйыхтас тузында Хакас Республиканың чааҷы комиссары, подполковник Николай Видяйкин Россия президентінің указын хығыр пирген. Анда чааҷы Альберт Эдуардович Беляков Мужество орденінең таныхталчатханнаңар чоохталча.
Альберт Асхыс аалда тӧреен, ортымах школаны Асхыс аймаандағы Ӱс чул аалда тоосхан. Амғы туста іҷе-пабазынаң хада Ағбанда чуртапча. Ағаа 22 час. 2020 чылда армияа парған. Чиит чааҷының тимненізін иртібіскенде, контракт хоостыра ікі чыл служба ирткен. Ӧнетін чаа операциязында тӧрт ай араласхан. Пылтыр июль айда, пиртін парып, службазын тоосхан.
– Россия ӧнетін чаа операциязын пастабысханнаңар истіп алғанда, таңнап таа парғам. Андада піс служба хоостыра теестегі ӱгредіге парчатхабыс. Нандыра айланчатханда, поездте ӧнетін чаа операциязына парчатханнаңар искіргеннер. Частьсар читкенде, піс чааҷы чахығларын толдырғабыс. Мин хайдар парчатханымны, анда ниме идерге килізерін пілгем. Ӧӧн пӧгінім арғыстарымны, ӧнетін чаа операциязы парчатхан чирдегі кізілерні арачылап халары полған. Хазнабыстың мындағ пӧзік сыйиина турысханыма тың ӧрінчем. Чазырбаспын, чаалазығ тузында хорғыстығ пілдірче. Че мин аны чабыра пазыбыс турарға харасхам. Ибзер амыр-хазых айланарға сағынғам. Минің нанҷы-арғыстарым ам даа анда чааласчалар. Прайзы ибзер изен-хазых айланзын тіп алғапчам. Амды пасха тіллер факультедінзер ӱгренерге кіріп аларға, тілбесчі поларға сағынчам. Чир кӧріп, пасха хазналар культуразынаң, кибірлерінең, чуртазынаң танызып аларым килче, – хазна сыйиин алған соонда теен оол.
Ағбан городтың пазы Алексей Лёмин махачы чааҷы оолны, аның іҷе-пабазын чылығ алғыстаан.
– Пу уғаа танығлығ, ӧріністіг кӱн! Сірер – айдас оолзар! Чир-суубысты нацизмнең арачылир тус читкенде, сала даа ікінҷілес чох ізестіг хаалағ иткезер. Сірер позыңарны даа, арғыстарыңны даа уйатха кирбезер, махачы хылыхтарыңны кӧзіткезер!
Іҷе-пабаңа улуғ алғыс! Мындағ оолнаң поғдархирға, махтанарға кирек! – теен Алексей Лёмин.
Автор :
Ағбан город устағ-пастаа пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде