ООЛЛАР АРМИЯА ПАРЧАЛАР
26.04.2023
Хабарлар
Хакас оол Вадим СИДОРОВ іҷезінең паза туған-чағыннарынаң хада
Чааҷы службазы. Хакасияның чааҷы комиссариадында призывниктернің пастағы командазын службаа ӱдезер пайрамнығ мероприятие ирткен
Республиканың чааҷы комиссариады алнында илееде чон чыылыс парғаны ырахтынох кӧрінчеткен. Хакасиядаң срочнай службаа парчатхан пастағы команданы пайрамни ӱдезері кибірге кір парған. Полған на призывниктің туған-чағыннары чааҷы службазына парчатхан оолны ӱдезерге республиканың прай пулуңнарынаң даа Ағбанзар килчелер. Амды срочнай служба тузы ӱр дее полбаза, амғы олаңай нимес туста призывниктернің чағыннарының сағыссыразы пілдістіг.
Чааҷы комиссариадының плацында чааҷы кип-азахтығ ооллар стройға турыбысханнар. Военкоматтың хығыртығ пӧлиинің пастығы подполковник Евгений Волков, «Равняйсь! Смирно!» команда пиріп, республиканың чааҷы комиссары подполковник Николай Видяйкинге рапортнаң призывниктер стройға турғызылғаннаңар искірген. Чааҷы комиссары, изеннезіп, Россияның флагын кӧдірерге чахығ пирібіскен. Россияның паза Хакасияның гимннері толдырылчатхан туста флагштокта Россия флагы кӧӧлҷе кӧдірілген. Анаң Хакасияның юстиция паза региондағы безопасность киректерінҷе министерствозының мобилизация тоғызынҷа департаментінің устағҷызы Сергей Максимов, призывниктерзер айланып, оларға Хакасия правительствозының паза позының адынаң служба пасталчатханнаңар алғыстас читірген. Хайди ол таныхтаан, призывниктер ам улуғлар чуртазына кірчелер, армияа парып, анда хылиин тыыдып, ибзер сын иреннер полып айланарлар. «Чолыңар азых ползын, прай киректерде оң ползын. Паба-іҷеңерге, туған-чағыннарыңа пічіктер пазарға ундубаңар, олар сірердеңер сағыссырапчалар», – теен устағҷы.
Николай Видяйкин Россияның арачыланыс министерствозының паза позының адынаң оолларны чааҷы службазы пасталчатханынаң алғыстаан, службаны чахсы апарарға, ибзер айланарға алғаан.
Митингте ідӧк сӧс пирілген протоиерей Александр Ильинге паза республиканың Ветераннар чӧбінің президиумы кізізі Василий Будылинге. Абыс чиит оолларға службаны турыстыра апарарға алғаан. «Амғы чааҷы службазының тузы уғаа асхынах, оңарынарға даа маңнанмассар, ибзер айланар тус чит килген полар», – теен ол.
Хайди Василий Будылин (ол отставкадағы полковник, мының алнында Хакасияның чааҷы комиссары полған) таныхтаан, сірер ам сын ирен, Ада чир-суубыс арачылағҷызы пол парарзар. Пастағы туста оой полбас, чуртас саңай алыс парар, че андағ режимге кӧнік парарзар, прайзы даа андағ службаны иртче. Республиканың Ветераннар чӧбі cірерні чааҷы службазын чахсы апарарға сурынча, Хакасиядаң парған призывник адын турыстыра апарарға алғапча.
Митинг тузында армияа парчатхан хакас оол Вадим Сидоровтың чаҷазы Елена Анатольевна Кокованаң чоох алысхабыс. Хайди ол искірген, Вадим Ағбанда пӱдіріг техникумын тоосхан, пӱдірігҷі специальнозын алып, ХГУ-да пастағы курста ӱгренчеткен. Вадимге ам 20 час, техникумда ӱгренчеткенде, ол чааҷы службазынаң отсрочка алған, аннаңар, отсрочка пір ле хати пирілчеткенде, ағаа ам армияа парарға килісче. Вадимнің іҷезі Шира аймаанда чуртапча, оолғын армияа ӱдезерге Ағбанзар килген.
Вадим службаны чахсы иртібізер кӧңніліг парча, ибзер айланза, ӱгредиин узарадар.
Евгений Волковтың чооғынаң, пу команда (анда 25 призывник) Ставрополь крайынзар Сухопутнай войсколарзар парча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде