ХЫДАТНАҢ ПАЛҒАЛЫС ТЫЫДЫЛЧА
КНР-ның Иркутсктағы ӧӧн консулы Ли Хай паза Хакасия пазы Валентин Коновалов
Пресс-конференция. Хакасияда Хыдат Чон Республиказының Иркутск городтағы ӧӧн консулы Ли Хай ааллапча. Ол пістің республика пазы Валентин Коноваловнаң тоғасхан. Анаң олар региондағы СМИ-лар хабарҷыларының сурығларына нандырғаннар
Пастағы сурығ хайдағ чӧптезіглер иділгеннеңер полған. Пілдістіг, амғы туста Россиянаң Хыдат кӧп киректе палғалыстар тыытчалар. Ол саринаң Хакасиянаң даа палғалыстар ӱзілбееннер. Россияның паза Хыдаттың удур-тӧдір садызығ кирее пылтыр 190 миллиард долларға читкен. Хакасиянаң даа ол сан 15 процентке тиңнелче. Пу чылның пастағы кварталында ниме-ноо айланызы 30 процентке ӧс парған.
Амды ӧӧн консул Ли Хай, Хакасияҷа чӧріп, хайдағ киректе, инвестициялар пиріп, хада-пірге тоғынар оңдайлар кӧрче. Пістің чирібістең Хыдатсар алюминий, хой тӱгі, ағас, хара тас паза даа пасха кирек товарлар парчалар. Андартын пеер техника, промышленнай товарлар паза ас-тамах ағылчалар.
Итсе-де, Хакасиянаң Хыдат садығ киреенде хаҷанох палғалыс тутчаңнар. Пістің тайғалардағы ағас, тимір, хара тас таарлалған эшелоннар субалысчаңнар. Bдӧк чистекмискелер паза даа пасха ис-пай парҷаң.
Пістің дее «челноктар» 1990 чылларда Хыдат чирінең ниик пааға турчатхан кип-азахты паза даа пасха ибде кирек нимелерні ағыл турҷаңнар.
Амды ол прай палғалыстар официальнай синде апарылчалар. Чоохтирға кирек, Хыдатта кӧп чон чуртапча, аннаңар андар Россиядаң газ, нефть, аймах рудалар кӧп парча. Хыдат позының саринаң пӧзік технологиялығ товарлар, автомобильлер паза даа пасха ниме-ноо ысча. Хакасияа амғы аал хонии техниказы киректелче. Хыдаттағылар, мында завод пӱдіріп, оларны чыып турарлар. Хоза тоғыс орыннары полар.
Хыдат паза Хакасия инвестиция проекттерін хада-пірге чуртасха кирерінде кӧңнілерін искіргеннер. Іди аал хонии техниказын Хакасияда чыып-тыхтир оңдайлар кӧрглееннер, мындох хой тӱгінең ниме-ноо сығарарға сағынчалар, ас-тамах заводын пӱдірер пӧгіннер парох.
Ідӧк ікі хазна аразында туризм киреен тилідері кӧрілче. Пандемия тузында туристтер аар-пеер сых полбаҷаңнар. Амды, карантин тоозыл парғанда, кізілер ырах чорыхтарға хынып чӧр сыхханнар. Хакасиядаң Хыдатсар чир кӧрерге паза имненерге чӧрчелер. Пістің дее республикада аалҷылар саны чыл сай хозылча. Хакасияда кізі кӧрҷең чапсых орыннар кӧп нооза. Туризмні алғыдар ӱчӱн ікі хазна аразында кӧні чартер рейстерін азарға пӧгінчелер.
Хакас Республиканың пазы Валентин Коновалов паза КНР-ның Иркутсктағы ӧӧн консулы Ли Хай хабарҷыларның пасха даа сурығларына нандырғаннар.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |