ХАКАСИЯДА ЫСТАЛБИНЧАТХАН ХАРА ТАСНАҢ ТУЗАЛАНАРЫ КИРІЛЧЕ
07.04.2023
Хабарлар
Азых чоохтазығ. Хакасия пазы Валентин Коновалов «Комсомольская правда» радионың хабарҷызы Александр Гамовнаң кӧні эфирде чоохтасхан
– Пастирбыс наа хабарларнаң, Россия Федерациязының Безопасность Чӧбі чыылиинаңар, хайзын Владимир Путин иртірген. Сірерге, улуғ политикада тӧрт чыл пол салған кізее чіли, мындағ сурығ. Ноға хазна пазы мындағ азых, тиксі хазнаа паза тиксі тилекейге, улуғ чыылығ иртірібізерге чарадығ алған?
– Владимир Владимирович – уғаа хыйға политик. Азых полғаны пістің халых чоныбыс пірге полчатханын кӧзітче полар. Пӱӱн армияа олаңай чуртағҷылар хабасчалар нооза. Регионнар, муниципалитеттер, предприятиелер, пірігістер, учреждениелер полысчалар. Ол азых тудынар оңдай пістің чон пір пӧгінге кӧстегліг полчатханын кӧзітче – чиңіске.
– Хайди мин пілчем, Хакасия, хайзынаң Сірер устапчазар, ӧнетін чаа операциязын апарарына ідӧк чахсы, толдыразынаң хабасча. Нименең ол кӧрінче?
– Піс хабасхабыс паза ол хабазығны ам даа узаратчабыс. Пастағы кӱннердеңӧк сығара полған. ДНР-зар паза ЛНР-зар 20 муңҷа тонна полызығ ызылған. Гуманитарнай полызығны ысчабыс, пістің чааҷыларға хабасчабыс. Пістің мобилизацияа тартылған полған на чааҷының сӧбірезіне социальнай паспорт тимнелген. Пу чыл пасталғанда, тізең, піс СВО-ның прай араласчыларына хабазардаңар законны алыбысхабыс...
– Сірер регион устағҷызы наа ла полыбысханда, Москвада даа, орыннарда даа тееннер: Коновалов сыданмас, иртіре чиит, кемнің ӱчӱн сірер ӱн пирчезер. Паза пасха даа нимелер. Хайди Сірер ол чоохтарны осхазар? Сірерге нинҷе час?
– Мағаа 35 час.
– Сірер регион устағҷылары аразында иң чииттернің пірсі алай иң чиит тее полча поларзар. Хайди Сірер анзын иртіп алғазар? Паза хайдағ полызығ пирген Сірерге федеральнай кін?
– Тоғынғабыс паза тоғынчабыс ах сағыснаң, тіспен, алнынзар ла хаалапчабыс. Пілдістіг, партия чахсы хабасча, Геннадий Андреевич Зюганов. Федеральнай кін ідӧк полысча. Піс Россия правительствозынаң даа, алынҷа министерстволарнаң даа ӧткін паза тӱзімніг пірге тоғыс апарчабыс.
– Ам (Москвазар. – Ред.) килгезер – Сірер хайда, хайдағ министрлерде полдыңар?
– Минің РЖД устағҷызының орынҷызы Алексей Николаевич Шилонаң тоғазығ полған. Пістің республикадаң хара тасты сығара тартары хоостыра. Піс пу сурығҷа РЖД-наң паза Минэнергонаң пик палғалыста тоғынчабыс.
– Паза кемнең хада?
– Хазна Думазының депутады Олег Николаевич Смолиннең хада тоғазығ полған. Ідӧк алынҷа сидіксіністерні ӱзӱргебіс, ӱгредігнең палғалыстығларны. Піди аймах министрлернең тоғасчам, кӧп сурығны пӧгібізер оңдай табылча. Саннарның хуруғ тілінең чоохтаза, піс халғанҷы 4,5 чыл аразына федеральнай программаларҷа паза проекттерҷе ахча кирерін тӧрт хати ӧскірібіскебіс. Аймах кӧстеглерҷе тоғынчабыс...
– Экологиядаңар чоохтас кӧреелер. Ол уғаа кирек сурығ, президент тее паза КПРФ ЦК-зының ӧӧн хачызы Геннадий Андреевич Зюганов таа ағаа улуғ хайығ салчалар.
– Я, экология – пістің стратегияның ӧӧн сурығларының пірсі. Пістің кии хоостыра, ойымнығ чирде орныхчатханыбыс сылтаанда, сидіксініс пар. Піс нинҷе-де чыл мының алнындох киині чахсыландырарынҷа программаны тимнебіскебіс. Ол піске федеральнай проекттерде аралазар оңдай пирген. Кӧзідімге, «Арығ кии» проектте, пістің Ағбан паза Харатас городтар андар кіріп алғаннар. Салтарында, киині чахсыландырарына федеральнай бюджеттең ахча позыдылар. Піс пу чылығ пирҷең туста чарытхынаң чылынҷаң сыныхтағлығ проектті тоғындырыбысхабыс. Іди тураларын чарытхы полызиинаң чылытчатхан чуртағҷыларға тарифке дотациялар пирчебіc. Ідӧк піс ысталбинчатхан хара таснаң тузаланарын кирчебіс, ол киизер пуртахтығ ниме-ноо позыдарын хызырча...
Автор :
Тимнеен Иван ТИННИКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде