Сессияда сан пирістер ӱзӱрілер
17.02.2023
Хабарлар
Ӧӧркі Чӧп. Хакасияның ӧӧркі Чӧп президиумы Владимир Штыгашевтiң устаанынаң теестегі чыылиин иртірген
Президиумдағылар пу чыылығда сан пирістернең палғалыстығ сурығларны ӱзӱрібіскеннер: Хакасияҷа МВД министрінің Хакас Республикаҷа істіндегі киректерҷе министерство полициязы 2022 чылда хайди тоғыныбысханынаңар паза Хакасиядағы идінҷектер праволарын арачылирынҷа уполномоченнайның 2022 чылда хайдағ тоғыс апарғанынаңар. Пу ікі cан пирісті чағынғы сессияның кӱн суриинзар кирері кӧрілген.
МВД министрі В.Э.Мингеланың сан пирізінең хысхаҷахти Хакасияҷа МВД штабының пастығы Александр Цыганков таныстырған. Сан пиріс хоостыра, кӧзідімге, ирткен чылда республикада санға алылған сайбағлар саны хызырыл партыр – 14 %-ке. Сайбағларны ілезіне сығарарынҷа тоғыс хомай нимес осхас – 60,3 %. 2022 чылда экономиканаң паза налогтарнаң палғалыстығ 303 сайбағ ілезіне сығарылтыр, коррупция кӧстегліг 63 сайбағ тохтадылтыр.
– Аның сылтаанда бюджетсер 38 миллион артиинаң салковай айландырылған, – таныхтаан Александр Цыганков.
Ирткен чылда ідӧк чолдағы саайларда ӱрееннер саны хызырылтыр,че олох туста палығлатханнарның саны ӧс партыр. Штаб пастығы искіриинең, халғанҷы туста чазы читкелек саарбахтар итчеткен сайбағлар ӧсчеткені сағыссыратча. Пу кӧзідімҷе иң не улуғ ӧзіс Боград аймаанда паза Саяногорскта полғанын таныхтаан.
Президиумдағылар саринаң сурығлар пар полғанох. Кӧзідімге, экономика политиказынҷа, промышленностьча, пӱдірігҷе паза транспортча комитеттің кнезі Василий Шулбаев полицияда тоғынҷылар чидіспинчеткені хоостыра сурығ пирген. Штаб пастығы Александр Цыганковтың нандыриинаң, пу тиксі Россиядағы ағырсымнығ сурығ. Хакасия полициязында амғы туста 10 %-че тоғынҷы чидіспинчеттір, Россияның хайзы регионнарында ол сан 25 %-ке чит парчаттыр. ӧӧн сылтағ чал ахчазында тіп санапча Цыганков.
ікінҷі сан пиріснең Хакасиядағы идінҷектер праволарын арачылирынҷа уполномоченнай Василий Кудашкин позы таныстырған. Ол ідӧк сан пиріс улуғ, 100 страница артиинаң полчатханын таныхтап, ӧӧн чардыхтарын хысхаҷахти искір пирген.
Иң не пастап ол республикадағы идінҷектерні 2022 чылда хайдағ сидіксіністер сағыссыратханын чарытхан. Кӧзідімге, уполномоченнай пос киреен апарчатханнардаң контракттарҷа тӧлеглер сӧӧ тартылчатханына хоптаныстар кӧп кіргенін таныхтаан.
– Ӧӧнінде муниципальнай пӱдістер саринаң андағ хыйыхтастар кӧп полған, – искірген Василий Кудашкин.
Идінҷектер ідӧк хазна ӱлгӱ органнарының, муниципальнай ӱлгӱ органнарының право хыйыстыра хайыныстарына, сыныхтағлар удаа иртірілчеткеніне, тибіребинчеткен ис-пайның кадастр паазы пӧзік полғанына паза чарытхы сетьіне хозылар ӱчӱн тӧлег аарлығ пол парғанына хоптантырлар.
Ӧӧркі Чӧп президиумы саринаң сурығлар пар полғанох. Кӧзідімге, орындағы пос устанысча, халых пірігістерінҷе паза нациялар аразындағы хайызығларҷа комитеттің кнезі Роман Челтыгмашев республика идінҷектерiне налог льготаларын пирчеткенінің тузазы пар ба тіп сурған.
Василий Кудашкиннің искіриинең, туза ікінҷілес чох пар – ирткен чылда Хакасияда идінҷектер саны хызырылбаан. Ағаа хоза пос посха тоғыс таапчатханнар саны кӧріндіре ӧc парған. ідӧк аның тузазын налогтар тӧлирі, прай кӧрімнерҷе, ӧс парғаны киречілепче тіп таныхтаан уполномоченнай.
Президиум пу ікі cан пирісті кирілгенге санирға паза оларны чағынғы сессияның ӱзӱриине сығарарға чарадығ алған. Сессия 28 февральда иртер тіп кӧрілче.
Чыылығның пасха сурығлары федеральнай закон проекттеріне ӱндезіглер пирерінең паза пасха регионнарның закон сығарҷаң пастағларына хабазарынаң палғалыстығ полғаннар. Федеральнай закон проекттерінің пірсі кізі психиказына теелчеткен имнерні рецепт чох сатханы ӱчӱн штрафтардаңар полған. Хазна Думазының депутаттар ӧмезі пу сайбағ ӱчӱн штрафтар синін ӧскірібізер чӧпнең сыххан.
– Сыныхтағ тузында андағ препараттар рецепт чох кӧп пирілгені ілезіне сығарылған, – таныхтаан ӧӧркі Чӧп кнезі Владимир Штыгашев. – Андағ имнер кізілерні наркоман чіли ит салчалар, психиканаң палғалыстығ ағырығларны сығарчалар.
Ӧӧркі Чӧптің комитеттерінің паза комиссияларының устағҷылары ол федеральнай закон проектіне хабазарға чарадығ алғаннар.
Президиум ідӧк ӧкіс палалар санынзар кірчеткен чааҷыларның, хайзылары СВО тузында чат халғаннар, чурт алар правозын оларның туған-чағыннарына пирер чӧпке хабасхан.
Мындағ закон сығарҷаң пастағнаң Кабардино-Балкария Республиканың депутаттары сыхханнар. Амғы федеральнай законҷа ӧкіс палалар санынзар кірчеткен кізілер ӱреп парзалар, оларны чурт алар списоктаң хыйа идібісчелер, іди хазнадаң чуртты тикке алып алар право оларның сӧбірелеріне пирілбинче.
Кабардино-Балкарияның депутаттары СВО тузында чуртастарын пир салған ӧкістернің сӧбірелері хазнадаң чурт алар праволығ поларға киректер тіп санапчалар. Хакасияның ӧӧркі Чӧп президиумы, аннаң чаразып, закон сығарҷаң пастаға хабазарға чаратхан.
Автор :
Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде