Чонында улуғлатхан
17.02.2023
Хабарлар
Хумартхы сӧс. Часха кічіг кізі Андрей Томочаков чуртастаң ирте парыбысханына киртiнерге сидік
Пірсінде телевидение хабарҷылары Ағбандағы национальнай школазар сюжет суурарға парғабыс. Ам пу школа гимназия пол парған. Тоғыс тузында олғаннарның тың сууласчатханнары истілчеткен залзар кірiбіскебіс. Анда сырайға иптіг, хыйға чоохтығ постаң оол олғаннарнаң, таң КВН, таң «Че-дек, ооллар» марығлас апарчатхан. Таныспин, хайди поларзың? Пу айдас оолнаң танызып алғабыс. Iди Андрей Томочаковнаң пастағы тоғазиибыс полған.
Хакас радиозында орын пол килгенде, сала даа ікінҷiлебин, аны піссер тоғысха алып алғаннар. Кізілернең тіл табырах алызып алчатхан кізі олаңай хабарҷыдаң Хакас телевидение редакциязының ӧӧн редакторына теере ӧс парған.
Ӧӧн тоғызынаң пасха, Андрей Дмитриевич халых тоғыстарында ӧткін араласхан. Ол тустарда хакас чонның съездтері ӧткін иртіріл турҷаң. Піс Андрейнең хада делегаттар пол турғабыс. Пу съездтерні иртірерінде пастағҷылар полғаннар Александр Костяков, Валерий Ивандаев, Андрей Томочаков.
Андада иртірілчеткен хакас чонның съездтерінде кӧп ағырcымнығ сурығлар кӧдірілҷеңнер. Ол санда Хызылчар крайынаң сығары, автоном облазын республика синіне кӧдірері.
Андрей Томочаков удаа чоох тутчаң, съезд президиумы араласчызына табылҷаң. Пӱӱнгі кӱнде ол сидік чылларда пӧгілбеен сурығлар ам сығарылбинча даа тиирге чарир. Аннаңар «Тун» ассоциацияның араласчыларын алғыс сӧснең сағысха кирерге кирек. Хомзынысха, Александр Костяков хаҷанох ах чарыхтаң парыбысхан, ам Андрей Томочаков паза айланмасха чӧрібісті.
Хакас телевидениезінде Андрейнің хыс туңмазы Антонина тӱзімніг тоғын парча. Ол газетабысха кічігдеңӧк пасчаң. Мында аҷазының кӧзідімi полғаны, аны журналистикаа кӧстеені полар ла.
Андрей Томочаковнаң ӱр тус тоғаспаан полғам. Ам андағ ӱлӱс паза тӱспес.
Автор :
Михаил Торбостаев, Россиядағы Журналисттер
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде