Олар Чир-суубыс кирексіністері ӱчӱн турысханнар
17.02.2023
Хабарлар
Митинг. 15 февральда Ағбанда тимір чол вокзалы алнындағы ачыхта орныхчатхан «Кизек чаалазығларда чуртастарын пир салған Хакасияның оолларына» хумартхы тас хыринда совет войсколары Афганистаннаң сығарылғанының 34-ҷі чылына чарыдылған митинг ирткен
Ачыхсар илееде чон чыылысхан. Анда стройда чааҷылар, юнармеецтер, кӱс структураларының тоғынҷылары турғаннар. Митингте iдӧк чуртастарын пир салған чааҷыларның туған-чағыннары, нанҷылары, республиканың паза городтың хазна ӱлгӱ органнарының, ветераннар паза чииттер пірігістерінің кізілері полғаннар.
Хайди искірiлген мероприятиеде, 34 чыл мының алнында 15 февральда 1989 чылда совет войсколары Афганистаннаң сығарылғаннар. Хазналар хырығларын таныхтапчатхан суғ кизіре тахтаҷа халғанҷызын чазағ кискен совет войсколарынаң устаан генерал Борис Громов. Iди 10 чыл узараан чаа тоозылған.
Анда кӧп чааҷы чат халған, iҷелернің харах чазы iдӧк кӧп тӧгілген. Пу кӱнде піс ол чаадаң айланмаан матырларны сағысха кирчебіс, оларны, чеестеп, сабландырчабыс. Олар прайзы, кизек чаалазығларда махачы чаалазып, Чир-cуубыстың кирексіністері ӱчӱн турысханнар. 15 февральда Россияның прай город-аалларында «iзiг точкаларда» чуртастарын пир салған чааҷыларны, улуғ аарлас читіріп, чеестепчелер. Пістің сағызыбыста олар хаҷанға даа халчалар, оларның аттары хаҷан даа ундудылбас.
Россияның гимні толдырылған соонда сӧс Хакасия пазының орынҷызы Юрий Курлаевке пирілген.
– Пу уғаа танығлығ кӱн. Піс кизек чаалазығларда чуртастарын пир салған матырларны сағысха кирчебіс, оларны сабландырчабыс. Аннаңар ол сабланыс кӱні. Чыл сай, мында чыылызып, «ізіг точкаларда» чат халған чааҷыларны чеестепчебіс, оларға аарлас читірчебіс. Пӱӱн совет войсколары Афганистаннаң сығарылған кӱнні таныхтап, аннаң хазых айланмааннарны сағысха кирчебіс. Хазых айланған ветераннар, чиит тӧлге кӧзідім полып, оларны патриотизмге ӱгретчелер. 10 чыл парған чааны кӧп кізі ирткен, 15 муң азыра чааҷы чуртазын пир салған, пiстің 70 азыра чир-суғҷыбыс чобағлығ списокка киріл парған. Прай город-аалларда матыр чир-суғҷыларыбыстың хумартхы чардылары азылған. Сабланыс оларға хаҷанға даа! – чоохтаан Юрий Курлаев.
Аның соонда чоох тутхан Афганистандағы чааның ветераны Геннадий Синельников.
– Афганистаннаң совет войсколары сығарылғанда, прай чон ниик тыныбысхан. 15 муң чааҷыбысты піс анда чідіргебіс. Оларның аттары хаҷан даа ундудылбас. Пу кӱн – ӱлӱкӱн нимес, ол – чобағ кӱні. ӱр парған чаа тоозылғанда, Чечняда чаалазығлар пасталған, амды, тізең, Украинада ӧнетін чаа операциязы иртірілче, пістің чааҷыларыбыс анда Чир-суубыс кирексіністері ӱчӱн турысчалар. Чуртастарын пир салғаннарны чеестепчебіс, оларны ундубаспыс хаҷан даа. Піс, хазых халғаннары, мыннаң мындар чуртап, чииттерні патриотизмге ӱгредербіс, – теен Геннадий Синельников.
Пір минута сым турған соонда, чуртастарын пир салған чааҷыларның ады-солалары пазылған мемориал плитазынзар паза хумартхы тас тӧзінзер чахайахтар салғаннар Хакасия пазының орынҷызы Юрий Курлаев, Ағбан город пазы Алексей Лёмин паза город администрациязының тоғынҷылары, халых пірігістерiнің, «Боевое братство» ветераннар пірігізінің, Ветераннар чӧбінің кізілері, чат халған чааҷыларның туған-чағыннары, кӱс структураларының тоғынҷылары паза чииттернің халых пірігістерінің кізілері.
Автор :
Николай Султреков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде