ХАКАСИЯДАҒЫ «ЧЕкагоны» ТИКСI РОССИЯ КӦРЕР
08.02.2023
Хабарлар
Пресс-конференция. Хакасияның культура министерствозында республикада суурылған «ЧЕкаго» фильмнiң араласчылары хабарҷыларнаң тоғасханнар
«ЧЕкаго» фильмнi орындағы «Ветер перемен» кинокомпания суурған. Анда А.М.Топановтың адынаң Хакас драма театрының, «Читiген» театрның паза Минсуғдағы театрның артиcттерi Россияның кино актёрларынаң хада араласханнар. Наа фильмнi чарыхха сығарарға «Ветер перемен» кинокомпанияның устағҷызы, продюсер Владислав Кафеев паза Москвадағы чиит режиссёр Николай Рыбников Россияның культура министерствозының грантын утып алғаннар.
Пресс-конференцияда Хакасиядағы «Ветер перемен» кинокомпанияның устағҷызы Владислав Кафеев, Россияның саблығ артизi Юрий Кузнецов, «ЧЕкаго» фильмнiң режиссёры Николай Рыбников паза культура министерствозының тоғынҷызы Ольга Воропаева араласханнар.
Таныхтирға кирек, прайзына таныс «Мухомор», «Улицы разбитых фонарей» паза пасха даа кӧп киноларда суурынған саблығ актёр Юрий Александрович Кузнецов – пiстiң чир-суғҷыбыс. Ол Ағбанда тӧреен, че пiс аны телевизорда ла кӧрчебiс. Ол «ЧЕкаго» кинода ӧӧн рольны толдырған.
Хакасиядағы кинода суурынарға Голливудтағы «Индиана Джонс» фильмде араласхан Россияның актёры Игорь Жижикин килген. Iдӧк наа фильмде Москвадағы актёрлар Иван Кокорин, Галина Безрук, Мосэ Куртанидзе, Данил Стеклов, Семён Алёшин, Эльдар Сафиканов, Мила Ершова, Аскар Нигамедзянов араласханнар.
– «Ветер перемен» – ол пастағы кинокомпания, хайзы Уралның пу сариндағы регионнарда кино суурарына хазна полызиин алған, – теен режиссёр Н.Н.Рыбников. – Пастап пiс киноны Сибирьнiң Ағбан, Хызылчар, Иркутск, Новосибирск городтарында ла кӧзiдерге сағынғабыс. Амды аны прай хазнаа кӧзiтчең оңдай табыл парған. Анзына тың ӧрiнчебiс. Москвадағы улуғ опыттығ паза ус продюсерлер дее Сибирьде кино суурыл парғанына хайхапчалар.
Сценарийнi Николай Рыбниковнаң Анна Гурина iкi чыл пасханнар. Анна С.А.Герасимовтың адынаң Тиксi Россияның кинематография институдында (ВГИК) драматургия пӧлиин тоосхан, Николай – режиссура. Фильмнiң текстi ӱс чыл тимнелген.
Пресс-конференция тузында Владислав Кафеев Хакасияның культура министрi Светлана Окольниковаа алғызын читiрген. Амды «Ветер перемен» кинокомпания культура министерствозынаң хада комиссия тӧстепчелер. Аның полызиинаң пасха даа кинокомпаниялар Хакасиязар кино суурарға кил турарлар.
– Пiстiң республикада уғаа сiлiг чир-чайаан паза чахсы кiзiлер чуртапчалар.Пу фильм пастыра пic Хакасия хайда орныхчатханын кӧзiт пирербic. Пiccер ааллап кил турзыннар, – теен Владислав Кафеев. – Амды пӧгiн турғысчабыс, Алтай Республика, Хызылчар крайы, Иркутск облазы паза пасха даа Сибирьдегi регионнар хада-пiрге пiрiгiп, Россияа наа фильмнер суурарға. ВГИК-та ӱгренчеткен чииттерiбiс, Москвада халбин, кiчiг чир-суубыссар айланзыннар, мында наа кинолар суурзыннар. Пiс прайзына полызарға тимдебiс. Пiске дее ус специалисттер чидiспинче.
Пiс аймах форумнарда, кинофестивальларда сыбыра араласчабыс. Анда исчебiс, полған на регион позының чирiнде кино суурарға сағынча. Хакасияда, тiзең, ол кӧстег толдырыл парды. Че мыннаң проекттiң тоғызы тоозылбинча. Хакасияда пic кино суурҷаң платформа тӧстеп салдыбыс.
«ЧЕкаго» фильм наркотиктеңер ле нимес, анда ынағластаңар, хыныстаңар паза садынғанынаңар чоохталча. Фильм Хакасиядағы чуртасты кӧзiтпинче, ол Россияның полған на городына теелче.
– Актёрларны чарым чыл таллаабыс, – хозылған Николай Рыбников. – Москвадағылар Хакасиязар учух килгеннерiнде, репетицияларға тус чох полған. Пiс Юрий Александрович Кузнецовнаң хада, пiр хати Москвада тоғас парып, кинодаңар чоохтазыбысхабыс. Мындағ илбек актёр Хакасияда, позының тӧреен чир-суунда, киноға суурынчатханда, мағаа алҷаастар идерге чарабас полған. Юрий Александровичті ибiнде сӧбiрезiнең хада азыранчатханын суурчатханда, тың чӱрексеем. Че актёр кадрда сых килгенде, кино пар сыххан. Юрий Александровичтiң тудынчатхан оңдайын кӧрiп, прайзының кӧңнi кӧдiрiлчеткен, кӱс алынчатханға тӧӧй полғаннар.
– Мин хысхаҷах чардыхта чабал бандиттi ойнаам. Итсе, сын чуртаста амыр хылыхтығ кiзiбiн. Юрий Кузнецовнаң пiр кинода суурынғаныма ӧрiнчем, – таныхтаан Владислав Кафеев.
«Ветер перемен» кинокомпанияның устағҷызы В.Р.Кафеев мындағ киноны суурарға хаҷанох сағынған. Ол аймах презентацияларға чӧрҷең. Пiрсiнде Екатеринбургта ол Николай Рыбниковнаң танызып алған, ағаа телефон номерiн артыс салған. Николай ағаа хайди даа сығдырадарбын тiп сӧс пиртiр.
– Кино презентациязында Николайның тоғызы кӧңнiме тың кiр парған. Ол хысхаҷах кино суур салтыр. Аның сығдырадарын ӱр сахтаам, анаң Москвазар сӱрiс парғам. Пiр кинофестивальда Николайны харахсын чӧргем. Кӧрзем, удур пастыр килир. Мин, ӧрiнгенiме, ағаа хысхырчам: «Мин синзер килдiм!» Ол, таңнап парып, сурча: «Сiрер кемзер?» – кӱлiмзiреп, чиит режиссёрнаң танысханын сағысха кирген Владислав Рашитович.
Пастап Николай Рыбников «Хакасия хайда? Ол Казахстанда ба?» тiп оңар полбиндыр. «Чох, ол Россияда, Сибирьде», – чарыттыр В.Кафеев.
Ол тоғазығ соонаң 6 чыл ирт парғанда, пӱӱнгi кӱнде пу iкi чайаачы оол Хакасиядаңар тиксi Россияа чапсых кино кӧзiтчелер.
– Пастағы кӱнде Хакасиязар читкенде, мин Ағбанда Лермонтовтың орамазында орныхчатхан кӧп хадыллығ турада тохтаам. Анда балконзар cых килгем. Хараама таттап парған гаражтар, пис хадыллығ туралар тасталчалар. Мындағ кӧрiм тӧреен-ӧскен Псков городымда даа пар. Анаң позымның алынҷа сағын салғам: «Ноға мин аның ӱчӱн пеер учухтым?» Пазағы кӱнiнде Харатас городсар парғабыс. Андар читкенде, хахап таа парғам, мин мындағ городты чуртазымда кӧрбеем. Анаң пiс чазыларҷа чӧргебiс. Нымырттығ посёлокка читкебiс. Андада мин пеер тиктең килбиндiрбiн тiп сағын салғам, – чоохтаан Москвадағы режиссёр. – Хакасияа мин хын парғам. Ол мағаа улуғ кӱс пирген. Мында истенчем. Ол мағаа тӧреен чирiм чiли пiлдiр сыхты. Ағаа хоза, «сеек-сеек» идерге ӱгренiп алғам. Iлiг iлгенi сынап таа полысча. Кино суурчатханда, аймах сидiксiнiстерге тоғасхабыс. Мин машинада iлiг арағазын ӧнетiн ал чӧрҷеңмiн. Итсе, позым пiр дее амзабинчам. Ӧӧркi чайааннардаң пiске полыс пирзiннер тiп сурынғам. Саяногорсксар читкенiбiсте, хазыр чилге сала ӱбӱртiбiспеебiс. Тағлар аразында чазыныбысхабыс. Анаң хараазын «сеек-сеек» идiбiскем. Пазағы кӱнiнде тасхар сыхханыбыста, ибiркiде прай амыр. Iди 10 кӱн чахсы тур пирген.
Киноны Ағбандағы тимiр чол вокзалы хыринда суурчатханда, районда чарытхы ӱс парған. Пic пастағы генераторны тоғындырыбысхабыс. Ол сағамох одырыбысхан. Iкiнҷi генераторы тоғынминохча. Тус парча, полған на минута ахчаа турча. Мин iлiг тастабысханымдох, iкi генератор позы ла тоғын сыххан. Мин «сеек-сеек» хайди тоғынчатханын оңар полбинчам, че ол сын. Минi iлiг iлерге «Читiген» театрның актёрлары ӱгрет салғаннар.
«ЧЕкаго» киноның адын Владислав Кафеев сағын тапхан. Городтың ады Чегаринск полча. Сынында андағ город чоғыл. Iдӧк киноның адын «Чё? Каго?» тiп хығырарға чарир. Хакасиядағы киноны пiр ай суурғаннар. Аның узуны пiр час чарым. Пiстiң республиканың Ағбан, Сорығ, Саяногорск паза Харатас городтарында «тӧреен» киноны 23 февральдаң сығара тиксi Россияның 800 азыра кинотеатрларында кӧзiдерлер.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде