МАТЫРЛАР ЧОННЫҢ САҒЫЗЫНДА ЧУРТАЗЫННАР
08.02.2023
Хабарлар
Хумартхылас. Пу кӱннерде Асхыс аймааның аалларында Украинада иртчеткен ӧнетін чаа операциязында чуртастарын пир салған чир-суғҷыларыбысха хумартхы чардылар азылғаннар
МАХАЧЫ ТАНКИСТ
Махачыларыбысха чарыдылған хумартхы чардылар Хакасия пазы Валентин Коноваловтың чахиинҷа тимнелчелер. Пилтірдегі 1№ школаның тастында танкист, улуғ сержант Сергей Тюкпеевтің хумартхы чардызы хызылған. Украинадағы чаа операциязы алнында Сергей Леонидович Оренбург облазында мотострелковай бригадада контрактча служба апарған. Ағаа 27 ле час полған. Махачы хылии ӱчӱн Сергей Тюкпеев Мужество орденіне турысхан (ӱреен соонда).
Хумартхылас мероприятиезінде Асхыс аймааның, Пилтір аал чӧбінің устағ-пастаа, матырның туған-чағыннары паза ӱгренҷілер араласханнар. Митинг пасталғанда, чон алнынзар Россия паза Хакасия флагтары сығарылғаннар, гимннер ойнадылғаннар. Хайди таныхталған, Сергей Тюкпеевтің олған паза саарбах тузы Пилтір аалда ирткен, школаны андох тоосхан. Мында аның іҷезі, хыс туңмазы чуртапчалар. Сергей оларға чӧлег полған, хада хонғанына – хынған апсаа. Ол паба часказын толдыразынаң піл полбаан, аның палазына андада чарым на час полған. Аның махачызы сағызыбыста хаҷанға даа халар.
Чыылысхан чонзар айланып, школа директоры Алевтина Сунчугашева таныхтаан:
– Сергей Тюкпеев, пістің школабыста 11 чыл ӱгренiп, пу пасхыстарҷа чӱгӱр чӧрген. Школаны тоозып, чааҷы службазын таллап алған. Сергейнің чуртазы хысхаҷах, че турыстыра полған. Пістің сағызыбыста ол хаҷан даа чуртир.
Пилтір аал чӧбі пазы Виталий Капустиннің чооғынаң, Сергей Тюкпеевтің махачызына чоныбыс хаҷан даа поғдархир. Ол Ада чир-суубыстың амыр чуртазы ӱчӱн тынын пир салған. Аның іҷезі махачы оол ӧскір салған.
Iдӧк митингте Асхыс аймаа пазы Абрек Челтыгмашев чоох тутхан.
– Прай хазнада Калининградтаң Ыраххы Востокка теере матырлар ӱгренген школаларда хумартхы чардылар азардаңар чарадығ алылған. Сергей школада ӱгренчеткенде, пасха олғаннардаң пасхалалбаан, школа линейкалары иртчетсе, ідӧк пу ачыхта турған, школа директорының, ӱгретчілерінің чооғын тыңнаан. Ол туста аны сағысха кирерлерінеңер сағынмаан даа. Мындағ хорғыстығ киректер Ада чир-суубыста полбазын. Пӱӱнгі кӱнде НАТО хазналары пістең тоғыр кӱстіг чаа техниказын турғысчалар. Палаларыбыс матырларны пілзіннер. Сергей Леонидовичтің махачызы сірерге кӧзідім ползын. Ол чааҷы тоғызын таллап алған, хазнабыс ӱчӱн турыстыра чааласхан, – таныхтаан Абрек Васильевич.
Асхыс аймааның депутаттар чӧбінің кнезі Александр Челтыгмашевтің сӧстерінең, чобағлығ киректер чуртаста асхынах ползын. Сергей Тюкпеев хазнабыстың кирексіністері ӱчӱн турысхан, чоныбыстың амыр чуртазы ӱчӱн тынын пир салған. Школа ӱгренҷілері аның махачызын пілзіннер.
Сергей Тюкпеевтің хумартхы чардызын азарға матырның хада хонғаны Ольга Тарасовнаа, Лесоперевалочнай 1№ школаның 11 класс ӱгренҷізі Иван Сорокинге пирілген. Митинг тоозыл парғанда, ӱгренҷілерге махачыланыс урогы иртірілген.
МАТЫР ЧИР-СУҒҶЫЛАР
Асхыс поселоктың ортымах школазында Егор Алжибаевке паза Вадим Боковиковха хумартхы чардылар пайрамни азылғаннар. Олар аймах чылларда пу ӱгредіг заведениезін тоосханнар.
Хайди таныхталған митингте, Егор Алжибаев 1986 чылда тӧреен. Читі частығда оолағас пастағы классха парған. Ол нандырығлығ, ӧткін паза пасхазына полысхах ӱгренҷі полған. Тоғызынҷы классты тоозыбызып, 18 № ПУ-да ӱгренген. Анаң Егор Алжибаев чааҷы службазын Ыраххы Востокта ирткен. Армиядаң айланғанда, сӧбіре тӧстеен, аның ӱс палазы ӧкіс халған. Очы оолғы пабазы ӱреен соонаң тӧреен. Егор 5-ҷі алынҷа Познанскай Хызыл знамялығ тимір чол бригадазында контрактча служба апарған. Ӧнетін чаа операциязы пасталғанда, аны Донбасс чуртағҷыларын арачылирға ызыбысханнар. Пір чаалазығ тузында аның чуртазы ӱзіл парған. Махачы тудынған ӱчӱн Егор Алжибаев Мужество орденінең сыйыхтатхан (ӱреен соонда).
Вадим Боковиков 2000 чылда тӧреен. 2007 чылда пастағы классха парған. Ол ідӧк чағбан чӱректіг, iзестіг нанҷы полған. Класстың паза школаның чуртазында ӧткін араласхан. Тоғызынҷы классты тоозып, Ағбандағы коммунальнай хоных паза сервис техникумынзар ӱгренерге кірібіскен. Аны тоозып, армияа хығыртылған. Соонаң Вадим контрактча служба ирткен. СВО-да аралазып, ӧнетін чаа пӧгіннерiн толдырып, ол чуртазын пир салған. Ағаа 22 час полған. Вадим Боковиков iдӧк Мужество орденінең сыйыхтатхан (ӱреен соонда).
Матырларның туған-чағыннарынзар айланып, Асхыс поселоктың пазы Сергей Энграф таныхтаан:
– Пӱӱн поселогыбыстың чуртазында уғаа танығлығ кирек иртче, піс чир-суғҷыларыбысха чарыдылған хумартхы чардылар асчабыс. Пӱӱн хумартхылас кӱні ле нимес, ідӧк ӧсчеткен тӧлге махачыланыс урогы иртче. Піс махачы чир-суғҷыларыбысты хаҷан даа ундутпасха кирекпіс.
Ідӧк хумартхылас мероприятиезінде Асхыс аймаа пазының пастағы орынҷызы Евгений Костяков чоох тутхан.
– Чир-суғҷыларыбыс, пісті хазнабыстың хырығларына чағдапчатхан ыырҷылардаң арачылап, чуртастарын пир салғаннар. Ағаларыбыс Илбек Ада чаа тузында фашизмнең тоғыр чааласханнар. Пӱӱнгі кӱнде ол айланған. Пістің оолларыбысха пазох аннаң тоғыр турызарға ӱлӱс тӱскен. Пӱӱн піс, матырларға чарыдылған хумартхы чардыларны азып, олар чонның сағызында халарына хозым итчебіс, – чоохтаан Евгений Юрьевич.
Хумартхылас мероприятиезінде ідӧк сӧс пирілген Асхыс поселоктың школа директоры Тамара Минорға, Егор Алжибаевнең хада служба апарған арғыстарына паза матырларның туған- чағыннарына.
Килген чон митингтiң халғанҷызынзар, матырларны хумартхылап, пір минута сым турған. Анаң хумартхы чардылар алнынзар чахайахтар салылған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде