IЗIГ АЙА САБЫЗЫ ТОХТАБААН
01.02.2023
Хабарлар
Концерт. Пу кӱннерде «АРОН» арт-резиденция «Нымах» чайаачы иир иртiрген
Тынағ кӱннерде С.П.Кадышевтiң адынаң чон чайаачызы кiнiнiң улуғ залында пазох чон чыылызып пастаан. Ӧӧнiнде саңай чиит улус кӧрiнчеткен. Анзы пiлдiстiг, «АРОН» арт-резиденция чииттерге ӧнетiн тӧcтелген нооза. Ағаа хоза, 14 – 22 частығ оол-хыстарның, Пушкин картазынаң тузаланып, культура мероприятиелерiне тикке чӧрҷең оңдай пар.
Пурунғыда пiстiң улуғларыбыстың чахсы кибiр пар полған. Аар тоғыстар соонаң, иирде, хайҷы-нымахчылар, хонҷыхтарын, туған-чағыннарын постарының ибiре ипти одыртып алып, чатхан хағып, алыптығ нымахтар ысчаңнар. Чииттер дее пiлҷеңнер, алыптығ нымах – ол ӧбекелерiбiс пiске артысхан иң аарлығ ис-пай. Ол тустарнаң піс пик палғалыс тутчабыс.
Чайаачы иирде «Архай» ӧме сценазар «Нымах» сарыннаң сыххан. Пис оол, Аржан Туденев, Иван Шулбаев, Александр Сунчугашев, Андрей Томочаков, Алексей Кыжинаев, хакас кӧг тирiглерiнең ус ойнап, хайлап, аны морсымнығ толдырған. Пу сарынның сӧстерiн ӧменiң араласчызы Александр Сунчугашев пас салған. Анда аңнап, палыхтап, ипти чуртап парчатхан чоннаңар чоохталча. Че оларның амыр чуртазын хорғыстығ чаа сайбабысча. Кӱстiг иреннер ыырҷыны унада сабарға парчалар.
Концерттi чиит оол Тимур Боргояков апарған. Алында ол Ағбандағы КВН-да араласчаң, удаа чиңiсчi полыбысчаң. Омскта паза Москвада «Comеdу Баттл» марығларда араласхан. Пӱӱнгi кӱнде хормачы иирлернi иртiредiр. Аннаңар «Нымах» концерттi iдӧк кӱлкістіг апарған.
Анаң сценазар музыка колледжiнiң студентi Айат Канысов сыххан. Ирткен чылда «алтын» ӱннiг алтай оол Хакасияҷа паза Алтайҷа, позының концерттерiн кӧзідіп, ӧткiн чӧрген. Пу чайаачы иирде Айат кӧрiгҷiлернi «Санаалар» паза «Тала» сарыннарнаң аптаан. Хайди чарытхан чиит ырҷы, «Санаалар» cарында кiзi тирең сағысха тӱсчеткеннеңер, ол, пӧзiк хан тигiрзер ӧӧрлеп, ыраххы чирлерзер учух поларынаңар чоохталча. «Тала» ырда, чиит ӱннер хозылып, кӱстiг паза сiлiг ниме-ноо тӧстелчеткеннеңер сарналча. Айат Канысов Индия киноларының артисттерi чiли ырлапча.
«Кӱн чахайағы» ансамбльның абахайлары «Хай ээзi» теелбекнең сыхханнар. Ciлiг хакас кӧгенектiг сылағай хыстар, холларында чаймахтар тудынып алып, теелбек пастыра ибiркiнi аластапчатханнарын кӧзiткеннер. Саблығ ансамбль чонның теелбектерiн паза сарыннарын, хайраллап, амғы тӧлге читiрерiнде улуғ тоғыс апарча.
Чайаачы иирде Хакасияның саблығ артизi Мирген Иргит «Хыныстың ыры» сарынны толдырған. Композитор Георгий Челбораковтың чылығ кӧглерi хаҷанға даа таныстар, аннаңар залда одырчатхан ортын частығ ипчiлер ырҷынаң хада ырлапчатханнар.
Чиит хыс Анастасия Иптышева прайзының чӱреен «Чигiрен» ырнаң аптаан. Ол музыканаң 8 частығдаң айғасча. Кӧглiг сарынынаң залдағыларның кӧңнiн улам кӧдiрген.
ХГУ-ның хакас филология кафедразының 2 курстағы студентi Малена Чебодаева iдӧк «Кӱн чахайағы» ансамбльның араласчызы полча. Чайаачы иирде ол Андрей Томочаковнаң паза Аржан Тодошнаң хада «Пыдырах суғ» сарынны толдырған. Кӧзiдiгнi ансамбльның хыстары теелбекнең сiлiглееннер. Малена Чебодаеваның чооғынаң, «Пыдырах суғ» сарынның cӧстерiн тай iҷезi Арина Марковна Тодозакова пасхан, кӧӧ – чонни. Амды чайаачы пархазы аны хакас сценаларда саблапча.
Чайаачы иирде «АРОН» арт-резиденцияның устағҷызы, «Кӱн сузы» ансамбльның теелбекчiзi, «Taвan Show» шоуның араласчызы Алексей Торбастаев (хакас ады – Хара Хусхун) «Кем андағ» сарыннаң кӧрiгҷiлернi ээреткен. Прай даа саринаң чайаачы оол артист Михаил Галустянның «Вай, мама, кто это?» сарынын хакас тiлiне хормачы оңдайнаң тiлбестебiстiр. Сценаа толдыра «Алтыр» мода театрының абахайлары сых килгеннер. Сылағай хыстарның аразына кiр парған Хара Хусхун «пазын чiдiр салча». Пу сарынны толдырчатхан туста Алексей Торбастаев сценада Россияның актёры, шоумен Александр Ревва чiли тудынча. Пiстiң позыбыстың «Артур Пирожковыбыс» пар полтыр.
«Алтыр» мода театрына теелгенде, концертте сiлiг хыстар iдӧк «Стихии» чыындыны кӧзiткеннер. Хайди таныхтапча ӧменiң устағҷызы Наталья Сартыкова, хакас чонның кип-азаа пастыра чир-чайаанның кӱзiн кӧзiт пирерге сағынчалар. Пу чыындыны «пӱдiрiбiзер» ӱчӱн, килiстiре ӧңнер паза чазанҷыхтар таллирға киректелген.
Ырҷы Татьяна Балахчина «Жених» (сӧстерi паза кӧӧ А.Медоности) паза «Тигiр чолы» (сӧстерi В.Майнашевти, кӧӧ Г.Танбаевти) сарыннарны толдырған. Аның алнында Кемеров облазының артизi Чылтыс Таннагашеваның паза пӱрӱт чонның чиит ырҷызы Арюна Нимаеваның хайхастығ иде алысчатхан ӱннерiне ӱрӱгерге килiсчең. Пiстiң чир-суғҷыбыс iдӧк аймах ӱннер сығарып сарнапчаттыр.
Концертте «Кӱн сузы» студияның олғаннары «Чалаңнар» теелбектi кӧзiткеннер. Чиит хыс Алина Канзычакова «Нымырт ағазы» паза «Пiр сурығ» сарыннарны ырлаан. Аржан Тодош «Дебрен кай» алтай сарынны сарнаан паза «Эр санаа» кееркестiг кӧгнi ыыхнаң толдырған. Мындағ ырҷыларыбыс парда, хонҷых Тағлығ Алтайзар даа парбин, хонҷыхтарыбыстың чайаачы культуразын кӧрiп алҷаң оңдайыбыс пар.
Николай Разумовнаң Алексей Торбастаев «Тун пайрам», «Ызығда», «Тина» сарыннарны толдырғаннар. Пу сарыннарның сӧстерi паза кӧӧ прай Николай Разумовти.
«Архай» ӧме «Чир» (сӧстерi А.Сунчугашевти, кӧӧ А.Туденевти), «Туғаннар» (сӧстерi чонни, кӧӧ А.Туденевти) паза «Чирiм кӧглерi» (сӧстерi паза кӧӧ А.Бурнаковти) ырларны читiрген.
Таныхтирға кирек, iкi час парған чапсых «Нымах» концерттiң режиссёры Тимур Тюкпеев полча. Иир тооза залда ізіг айа сабызы тохтабаан, кӧрігҷілер «Браво!» хысхырғаннар.
Анаң піс кӧрiгҷiлернiң кӧңнiлерiн пiлiбiскебiс.
Солнечнай аал чуртағҷызы Алевтина САГАЛАКОВА:
– Концертке хонғанымнаң паза оолғымнаң хада килгебiс. Иир кӧңнiме кiрген, чииттер чахсы сарнааннар. Ам сағынчабыс, 21 апрельде Аржан Тодоштың чайаачы иирiне хайди даа килерге.
Ағбан город чуртағҷызы Лариса ТОПОЕВА:
– Пеер килiп, чахсы тынандыбыс. Наа сарыннар истiп алдым. Концертте саңай чииттер араласты, анзы уғаа махалығ пiлдiрдi.
Ағбан город чуртағҷызы Пётр ЧЕРТЫКОВ:
– Чахсы концерт полды. Мындағ иирлерге удаа чӧрбинчеткенде, уғаа чапсых пiлдiрче. Хакас сарыннарны толдырчатхан артисттер ӱчӱн поғдархастығ.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде