Чииттерге наа «тыныс» пиргеннер
30.07.2025
Хабарлар
Гульсара Мамышева чееннерінең хада
Форум. 25 отта Ким суғ хазында республиканың суғ туризмі кінінде «Этнова. Чылығ Сибирь» ХIV регионнар аразындағы чииттернің этно-турист форумы ирткен
Чыл сай пу форум аймах площадкаларда чииттернi чыыпча. Олар анда, аралазып, наа пілістер паза наа арғыстар таап алчалар. Пӱӱл форумда 14 – 35 частығ 200 оол-хыс араласхан. Олар пілістерін читі аймах площадкада тилiткеннер: «Медиа», «Предпринимай», «Патриотическая», «Добровольчество», «Хакасияда чуртирға паза тоғынарға», «Движение первых», «Наставники».
Полған на площадканы хазнабыстың паза республиканың пӧзік пілістіг, улуғ опыттығ спикерлері апарғаннар. Ол санда Москвадағы педагогиканың хазна университедінің воспитательнай тоғыс паза чииттер политиказының устанызының пастығы Арсен Кайгермазов, «Піліс» Россия халығының пӧзiк ӱгредiг пiрiгiстерiнiң палғалысча устанызының ӧӧн эксперті Елена Белорыбкина.
Алындағы чылларда форум, республиканың сіліг орыннарынҷа кӧс чӧріп, нинҷе-де кӱн иртчең. Араласчылар проекттерінең пасха оол-хыстарны таныстырып, аны прайзы хада ӱзӱрҷеңнер. Пӱӱл, тізең, форум пір ле кӱн тоғынған.
Форум пайрамни азылғанда, чон алнынзар Хакасияның чииттер политиказы паза халых тилізі министрі Евгения Майнагашева сыххан. Ол чалахай чооғынаң чииттернің кӧңнін кӧдірген.
– Пӱӱн пістің републикадағы чииттерге танығлығ кӱн. Мында иртчеткен форумда Хакасияның ӧткін оол-хыстары араласчалар. Алғыс сірерге аның ӱчӱн. Ідӧк мин улуғ алғызымны форумны иртірерге полысхан ӱчӱн республиканың суғ туризмі кінінің устағ-пастаана читірчем. Олар пісті чылығ удурлааннар.
Пӱӱн «Этнова» араласчыларға проекттерін чуртасха кирерге полыс пирер. Паза форум сірернің чуртазыңарда наа чоллар азар. Пӱӱнгі кӱн полғанына ла талаан ағылзын! – теен министр.
Чоохтирға кирек, форумның араласчыларын ырахтынох кӧр таап аларға чарир полған. Оларның ах футболкалары олаңай аалҷыларның кип-азаанаң пасхалалған. Полған на араласчының футболказы кистiнде Россия президенті Владимир Владимирович Путиннің сӧстері пазылған: «Россияның кӱзі – пістің істібісте», «Чииттер пістің хазнабыс полча». Cизінгенде, ол сӧстер форумның ӧӧн сағызына уғаа килiстіре полғаннар. «Этнова» чиит улусха наа тыныс, кӱс паза кӧріс пирче. Мында аралазып, олар постың улуғ даа сағыстарын, хорыхпин, чуртасха кирерге ӱгренчелер. Улуғ опыттығ спикерлер, тізең, оларның сағыстарын орта саринзар айландырарға хабасчалар.
Чалахай кӧңніліг араласчыларнаң чоох алызып, мин Асхыстаң килген Гульсара Мамышеванаң танызып алғам. Гульсара пу форумда ӱзінҷі хати араласчаттыр. Пӱӱл ол «Предпринимай» площадкада наа пілістер алған, алындағы чылларда ӧткін хыс пасха кӧстеглерҷе позын сынаптыр.
– Пістің республикада мындағ чахсы форум иртірілчеткенiне уғаа ӧрінчем. Мында піс наа пілістер алчабыс. Спикерлер полған на площадканы хынығ апарчалар паза кӧп тузалығ чӧп пирчелер. Мин Асхыстағы олғаннарға хоза ӱгредіг пирчеткен кінде істенчем. Анда олғаннарға аймах кружоктар апарчам. Че минің пос киреен азыбызардаңар сағыс пар. Аннаңар мин пӱӱл идiнҷектернің киреенең палғалыстығ площадкада араласчам. Мин мында кӧп наа піліс алып алғам. Паза мағаа тузалығ чӧптер пирілген, – теен ачых-чарых кӧңніліг Гульсара.
Гульсара Мамышева форумда чееннерінең хада араласхан. Сайын, Севил, Сенди волонтёр полчаттырлар. Аннаңар ол олғаннарны хайди даа «Этнова» форумнаң таныстырарға сағыс туттыр:
– Мин Асхыстағы олғаннарға хоза ӱгредіг пирчеткен кіндегі «Добро» отряднаң устапчам. Минің чееннерім анда ӧткін араласчалар. Волонтёр полып, олар кічігдеңӧк чахсы киректер идерге, пасхазына полызыға килерге ӱгренчелер.
Пӱӱл форум пір ле кӱн ирткен полза даа, ол постың площадкаларында республиканың паза хазнабыстың аймах пулуңнарындағы чииттерні піріктірген. Ағбанның чиит чуртағҷызы Дарья Канзычакова ідӧк пӱӱл форумда ӱзінҷі хати араластыр. ХГУ-да ікінҷі курста ӱгренчеткен ӧткін студент « Хакасияда чуртирға паза тоғынарға» площадкада араласхан.
– Ирткен чылларда мин «Предпринимательство» паза «Экология» площадкаларда араласхам. Амды постың кӱзін наа кӧстегде сынап кӧрерге чаратхам, – теен Дарья.
Таныхтирға кирек, форумның аймах площадкалары кӱн тооза тоғынғаннар. Чииттер оларда постың сағыстарынаң хынып ӱлескеннер.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
