Оларның аттары ундулбас
10.10.2025
Хабарлар
СВО ветераннары харағай хорбыларын одыртчалар
Матырлар тузы. Харатастың «Чылтыс» паркында «Хакасияның матырлары» проекттің араласчылары, СВО-даң айланмаан чааҷыларны хумартхылап, 30 харағай одырт салғаннар
Пӱӱл кӱскӱзін ӧнетін чаа операциязында араласхан паза араласчатхан чааҷыларға «Хакасияның матырлары» республика проекті тоғынып пастаан. Олар, «Хазна паза муниципальнай устағ» кӧстегҷе хоза ӱгредіг иртiп, наа пілістер алчалар. Ідӧк проект араласчылары регионның халых чуртазында сыбыра араласчалар. Іди пу наада олар Хакасия пазы Валентин Коноваловнаң хада Харатастағы «Чылтыс» паркта, СВО араласчыларын хумартхылап, харағай ағастарын одыртханнар. Хайди таныхтаан регион пазы, ол харағайлар ӧсчеткен тӧлге амғы туста чир-суу ӱчӱн турысчатхан чааҷыларны ундирға пирбестер.
Чоохтирға кирек, 2019 чылдаң сығара Хакасияда «Арығны хайраллап халаалар» тиксі Россия синіндегі чӧрiмҷе илееде ағас одыртыл парған. Ол акция «Экология» нацпроектче иртiрілче. 2023 чылда 50 муң азыра ағас одыртылған, 2024 чылда – 150 муң азыра. Че Харатаста одыртылған харағайлар – ол хумартхы ағастар. Чааҷылар, оларны одыртып, ӧнетін чаа операциязы полчатхан орыннаң айланмаан арғыстарын сағысха киргеннер. Пір кічіг хорбыҷах Харатас городтың матыры Александр Хаменкоға чарыдылған. Аны одыртханнар матырның іҷезі Екатерина Хаменко паза аның ӱс палазы.
– Минің оолғым Александр Орифович контракт хоостыра служба апарған. СВО пасталғанда, ол андар пастағыларның санында парған. Ағаа 21 час полған. Ол халғанҷы тӧреен кӱнін ӧнетiн чаа операциязы парчатхан чирде удурлаан. 2022 чылда 13 хосхарда аның тыны ӱзіл парған, – харах чазын чызып, чоохтаан іҷе.
Килер чылда ефрейтор Александр Хаменкоға чарыдылған харағайахтың хыринда искірігліг чарды хазап саларлар.
– Пу парк-сквернi нааҷылирынҷа проект пар. Прай ниме чахсы полза, килер чылда спонсорлар хабазиинаң Чиңіс кӱніне піс аны чуртасха кир саларбыс. Пӱӱн одыртылған харағайлар ол тоғыстың иң пастағы хаалии тирге чарир, – теен Харатас городтың наа пазы Елена Гопина.
Сом Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
