Сибирь кӱннері – ВДНХ-да
17.11.2023
Хабарлар
Кӧзідіг. Киҷее Москвадағы ВДНХ-да «Россия» чоннар аразындағы кӧзідіг-форумда Сибирьдегі федеральнай округка кірчеткен регионнар кӱннері азылған. Анда Хакасия пазы Валентин Коновалов паза Ӧӧркі Чӧп кнезі Сергей Сокол араласханнар
Сибирьдегі регионнар кӱннерін президенттің СФО-дағы полномочиеліг кізізі Анатолий Серышев асхан, ідӧк мероприятиеде Россия правительствозының кнес орынҷызы Виктория Абрамченко араласхан.
Полған на губернатор позының регионынаң таныстырған. Хакасия пазы республиканың экспозицияларынҷа экскурсия иртірген. Республиканың стенді киҷеегі, пӱӱнгі паза таңдағы чуртастаңар чоохтапча.
Аалҷыларға регион туризмінеңер чарытханнар. Туроператорлар республиканың туризм маршруттарын паза турларын кӧзіткеннер.
Федеральнай тревел-блогерлернең тоғазығлар ирткеннер. Чорыхчылар Хакасиязар хайди чӧргеннеңер чоохтааннар, лайфхактарнаң ӱлескеннер, иң чапсых маршруттардаңар паза ис-пайдаңар искіргеннер, сурығларға нандырғаннар.
Чуртағҷылар Хакасияның иc-пайын VR очки пастыра кӧргеннер. Кӱн тооза хакас чазанҷыхтар тимнирінҷе мастер-класстар ирткеннер. Ағаа хоза, «Россия» кӧзідігде ырҷы Аржан Тодош хайлирға ӱгреткен. «Кӱн сузы» хакас теелбек ансамбльы паза «Архай» этно-группа чыылысхан чонны Хакасияның культуразынаң паза кибір-чозахтарынаң таныстырғаннар: хайлааннар, хакас теелбектер паза спорт ойыннарын кӧзіткеннер, хакастарның тойларынаң паза пайрамнарынаң таныстырғаннар.
СФО регионнарының кӱннерінде Россия Федерациязы субъекттерінің «Сибирское соглашение» регионнар аразындағы экономика палғалызы ассоциациязының (МАСС) 100-ҷі чыылии ирткен. Анда Хакасия пазы Валентин Коновалов араласхан. Ӧӧн сурығ – чоннар аразындағы наа транспорт коридорын тӧстирі паза тилідері. Ол тимір чол пастыра Моол паза Хыдат чирлерінзер сығар.
Сибирь кӱннері 16 – 21 числоларда иртер: 16 ноябрьда – Кемеров облазы – Кузбасс, 17 ноябрьда – Иркутск паза Омск областьтары, 18 ноябрьда – Хызылчар крайы паза Томск облазы, 19 ноябрьда – Алтай крайы паза Новосибирск облазы. Хакасияның кӱні 21 ноябрьда Алтай паза Тува республикаларнаң хада полар. Сибирьдегі федеральнай округка кірчеткен регионнарның стенді «Сибирь здесь» адалча. Ол пістің ағын суғларны, кӧллерні, арығ киині, сіліг чир-чайаанны саблапча. Аалҷылар Сибирьде промышленность, наука, чон чуртазы хайди тилеенінеңер піліп аларлар, мындағы чоннарның культуразынаң паза кибірлерінең танызып аларлар.
«Россия» чоннар аразындағы кӧзідіг-форум 4 ноябрьда, Чон пірікчеткен кӱнде, азылып, 12 апрельде, Хантигірҷі кӱнінде, чабылар. Ол Россия президенті чахиинаң иртче.
Сом РТС сайтынаң паза Хакасия пазы пресс-службазыни
Автор :
Тимнеен Татьяна Тютюбеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
