Хакасия пазы Валентин Коновалов, Москвазар командировкаа чӧріп, Россияның энергетика министрінің орынҷызы Сергей Мочальниковнаң тоғысчы тоғазығ иртірген. Тоғазығда Хакасиядаң паза хазнаның пасха субъекттерінең анылған хара тасты сығарарынаң палғалыстығ сидіксіністі пӧкчең оңдайлар ӱзӱрілген. Хайди піс пілчебіс, 2022 чылның пастағы чарым чылында Сибирьнің паза Ыраххы Востоктың хара тас аныпчатхан регионнарда экспортха сығарҷаң синнер хызырылған. Ол сидіксініс Евросоюз санкциялары кирілгені паза хазнаның прай рыноктарын Азия саринзар кӧстирінде тимір чол мынҷа кӧп таарлағны іскер ызарына тимде полбааны сылтаанда сығысхан.

– Хакасия правительствозы хара тасты экспортха сығарар синін ӧскірерінҷе тоғысты тохтатпин апарча. Санкциялар паза тимір чолҷа таарлағлар тартарынҷа сидіксіністер полза даа, республика паза РЖД хара тасты кидеркі паза іcкеркі саринзар экспортха ызарын ӧскірерге тимделер. Амды ол сидіксіністі пӧкчең тӱзімніг чоллар тілелче. Пістің регионға ол отрасльда тоғыс орыннары хайраллаларын паза бюджетсер налог ахчазы кірерін таныхтапча, – искірген Хакасия пазы пу тоғазығның салтарларынҷа.

Валентин Коновалов Сергей Мочальниковха, Россияның энергетика министерствозы пу сурығны федеральнай синде пӧгерге хабасчатханы ӱчӱн, алғызын читірген.