АЛТЫН АНИРЫ - ЭКОЛОГИЯА ХОРҒЫС ЧОХ
01.12.2021
Хабарлар
Халых ӱзӱріглері. Хакасияда ас саннығ чон чуртапчатхан орыннарда «Алтын анирының экология сурығлары» халых ӱзӱріглері иртті
Халых ӱзӱріглерінде араласханнар: Хакасия пазының орынӌызы Юрий Курлаев, федеральнай паза республиканың толдырығлығ паза закон сығарӌаң ӱлгӱ органнарының кізілері, шорлар, алтын аныпчатхан предприятиелернің, халых пірігістерінің паза регионның Халыхтар палатазының кізілері. Чыылығны Россияның Халыхтар палатазының араласчызы, экология, ибіркі чирні хайраллиры паза туризм тилізі сурығларынӌа комиссия кнезі Ирина Санникова апарған.
Хакасияның чир-чайаан ис-пайы паза экология министрі Владимир Лебедев республикада алтын анирының сидіксіністерінеңер чоохтап пирген. Аның таниинаң, орындағы чуртағӌыларны Асхыс аймаанда алтын анирына пирілген лицензиялар саны сағыссыратча. Чуртағӌылар киртінізінең, алтын аниры суғларны чох итче паза шорларның чуртапчатхан ибіркі чирлеріне ӱрег ағылча, тиксі алза, оларның кибірліг чуртас-культуразына хорғыстығ.
- Амғы туста Асхыс аймаанда чир-чайааннаң кибірли тузаланчаң орында чир ис-пайынаң тузаланарына 22 лицензия пиріл парған. Хакасияның чир-чайаан ис-пайы паза экология министерствозы, аккредитациялығ лабораторияларны тартып, алтын анылчатхан орыннарда суғны істесче. Сыныхтағ иртірчең компетенциялығ прай органнар тартылғаннар, - таныхтаан чооғында Владимир Лебедев.
Кӧстегліг министерство экология сидіксіністерін пӧгер ӱчӱн мындағ чӧптер пирче: чир-чайааннаң кибірли тузаланӌаң орында чир ис-пайынаң тузаланарына наа лицензия пирерге мораторий турғызарға; федеральнай паза регион ӱлгӱ органнарына сыныхтағларны хатығлирынӌа кӱстерні піріктірерге, регион министерствозының сыных-таана Росприроднадзорның улуғ инспекторларын тартып.
Халыхтар палатазы араласчыларының таниинаң, ведомстволар аразында палғалыс чоғылы алтын аныпчатхан предприятиелернің сайбағларын санға аларына хомай теелче. Хакасияның Ӧӧркі Чӧп депутады Василий Шулбаевтің таниинаң, ведомстволарның пірге тоғызы кӧп сурығны пӧгерінің ӧӧн чардығы полча.
Хызылчар крайының экология паза чир-чайааннаң тӱзімніг тузаланарынӌа министрі орынӌызы Юлия Гуменюк халых ӱзӱріглері араласчыларынаң крайда алтын аныпчатханнарны сыныхтирынӌа паза тоғызын тохтадарынӌа опытнаң ӱлескен. Ол экология министерствозының паза пос алынӌа тоғынчатхан эксперттернің хада-пірге тоғызын кӧзідімге ағылған. Прайзы чир-чайааннаң тузаланарынӌа департаменттегі наука-техника чӧбінде тоғынчаттыр.
- Лицензияны пирер алнында пічіктер пу чӧпсер паза орындағы пос устаныс органнарынзар чарадыға ызыл чалар. Крайның прокуроры устаанынаң компетенциялығ органнарның сыныхтағ ӧмезі тоғын ча. Пістің ӧме, сайбағлар ілезіне сығарылза, оларны чох иткенче, алтын аныпчатхан предприятиелернің тоғызын тохтатча. Предприятие парызын чідір сыхсох, тоғызын кӧрілген кирексіністерче апар сыхча, - чарытхан Юлия Анатольевна.
Халыхтар палатазының кнезі Ольга Левченко пістің пӧгінібіс, предприятие тоғызын тохтатпин, оларны кӧрілген кирексіністерні паза синнерні толдырарға кӱстирге киректелчеткеніне хайығ айландырған.
Хакасияның экономика тилізі министрі Виктор Богушевич, тізең, сыныхтағ органнары алтын аныпчатхан предприятиелернің тоғызын тохтадар ӱчӱн чоох тутхан, андада ла бизнестің сын хайии полар паза кирексіністерні толдырып пастирлар.
Россияның тиксі тилекейдегі сас чир-чайааны фондының эксперті Александр Колотов алтын анирында суғларның кірленчеткенінің сыныхтағ салтарларынаң таныстырған. Аның кӧрізінең, лицензияларны пирерін тохтатпаза, суғларның кірленчеткені хызырылбас.
Пӧкчең сурығлар кӧп. Халых ӱзӱріглерінің протоколы араласчыларның сағыс-кӧрістерінең хада регионның ӱлгӱ органнарына ызылар.
Автор :
Анастасия СОЛЕННИКОВА
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
