Чир-суу ӱчӱн турысханнар, дипломнарын даа арачылап алғаннар
02.09.2026
Хабарлар
«Хакасия матырлары» проекттің араласчылары Сергей Сагалаков, Игорь Арчимаев, Юрий Нербышев паза Евгений Еранцев
«Хакасия матырлары». Пу наада «Хакасия матырлары» кадрлар программазының араласчылары диплом тоғыстарын арачылааннар
Пу проект араласчыларының чуртастарынаңар испеен кiзi, олардаңар паспаан газета паза оларны кӧзiтпеен телевидение чох полар, неке. Ирткен чылда Пiлiс кӱнiнде проектте араласчатхан СВО ветераннары, ӱгренҷiлер паза студенттер чiли, iдӧк ӱгредiг столлары кистiне одырғлааннар. Аннаң пасха, олар республиканың ӱгредiг, спорт, культура учреждениелерiнде, регионның иң килкiм предприятиелерiнде пол килгеннер, стажировка ирткеннер паза аймах синнiг устағ-пастағнаң тоғасханнар. Ӱгредiг программазындағы модульлар матырларға иң тирең пiлiс пирерiне кӧрiл парғаннар.
Ирткен неделяда, тiзең, программа араласчыларының иң нандырығлығ тус ирткен – диплом тоғыстарын арачылиры. ХГУ-ның кадрлар квалификациязын кӧдiрер институдында сымзырых. Коридорда ла, чаҷыннарын тудынып, программа араласчылары, диплом тоғыстарын арачылирға тимненчедiп, пазыс чӧргеннер. Экзамен ол экзамен. Пасхазы чоғыл, нинҷе частығда кiзi аны тутча, институт соонаң алай ба улуғланыбысса, iдӧк ле чӱрексiнiстiг паза хорғыстығ.
СВО ветераны Юрий Нербышев программа араласчыларының иң улуғларының пiрсi полча. Аның ӧӧн тоғызы «Ада чир-суубыс арачылағҷылары» хазна фонды, iдӧк ол Асхыс аймаандағы Калининдегi ортымах школада ӱгретчi полча.
– Ӱгретчi ползам даа, диплом арачылир алнында, ӱгренҷiлер чiли, ЕГЭ алнында хайди чӱрексiпчелер, iдӧк чӱрексеем. Ӧӧнiнде комиссия алнында иптiг тудын поларына, оларның сурығларына орта нандырығ пир поларына чочынғам. Халғанҷы хати дипломны 52 частығда арачылаам.
Мин чиитте пӱдiрiг техникумын тоосхам, пӱдiрiгҷi полып iстенгем. Соонаң хонғаным ӱгренген, ол iдӧк ӱгретчi. Оолғыбысты ӱгреткебiзӧк. Ол туста мин Асхыс аймаа устағ-пастаанда завхоз полып тоғынғам, соонаң спорт школазында олох кӧстегҷе iстенгем. Пiр туста ОБЖ ӱгретчiзiне хығырғаннар, аннаңар мағаа школазар тоғынарға парарға килiскен, че аның алнында ӧнетiн ӱгредiг аларға киректелген. Улуғ даа ползам, ӱгренерге парғам. Ам iдӧк килiс парды. Чӱрексiнiстiг дее полза, кӧңнiм уғаа чахсы. Арғыстарнаң удур-тӧдiр хабазысчабыс, чӱректерiбiстi амыратчабыс. Пiр чыл ӱгренiп, позыма кӧп наа ниме пiлiп алғам, ол мағаа мыннаң мындар туза поларында iкiнҷiлебинчем, – ӱлесче сағызынаң проект араласчызы Юрий Алексеевич.
Юрий Нербышевтiң диплом тоғызы табығларға чарыдылған. Пу тема ағаа чағын. Ирткен чылларда ол табығ комиссиязының кiзiзi пол турған, аннаңар аны ӧтiре пiлче.
Программа араласчызы Евгений Еранцевтi ӧӧнiнде чииттер чахсы таныпча поларлар. Евгений Анатольевич республика саарбахтарынаң удаа тоғазығлар иртiрче, чииттернi тӧреен чиріне хынарға кӧнiктiрче, чарыдығлығ тоғыс кӧп апарча. Амды ол «Пастағыларның чӧрiмi» олғаннарның халых организациязының ӧӧн аппарадында iстенче.
– Позымның диплом тоғызымда чииттернiң ағырсымнығ сурығларын iстескем. Пу минiң пизiнҷi дипломым полар. Пастағызын мин зоотехникке ӱгренгем, анаң – зооинженерге, чааҷы киреене, соонаң – юридическай кӧстегҷе, амды, тiзең, хазна паза муниципальнай устағҷаа. Сағынчам, кiзее ӱгренерге хаҷан даа орай нимес, ӧӧнi ол пiлiснең соонаң тузаланары, – чоохтапча Евгений Еранцев.
Сергей Сагалаков Асхыс аймааның ӧӧн имнег туразында анестезиолог-реаниматолог полча. Проект хоостыра Сергей Сагалаков Хакасияның хазых хайраллаҷаң министерствозы устағҷыларынаң, ӧӧн имнег учреждениелерiнiң ӧӧн имҷiлерiнең тоғасхан. Диплом тоғызы имнег киреенең палғалыстығ.
Дипломны 20 кiзi арачылаан, полғанына ла 10 минута пирiлген, ол санда комиссия араласчыларының сурығларына нандырары. Комиссияда Хакасия пазының пастағы орынҷызы Татьяна Курбатова, ХГУ ректоры Татьяна Краснова, Хакасия пазы аппарады устағҷының орынҷызы Ирина Емельянова паза даа пасхазы полғаннар.
Проекттiң ӧӧн пӧгiнi регионға кадрлар резервін тимнеп салары полча. Ӱгредіг тӧрт модульҷа ирткен: пастағызы – хазна политиказы паза хазна устаа, ікінҷізі – экономика паза финанстар, ӱзінҷізі – хазна паза муниципальнай устағ, тӧртінҷізі – саннығ экономика.
Дипломнар алған соонда проект араласчылары кадрлар резервіне кірерлер, аннаңар кураторлар паза наука устағҷылары оларнаң палғалыс тутчалар паза мыннаң мындархы тоғыстың чолын табарға полысчалар. Хай пірее араласчылар тоғысха киріл парғаннар.
Ӧнетiн чаа операциязы ирткен орыннарда пу матырлар постарын турыстығ тудынғаннар, пiр чыл ирткен ӱгредiгде iдӧк сыдамахтарын кӧзiткеннер. Чир-суун арачылааннар диплом тоғыстарына даа сыданғаннар.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
