Чайаачы чииттер чон алнында марығластылар
30.07.2025
Хабарлар
Евгения Майнагашева фестивальны пайрамни асхан
Фестиваль. Ағбандағы ипподромда республиканың чайаачы чииттерiнiң «ХанБасс» фестивальы пӱӱл 14-ҷi хати иртiрiлдi
Фестивальның тӧстегҷiлерi Хакасияның чииттер политиказы паза халых тилiзi министерствозы, «Чииттернiң стратегия пастағларының паза проекттерiнiң кiнi» фонд паза «Хакасия» ТВ кiнi полчалар. Ол чииттернiң чайаачызына хабазар, республикада электроннай музыканы тилiдер паза пос произведениелерiн пасчатхан авторларға полызар пӧгiннең иртiрiлче.
«ХанБасс» фестивальның тархыны 2011 чылдаң пасталча, андада ол «SUNBASS» тiп адалған паза Жемчужнай аалдағы «Шира кӧл» курортта ирткен. Соонаң фестивальның ады нинҷе-де хатап алысхан. 2024 чылда электроннай музыка фестивальы «ХанБасс» аттығ пастағызын на Харатаста иртiрiлген. Пӱӱл ол Ағбанзар айланған. Таныхтирға кирек, аның номинацияларының саны хозыл парған. 16 – 35 частығ чииттер «Трек», «Сет», «Сарын», «МС», «Теелбек» кӧстеглерҷе кӱстерiнең сынасханнар. Iдӧк «Хакасияның поғдархазы» номинация чарлалған, анда 35 час ас парғаннар араласханнар. Пу номинацияда фестиваль наа ла иртiрiлiп пастабысханнаң аның тилiзiне улуғ хозым иткен кiзiлернi таныхтааннар.
Пӱӱл фестивальда аралазарға сағынчатханнарнаң тиксi Сибирьдең 100 азыра сурыныс пiчии кiрген. Оларның санынаң финалисттер табылғаннар. Ана олар «ХанБасстың» ӧӧн мероприятиезiнде сценаа сыхханнар. Фестиваль араласчыларын паза аалҷыларын Хакасияның чииттер политиказы паза халых тилiзi министрi Евгения Майнагашева удурлаан:
– Пӱӱн пiстiң уғаа танығлығ мероприятиелер иртчелер. «Этнова» чииттернің чоннар аразындағы этно-туристическай форумы ирт парды, «ХанБасс» фестиваль аның узарааны полча. Пiс мында иң ӧткiн, иң чайаачы, пiр дее нимедең чалтанмас чииттернi чыып алғабыс. Оларның тоғыстарын иң турыстығ жюри паалир. Iзенчем, марығ араласчылары постарын чахсы кӧзiдерлер, фестивальда, тiзең, сынап «iзiг» полар.
Фестивальның финалисттерiн жюри паалаан, аның санына «НТВ» телеканалның «Ты супер!» проектiнiң чиңiсчiзi Денберел Ооржак (Тыва), «От ыры-2025» этническай эстрада марииның чиңiсчiзi Дулма Сунрапова (Бурятия), ырҷы, хайҷы, аймах марығларның паза фестивальларның араласчызы паза чиңiсчiзi Аржан Тодош (Хакасия), ырҷы Татьяна Балахчина (Хакасия) паза «ХанБасс» фестивальның ирткен чыллардағы чиңiсчiлерi: DJ FILL, ALEX LORENSSO (Алексей Кичеев), DJ SILVER, SMELAYA паза пасхазы даа кiргеннер.
Халғанҷы чардығында араласчатханнарның санынаң кӧрiгҷiлернiң кӧңнiне кiргеннер адалғаннар, оларның ӱчӱн ӱн пирiс «ХанБасстың» сайтында ирткен.
«Трек» номинацияда электроннай музыка пасчатханнар араласханнар, оларның тоғыстарын студияда искеннер, аннаңар фестиваль пасталарына оларның аразында чиңiс тутхан кiзiнiң ады пiлдiстiг полған. Пастағы орында VYACHESLAV SHEMCHUK «SECRET KHAN» (Ағбан город) произведениезiнең пол парған.
Пасха номинацияларда финалға сыхханнар чайаачыларын кӧрiгҷiлернiң алнында толдырарға кирек полғаннар. «Сет», «МС», «Теелбек» номинациядағыларға сценада пiр саңай тоғынарға кирек полған. Оларның пiреезi марығ алнында удур-тӧдiр кӧрбеен дее полғаннар. Жеребьёвка ирткен соонаң, диджейлер, теелбек салчатханнар, «эм-си»-лер прай устарын кӧзiдерге кӱстенгеннер. Iдӧк «Сарын» номинациядағылар кӧрiгҷiлернi чайаачыларынаң ӧрiндiргеннер. Таныхтирға кирек, марығның пу кӧстеенде иң кӧп араласчы полған, оларның аразында хакас тiлiнең сарнааннар парох полған. Арис & Атай дуэт «Iҷем», республиканың чииттер политиказы паза халых тилiзi министерствозының тоғынҷылары Кит feat. Dauddin ӧменең «Минiң Хакасиям» паза Ширадаң килген ХАЙДЖИ ӧме «ALTYN» сарыннарны толдырғаннар. Iдӧк Минсуғдағы SPIRIT BAND ӧменi истерге чапсых полған, олар сарынның кӧӧн кӧг тирiглерiнең постары ойнап толдырғаннар. Кiзiлернiң хайиин саксофоннаң ойнаан хыс тартхан.
Фестивальда iдӧк кӧрiгҷiлерге аймах сыйыхтар тимнелген. Оларның аразында улуғ нимес марығлар иртiрiлген паза иң талааннығларына «ХанБасстың» арғыстары полчатхан компаниялардаң сыйыхтар читiрiлген.
Чайаачы чииттернiң пайрамы хынығ ирткен. Марығ араласчылары ӱс час азыра кӧрiгҷiлернiң кӧңнiн кӧдiргеннер. Оларның кӱстенгеннерi тикке ле иртпеен тiп таныхтирға чарир. Прай финалисттер тоғыстарын кӧзiткен соонаң, жюри салтарлар идерге парыбысхан. Ол туста кӧрiгҷiлер алнында фестивальның ирткен чылларындағы чиңiсчiлерi чайаачыларынаң ӧрiндiргеннер. Кӧбiзi «ХанБасстың» аалҷызы Денберел Ооржактың сценаа сығарын чидiкпин сахтаан. Россия синiндегi проекттернiң чиңiсчiзi оларны ӱр сахтатпаан, сарынын сыйлаан.
Ӱр ле полбаанда, жюри «ХанБасс-2025» фестивальның чиңiсчiлерiн адаан. «Сарын» номинацияда «На Марсе жаришка» ооллар ӧмезiнiң «Танцуй» сарыны пастағы орынға турысхан, «Сет» номинацияда Daffy диджей чиңiсчi полыбысхан, «МС» номинацияда Никита Ermakov утып алған, «Теелбек» номинацияда LAMBRETTA BALLET ӧме иң артых тiп адалған. Таныхтирға кирек, прай тӧрт номинацияда хызылчардағылар чиңiсчiлер полыбысханнар.
Кӧрiгҷiлер ӱн пирiзiнде чиңiс тутханнар онар муң салковай алғаннар, марығ номинацияларында утып алғаннарның полғаны ла 65 муң салковайны холға кирген. Ахчалығ сертификаттарны оларға Евгения Майнагашева читiрген. Пӱӱл чиңiстi холға кир полбаан чайаачы чииттернi ол килчеткен чылда электроннай музыка фестивальында хайди даа хатап аралазарға хығырған.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
