Аймах нациялығ сӧбiренiң часказы
27.05.2026
Хабарлар
Цырен Димчиков
«Хакасия матырлары». Ағбандағы ЗАГС тоғынҷылары, кӧп палалығ Цырен паза Виктория Димчиковтарны сӧбiреде пизiнҷi пала тӧреенiнең алғыстап, ыңааҷахтың пастағы пiчиин сӧбiре пазына читiргеннер
Димчиковтарның сӧбiрезi кӧп палалығ полчатханынаң на нимес, че iдӧк сӧбiре аймах нацияларнаң тӧстелгенiнең кiзi хайиин тартча. Пӱӱл, хаҷан хазна президентi Владимир Путин 2026 чылны Россияның чоннары пiрiкчеткен чылы тiп чарлаанда, оларның сӧбiрелерiне хайығ салғаны килiстiре пiлдiрче. Мында ирепчiнiң чуртас чолы ла нимес, iдӧк сӧбiре кибiрлерi, улуғлазы паза чахсы пiлiсчеткенi тӧлдең тӧлге читiрiлчеткенi халых чонға кӧзiдiм полча.
Цырен Дамбаевич паза Виктория Курбанбаевна 2007 чылда Ағбанда хоных хонғаннар. Сӧбiре пазы национальнозы хоостыра бурят полча. Ол Томсктағы устағ паза радиоэлектроника системаларының хазна университедiн тоосхан. Цырен право хайраллаҷаң органнарда илееде чыллар iстен салған, МВД ветераны паза тынағдағы полиция майоры полча. Ӧнетiн чаа операциязына 2024 чылда пос кӧңнiнең парыбысхан. Ибзер айланғанда, «Хакасия матырлары» регион программазында аралазарға паза, хазна службазында тоғынып, регионға туза ағыларға чарат салған. Iдӧк «Бурятский национальный культурный центр «Сагаан Дали» Хакас региондағы хазна организациязының устағҷызы полча.
Виктория iдӧк пӧзiк ӱгредiглiг. Ол Н.Ф.Катановтың адынаң Хакас хазна университедiн «Чонның хоос чайаачызы» специальностьча тоос салған. Викторияның iҷезi хакас полча, пабазы – узбек. Викторияны хакас эстрадазында махтапчалар, ол аймах вокал марығларында чиңiсчi полча. Регион паза чоннар аразындағы марығларда лауреат, дипломант полған, Гран-при алған паза даа пасха сыйыхтарға турысхан. Амғы туста С.П.Кадышевтiң адынаң чон чайаачызының национальнай кiнiнiң кибiрлiг хакас культура пӧлиинiң устағҷызы полып тоғынча. Виктория Курбанбаевна хакас культуразынаң палғалыстығ мероприятиелернi тимнирiнде паза иртiрерiнде араласча. 2022 чылда хакас тiлiн хайраллирына, тилiдерiне хозым ӱчӱн Хакасия пазының алғыстазынаң сыйыхтатхан.
Димчиковтарның ынағ сӧбiрезiнде тӧрт оол: 18 час толдыр салған Жарал, 16 частығ Тамир, 12 частығ Алдар, олар прайзы национальнай гимназияда ӱгренчелер. Кiчiг оол Арсалан 8 частығ, школада ӱгренче. Iҷе-паба палаларының чидiглерiне паза ӱгренiске хайығ салчатханына поғдархапчалар. Тун ооллары Жарал – «Фиатлон для старшеклассников» тиксi Россия синiндегi олимпиадада сыйыхтығ орын алған, андағ чиңiс ӱгренҷiлерге, вузтарзар кiрчетсе, льгота пирче. Хайди таныхтаан сӧбiре пазы, ол школада ӱгренчеткенде, тенниснең айғасхан, ӱзiнҷi оолғы Алдар iдӧк тенниснең айғасча. Олар пабазынаң теннис удаа ойнапчалар. Цырен Дамбаевич оолларынаң хада футбол паза волейбол сыбыра ойнапча. Ӱр ниместе сӧбiреде иркеҷек хызыҷах Нарана тӧреен.
Кӧп палалығ паза аймах нациялығ Димчиковтар сӧбiрезiнде пизiнҷi пала тӧреенi Ағбандағы ЗАГС пӧлиинде санға алылған. Паланың пастағы официальнай пiчии часкалығ паза ӧрiнiстiг кӧңнiлiг пабаа пирiлген.
– Хайхастар полча паза сағынған сағыстар толча, анзына пiс прай сӧбiренең киртiнчебiс! Амды пiстiң, нымахтағы чiли, тӧрт оол паза иркеҷек хызыҷах! – кӧңнiнең ӱлескен Цырен Дамбаевич.
Мындағ ынағ сӧбiреде хаҷан даа хыныс паза паарсас полча. Ирепчi чахсы пiлiзiп чуртапчалар, палаларын турыстығ ӧскiрерге кӱстенчелер. Димчиков ирепчi палаларын ӧскiрерiнде пiр кӧрiске паза пiр чӧпке тудынча. Иркелерiн ӧскiрерiнде сӧбiренiң улуғ тӧлi хабасча, аға-ууҷалар пархаларына хыныстарын читiрчелер. Сӧбiре чир-чайаанда тынанарға паза чир-суубысча чорыхтарға чӧрерге хынча. Чорыхтарға, экскурсияларға паза чир-суубыстың ызых чирлерiнҷе чӧрерi сӧбiре кибiрлерiне айлан парған паза андағ чорыхтар сӧбiренi пик паза ынағ итче.
Димчиковтарның чапсых сӧбiрезiнде хакас, бурят паза узбек чоннарының кибiрлерi палғалыс парғаннар. Оларның палалары кӧп тiллiг паза культуралығ сӧбiреде ӧсчелер. Кӧп нациялығ сӧбiре кӧзiдiм полча, хайди аймах культуралар удур-тӧдiр пайытчалар паза туза ағылчалар. Сӧбiреде прай ӱс чонның ӱлӱкӱннерiн таныхтапчалар. Иң танығлығ ӱлӱкӱннер: Сагаалган (буряттарның Наа чылы), Чыл пазы, Навруз (узбектернiң часхы ӱлӱкӱнi). Ол чоннарның кибiрлерi олаңай чуртаснаң палғалыс парғаннар: аалҷыларны удурлиры, улуғ тӧлнi улуғлиры, чир-чайааннаң палғалыс, сӧбiре кибiрлерi. Оларның сӧбiрезi турыстығ кӧзiдiм полча, хайда кибiрлернi улуғлааны паза наа нимее азых полғаны сӧбiре культуразын тӧстепче.
Оларның сӧбiрезiн хайхастығ тiп чоохтаза, алҷаас полбас, анда палалар хыныста паза улуғласта ӧсчелер. Iҷе-паба, прай нименi чӧптезiп, хада-пiрге тудынып итчелер паза хайдағ даа пастағларда удур-тӧдiр чӧлег полчалар. Цырен паза Виктория Димчиковтар сӧбiрезi чиит тӧлге чахсы паза турыстығ кӧзiдiм полча. Оларның сӧбiрезiне тоозылбас часка паза чарых кӱннер алғапчабыс. Ынағласта, пiлiзiсте паза паарсаста хаҷан даа чуртазыннар!
Сом r-19.ru сайттаң
Автор :
Тимнеен Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
