Наа цех азылғаны наа оңдайлар пирче
20.05.2026
Хабарлар
«Дух Хакасии» бренд аң-хус идінең тимнелген чиисті сығарча
Ас-тамах сығарызы. Хакасия пазы Валентин Коновалов «Дух Хакасии» кооперативтiң Ағбан пилтiрi аймаандағы Тазоба пилтiрi аалда азылған наа цеғында пол килген
«Дух Хакасии» – аң-хус идiнең паштеттер, салығлаан иттер, колбасалар паза пасха даа татхыннығ чиис тимнепчеткен бренд. Иттi олар Алтайдағы сыыннарны ӧскiрчеткен фермалардаң садысчалар. Кооперативтiң кнезi Алёна Аладинаның таниинаң, брендтiң тархыны 2023 чылдаң пасталған. Андада олар, пос киреен азып, сыын, ах киик иттерiнең консервалар тимнирiнҷе тоғысты пастааннар. Брендтi iди адир сағыс ыстаң тӧреен. Аннаң татхыннығ чиистi сығарарында тузаланчалар. Пӱӱл кооператив республикадағы Хакреспотребсоюз пiрiгiске хозылған.
Пастап брендтiң цеғы Ағбанда орныххан, че ол улуғ полбаан. Аннаңар устағ-пастағ Хакреспотребсоюзсар орын сурап айланған, Тазоба пилтiрiнде орын табылған, аны пирерге чарадығ алылған. Пiрiгiске кiрчеткен кооперативтерге сығарыс орыннары ниик арах паанаң арендаа пирiлчелер. Цехта Хакреспотребсоюз кӱзiнең тиксi тыхтағ тоғыстары апарылған, кӧзенектер, чылығ пирҷең система паза пасха даа нимелер нааҷылалғаннар, iдӧк тураның ибiркiзi иптелген.
Паза пiрiгiс брендке хазна хабазиин аларында полысхан. Оларға «Хакасияның аал хонии-промышленность комплексінiң тилiзi» хазна программазына кiрчеткен республиканың экономика тилiзi министерствозының «Потребительлер кооперацияларының тилiзi» проектче ахча пирiлген.
Наа цехты азарында iдӧк Хакасияның экономика тилiзi министрi Роман Ковтун, аның орынҷызы Александр Мяхар, «Сибирьнің КФХ-лары паза АПК-зы» ассоциацияның устағҷызы Андрей Попков паза даа пасхазы араласханнар.
Аарлығ аалҷыларны Хакреспотребсоюз пiрiгiстiң кнезi Александр Мальцев паза «Дух Хакасии» кооперативтiң кнезi Алёна Аладина удурлааннар. Александр Алексеевич республика устағҷызына потребительлер кооперациязының чидiглерiнеңер чоохтап пирген. Пӱӱнгi кӱнде андар 18 кооперация кiрче, ирткен чылда оларның материально-техническай базаларынзар инвестицияларның синi 19,3 млн салковайға тиңнелген.
Алёна Юрьевна «Дух Хакасии» брендтеңер чоохтаан. Ол тилiпче паза сығарызын алғыдарға кӱстенче. Олар сығарчатхан ас-тамахты республиканың садығ тураларында табарға паза сайттары пастыра садызарға чарир. Анда сыын паза ах киик идiнең хурутхан тиин хады, ырғайдаң варенье, палых оды, тайға хузуғы, мискелер аралалған паштеттер, ӱр пызырылған ит, кӧчедең, гречкадаң, горохтаң ит арали кашалар, полуфабрикаттар, таңах паза пӱдӱрчӱн, сыын, ах киик идiнең колбаса паза пасха даа аймах ниме-нооны табарға чарир.
Ӱр ниместең кашаларны, иттернi наа упаковкаларға салчалар. Ол фольгалығ дой-пак пакеттер. Сӱлейке банкалар, оларны ырах апарарға кирек полза, удаа оодыл парчалар. Мында, тiзең, андағ читпес чоғыл. Бренд сығарчатхан продукциязын прай даа Россияҷа сатча нооза.
«Дух Хакасии» ӱр нимес тее тоғынчатхан полза, амғы тусха чахсы чидiглерi пар. Олар аймах кӧзiдiглерде, фестивальларда, марығларда араласчалар, сыйыхтығ орыннарға турысчалар.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
