ГРАНТТАР СИНІ ӦСКІРІЛДІ
24.05.2023
Хабарлар
Ӱлгӱ. Киҷее, сілкер айының 23-ҷі кӱнінде, Хакасия пазы Валентин Коноваловтың устаанынаң республика правительствозының теестегі чыылии иртті
Хакасия правительствозының кізілеріне ӱс чарадығны алыбызарға паза алты кӧстегҷе пӱӱнгі тоғыстаңар сан пирісті истіп аларға киректелген.
Республика пазы пастағы сӧсті Хакасияның национальнай паза территориальнай политика министрі Лев Сафьяновха пирген. Ол ікі сурығҷа чоох тутхан: пастағызы «Халыхтарның орындағы пос устанызынаң (ТОС-наң) тоғынарынҷа Хакас Республиканың иң артых муниципальнай пӱдіcтің устағ-пастаа» республика мариин иртірҷең оңдайларға паза бюджеттер аразындағы трансферттерні ӱлестірер методикаа алызығлар киреріне теелген, ікінҷізі – ТОС-тарның халых пастағларына хабазар пӧгіннең Хакасияның гранттарын пирҷең оңдайларынаңар чарадыға алызығлар киреріне.
Хандых айында муниципальнай пӱдістер аразында «ТОС-тарнаң тоғынарынҷа Хакасияның иң артых муниципальнай пӱдізінің устағ-пастаа» республика марии алтынҷызын чарлалар. Марығда ӱс номинация кӧрілген: город округтарының иң артых муниципальнай пӱдістің устағ-пастаа; муниципальнай пӱдістің кіні полчатхан иң артых город-аал; пасха город-аал устағ-пастаа. Пастағы ікі номинацияда чиңісчі паза ікі сыйыхтығ орын полары кӧрілче, халғанҷызында – чиңісчі паза 2-ҷі паза 3-ҷі орыннар ікілер полар. Сыйыхха пирілген ахча ТОС-тарның проекттерін чуртасха киреріне позыдылар. ТОС-тарның пічікке кирілгені санға алылбинча.
Пічікке кирілген ТОС-тарға алынҷа марығ иртірілче. Хакасияда 234 ТОС-тың 16-зы ла пічікке кирілгеннеңер искірген Лев Александрович. Марығ араласчыларына турғызылчатхан кирексініcтерге искіріглер саринаң азых полғаны паза Россия президенті таныхтаан кибірліг паза чонға тузалығ кӧстеглерге тудынары кирілген. Гранттар иң артых 10 ТОС-ха пиріл турар. Марығ хандых айының 1-ғы кӱнінде чарлалар. Сыйых чыындызында 4 миллион салковай кӧріл парған, ол санда 2 миллион салковай Россия президентінің гранттар чыындызынаң позыдылар. Чиңісчілерге 400-ер муң салковай пирілер. ТОС-тарға ибіркі чирні иптирінең, тынағ орыннарын чахсыландырарынаң, хазых чуртасты, физическай культураны паза спортты сабландырарынаң, олғаннарнаң паза чииттернең тоғынарынаң палғалыстығ проекттерні чуртасха кирерге чарадылар.
Хакасия правительствозының кізілері ікі сурығнаң чарасханнар. Валентин Коноваловтың кӧрізінең, чуртағҷыларны орындағы пос устаныстың сурығларын пӧгеріне тартханы республиканың тиліс стратегиязын чуртасха кирерге уғаа чахсы хозым полча, ол ідӧк Россия президентінің чахығларын чуртасха кирерінең палғалыстығ. Пӱӱл город-аалларның чон чыылысчатхан орыннарын иптиріне тиксі хабазығ 20 миллионнаң 40 миллион салковайға теере ӧскірілген. Ол ибіркі чирлерні иптирінҷе сағыстарны алғыдарға чахсы оңдай пирер. Аннаң пасха, тӱрчедең «Городтағы осхас истіг оңдайлар» федеральнай проектке 2024 чылда кірҷең орыннарны таллирынҷа ӱн пирері тоозылар. Чуртағҷыларға пілерге кирек, хайдағ орыннар ӱчӱн чуртағҷылар ӧткін ӱн пирерлер, оларға хайығ айландырылар.
Халыхтар араласчатхан паза пір кӧcтег – министерстволардағы халых чӧптері. Республика пазы оларның тоғызын айныдар пӧгіннең пірге чыылығ иртірерге чахаан, хайда палғалысты тыыдар паза тоғысты чахсыландырар оңдайлар ӱзӱрілер.
Республика правительствозы «Агростартап» программаҷа паза аал хонии кооперативтеріне субсидияларны пиреріне алызығлар кирерге чаратхан. Хазна хабазии «Кічіг паза ортын пос кирее паза идінҷектің пастаана хабазары» нацпроектче читірілче. Хакасияның аал хонии паза ас-тамах министрі Сергей Труфанов кирілчеткен алызығлардаңар искірген:
– 2023 чылда хабазыға 58 миллион 356 муң салковай кӧрілген. Регионда ахча ӱс кӧстеге позыдылча: аал хонииның компетенция кіні тоғызына – 5 миллион 51 муң салковай, кресен-фермер хоныхтарын тӧстиріне, тилідеріне паза «Агростартап» грантын пиреріне – 32 миллион 931 муң салковай (2019 – 2022 чылларға «Агростартап» гранттарын пиреріне тиксі 129 миллион 815 муң салковай позыдылған), ідӧк аал хонии кооперативтеріне субсидия пиреріне – 20 миллион 374 муң салковай.
Компетенция кінінің тоғызына кӧрілген ахча тооза тузаланылған. «Агростартап» грантын аларынҷа марығда 19 араласчыдаң 8-і грантты алар. Тӧрт аал хонии кооперативіне – «Боградский», «Светлый», «Орджоникидзевский» паза «Бондаревский» – араласчылардаң паза чуртағҷылардаң ниме-ноо садысхан ӱчӱн 8 миллион 592 муң салковай ызыл парған. Хабазығ полған на кварталда пирілче.
Алызығлар хоостыра «Агростартап» грант иң кӧп 5 миллион салковай пирілген полза, ам аның сині 7 миллион cалковайға читірілер. Аның синін Хакасияның аал хонии паза ас-тамах министерствозы чарат турар. Аал хонии кооперативтеріне, тізең, 10 миллион орнына 20 миллион салковай аларға чарадылар.
Чарадығлар алылған соонаң кӧстегліг министерство-ведомство устағҷылары паза кізілері 2023 чылда пос киреенең ӱлгӱ хайызығларының тиліс чолынаңар, Хакасияның ағас хонииның амғы паза тиліс оңдайларынаңар, ӱгредіг учреждениелерінің хазна сыныхтағларын иртіреріне тимдезінеңер, электроннай садығ ачығын тилідердеңер, республикада чииттер политиказын чуртасха кирерінеңер паза пасха искіріглернең таныстырғаннар.
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
