ХАКАС НЫМАХТАРНАҢ МОСКВАДА ТАНЫСХАННАР
24.03.2023
Хабарлар

Олғаннар чидии. Россияның пасха хан киректерінҷе министерствозының Москвадағы чоннар аразындағы хайызығлар хазна институдында (МГИМО) «Хакасияның нымахтары» чыындының презентациязы ирткен
МГИМО хазнабыстың иң улуғ вузтарының пірсі полча. Анда Хакасиядаң килген ӱс ӱгренҷіні чеестееннер. Олар «Россия паза тилекей чоннарының нымахтары олғаннар кӧрізінең» чиит хоосчыларның чоннар аразындағы марииның чиңісчілері санына кіргеннер. Есения Ондрак, Елизавета Суркова паза Тадина Иптышева «Хакасияның нымахтары» книгаа хоостар тимнееннер. Пайрамнығ иирде тоғыстары ӱчӱн олар пӧзік сыйыхтарнаң таныхтатханнар – «Чиит хоосчы-дипломат» медальнаң.
Жюри Хакасиядағы пасха тӧрт марығ араласчызының тоғыстарын пӧзік паалаан. Іди лауреаттар санына кіргеннер: Кира Кыржинакова, Анастасия Чичинина, Анита Тохтобина паза Анастасия Чербакова.
«Хакасияның нымахтары» книга 2022 чылда хакас паза орыс тіллерінең чарыхха сығарылған. Андар чурт оңдайларынаңар паза аң-хустаңар 11 хайхастығ нымах кирілген. Чыындыны сығарарына ахча республика бюджедінең позыдылған. Тиражы – 2 муң экземпляр.
Хакасия пазы Москвазар тоғыс чорығы тузында чиит хоосчыларны сыйыхтирында араласхан. Ол «Хакасияның нымахтары» улуғ чайаачы ӧме тоғызының салтары тіп таныхтаан. Книганың тӧстегҷізі Евгения Тороковадаң пасти, ол архивтердең хакас чонның иң саблығ нымахтарын таллаан, хоосчы хызыҷахтарның тоғызынаң тоозып.
– Хоостарың сылтаанда пу книга пос оңдайлығ, уғаа чапсых паза хынығ пол парған. Хакасия правительствозының, позымның паза республика чуртағҷыларының адынаң сірерні паалап полбас тоғызыңар ӱчӱн алғыстапчам. Наа чайаачы чидіглер алғапчам! – чоохтанған Валентин Коновалов.
Аның таниинаң, Хакасияның культура-тархын пайын хайраллиры республика правительствозы тоғызының ӧӧн кӧстеглерiнің пірсі полча. Ӧсчеткен тӧлні тӧреен тілін паза культуразын хайраллирға ӱгредеріне полған на кізі хозым ит полар оңдайлығ.
Хакасия пазы ідӧк марығ тӧстегҷілеріне алғызын читірген. Улуғ паза кирек тоғыстарыңа чон чахсы ӱндессін тіп таныхтаан ол.
Ідӧк марығ араласчыларынзар МГИМО-ның чииттер политиказынҷа проректоры Станислав Суровцев паза марығ тӧстегҷізі, илҷі, Россия дипломаттары ассоциациязының кнес орынҷызы, «Полар тустың дипломаттары» олған халых пірігізінің президенті Валерий Егошкин айланғаннар.
«Хакасияның нымахтары» чыындының тӧстегҷізі, Хакасияның тархын, литература, тіл наука-істезігліг институдының улуғ наука тоғынҷызы, филология наукаларының кандидады Евгения Торокова ідӧк пайрамда араласхан. Паза книга презентациязына «Кӱн чахайағы» ансамбль ӧнетін кил парған, чыылысхан чонны чайаачызынаң ӧріндірген.
Таныхтирға кирек, «Хакасияның нымахтары» «Россия паза тилекей чоннарының нымахтары олғаннар кӧрізінең» чоннар аразындағы марығның салтарынҷа сығарылған пайрамнығ книга полча. Ол сығарылған онынҷы чыынды. Марығ 2014 чылдаң иртiрiлче. Пу тусха анда 25 хазнадаң 40 муң азыра чиит хоосчы араласхан.
Пӱӱл МГИМО-зар хазнабыстың 20 регионынаң олған килген. Оларның санында – 40 чиңісчі паза 15 лауреат.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде