МАТЫРНЫҢ ХОЛА БЮСТЫ – АҒБАНДА
11.01.2023
Хабарлар
Россияның Матыры Аймир Миягашевтің
хумартхы бюстынзар чааҷылар сабаллығ гирлянда апарчалар
Хумартхылас. Ағбанда тимір чол вокзалы алнындағы ачыхта орныхчатхан «Кизек чаалазығларда чуртастарын пир салған Хакасияның оолларына» хумартхы тас хыринда Россияның Матыры Аймир Миягашевтің бюсты пайрамни азылған
ТИМІР ЧОЛ ВОКЗАЛЫ АЛНЫНДАҒЫ АЧЫХТА ЧОН АЗЫНАДА ЧЫЫЛЫС ПАРҒАН. КІЗІЛЕР ХОЛЛАРЫНДА ЧАХАЙАХТАР ТУТХАННАР. ИСНЕҢ ЧАБЫЛҒАН ХУМАРТХЫ ТАС ХЫРИНДА ААРЛАСТЫҒ ХАДАҒДА АВТОМАТТЫҒ ЧААҶЫЛАР ТУРҒАННАР. ЧОН АРАЗЫНДА ХАКАСИЯ ПРАВИТЕЛЬСТВОЗЫ КІЗІЛЕРІ, ӦӦРКІ ЧӦП ДЕПУТАТТАРЫ, АЙМАХ ХАЛЫХ ПІРІГІСТЕРІНІҢ КІЗІЛЕРІ ПОЛҒАННАР. «КИЗЕК ЧААЛАЗЫҒЛАРДА ЧУРТАСТАРЫН ПИР САЛҒАН ХАКАСИЯНЫҢ ООЛЛАРЫНА» ХУМАРТХЫ ТАС ХЫРИНДА СТРОЙДА ЮНАРМЕЕЦТЕР ТУРҒАННАР.
Хайди искірген мероприятиенің ведущайы, мындағ олаңай нимес, сидік туста Ада чир-суубысты арачылирға прай чоныбыс турыбысча. Украинада ӧнетін чаа операциязы иртірілчеткен туста гвардияның ефрейторы Аймир Миягашев полған чааҷылар ӧмезі кӧп кізіліг ыырҷының командазына урун парған. Хорғыстығ чаалазығ пасталған. Россияның чааҷылары аразынзар холнаң тастаҷаң граната учух килген. Ол чара чачыраза, пістің кӧп чааҷы чат халарҷых. Аймир Миягашев, ӱр дее сағынмин, граната ӱстӱнзер чадыбысхан. Iди ол, позының чуртазын пиріп, кӧп арғызын ӧлімнең ал халған.
Россия президенті Указынаң, чаалазығда махачызын кӧзідіп, позына айабин, арғыстарын ал халған ӱчӱн, гвардияның ефрейторы Аймир Евгеньевич Миягашевке Россия Федерациязының Матыры иң пӧзік ат пирілген (ӱреен cоонда).
Хакасия пазы Валентин Коноваловтың чахиинҷа матыр чир-суғҷыбыстың бюстын тимнирге чарадығ алылған. Аймир Миягашевтiң бюстын саблығ скульптор Михаил Баскаков чайаан.
Аның соонда сӧс республика пазы Валентин Коноваловха пирілген.
– Матырның чаалазығда кӧзіткен махачызы хаҷанға даа піснең хада халар. Арғыстарының чуртазын ал халарынаң аарлығ ниме чоғыл. Аймир оларны ла арачылабаан, ол пісті, полғаныбысты ла арачылап, чуртазын пир салған. Украина чоны – піске харындас чон, че ам США паза Запад хазналары андағы бандеровецтерге полысчалар, Украинада нацизм пазын кӧдірче. Пӱӱн піс кӧп ниме итпинчебіс, пу кiчіг дее ӱлӱзібіс матырны ундутпасха хабазар. Ол ӧсчеткен тӧлге сыбыра чахсы кӧзідім полар. Сабланыс матырға хаҷанға даа!
Пу бюстты, тимнеп, турғызарында араласчатханнарға улуғ алғыс. Алынҷа алғыс сӧстерін читірчем Россияның чаа-тархын пірігiзіне, Аймирнiң паба-iҷезіне, – теен регион устағҷызы.
Хакасияның Ӧӧркі Чӧбінің кнезі Владимир Штыгашев iдӧк матырға аарлас, сабланыс сӧстерін читірген:
– Піс мында, матыр хакас оолның бюстын азып, ағаа аарлас паза сабланыс читірерге чыылыстыбыс. Аймир Миягашев олаңай хакас сӧбірезінде ӧcкен. 27 майда 2022 чылда, Россияның войсколары Украинада ӧнетiн чаа операциязын иртірчеткен туста, Аймир Илбек Ада чаада постарының кӧксінең доттарның, дзоттарның амбразураларын чабысчатхан матырлар санына кір парды. Пу уғаа махачы хаалағ.
Аның паба-iҷезі, вахтаа парып, Чукоткада тоғынча. Матырны піс Таштып аймаанда, тӧреен Аңчул аалында, чыып салғабыс. Аның пу бюстын Челябинскте хола тимірдең чайап салғаннар. Улуғ алғыс Россияның чаа-тархын пірігізіне, хумартхы тасты тимниріне ол чахсы хабасхан. «Кизек чаалазығларда чуртастарын пир салған Хакасияның оолларына» хумартхы тастың пір саринда Россияның Матыры Игорь Ахпашевтің бюстын турғыс саларға кирек. Піс ол тоғысты толдырарбыс. Амды уғаа чахсы кирек иділ парды, ол ӧсчеткен тӧлге кирек полар. Мыннаң пу тоғыс тоозылбинча, матырның адынаң орамалар, пасха даа объекттер адалар. Ӧнетін чаа операциязы план хоостыра апарылча, нацизм хайди даа чох иділер, чиңic пісти полар. Матырларға сабланыс хаҷанға даа!
Мероприятиеде iдӧк чоох тутханнар Ағбан город пазы Алексей Лёмин, Хакасияның Улуғлар чӧбінің кнезі Пётр Воронин, Хакасиядаң Федерация Чӧбіндегі сенатор Валерий Усатюк паза Аймир Миягашевтің кӧӧленіскен хызы Дарья Рыженко.
Дарья Сергеевна, Аймирнiң паба-iҷезінің сурынызын толдырып, республика устаана, Россияның чаа-тархын пірігізіне, «Боевое братство» халых пірігізіне, скульптор Михаил Баскаковха алғыс сӧстерін читірген.
Устағҷылар матырның бюстын азыбысхан соонда чааҷылар, салют идіп, автоматтардаң киизер ӱс хати атханнар. Iдӧк тӧрт чааҷы cабаллығ узун гирлянданы бюст тӧзінзер салған. Матырлардаңар сарын толдырылчатхан туста чыылған чон, бюст хыринзар чахайахтар салып, сым турған.
Ведущай искірген: «Піс матырларыбысты хаҷан даа ундутпаспыс, олар – пістiң чуртазыбыстың чардығы!»
Автор :
Николай СУЛТРЕКОВ
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
