ПАСХА ХАЗНАДАҒЫЛАРҒА ЧОЛ ЧАБЫЛЧА
21.04.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиумның теестегі чыылиин иртірген
Пу чыылығда Ӧӧркі Чӧп президиумы пір ле закон проектін ӱзӱрген – «Орындағы кӧстегліг чир алтындағы ис-пайны анирына участоктарны пирҷең оңдайдаңар паза кӧзіділген участоктарнаң тузаланҷаң оңдайдаңар» Хакас Республика Законынзар алызығлар кирердеңер». Пасха сурығлар федеральнай закон проекттеріне ӱндезерінең палғалыстығ полғаннар.
Чир алтындағы ис-пайнаң палғалыстығ законзар алызығлар кирчеткен закон проектінең экологияҷа, чир-чайаан ис-пайынҷа паза чир-чайааннаң тузаланарынҷа комитеттің кнезі Валерий Старостин таныстырған. Хайди ол искірген, пістің закон федеральнайға килістіре тӱптестірілче.
Чарыда чоохтаза, Хазна Думазы ирткен чылда наа закон алыбысхан. Аны хоостыра пасха хазналарның компанияларына Россияның чир алтындағы ис-пайын анирына лицензия пирілбин сыххан. Чир алтындағы ис-пайнаң тузаланарға чарадылча Россия законодательствозы хоостыра тӧстелген юридическай лицоларға паза Россия чуртағҷызы полчатхан пос идінҷектерге. Аннаңар пасха хазна чуртағҷылары чир алтындағы ис-пайнаң тузаланар правозын амды Россия законодательствозы хоостыра тӧстелген юридическай лицоларға пирібізерге киректер.
Аннаң пасха закон проектінҷе Россия субъекттерінің хазна ӱлгӱзі органнарына амды орындағы кӧстегліг чир алтындағы ис-пайны анирына участоктарны аукцион иртірбин пир турар право пирілче. Чоох парча хум-сай анир орыннардаңар. Ол участоктарны, ӧӧнінде тимір чол пӱдіриин апарчатса, марығ чох пирері кӧрілче.
Президиумдағылар закон проектінең чарасханнар паза аны пазағы, майдағы, сессияның ӱзӱриине сығарарға чаратханнар.
Федеральнай закон проекттері аразында ӧӧн сурығларның пірсі наа хозылған чирлерге (ЛНР-ға, ДНР-ға, Запорожье паза Херсон областьтарына) налог льготаларын пирерінең палғалыстығ полған. Федеральнай закон проектінең бюджетче паза налог политиказынҷа комитет кнезі Олег Иванов таныстырған.
Хайди ол чарытхан, алында Россияның Хазна Думазы Луганск паза Донецк чон республикаларында, Запорожье паза Херсон областьтарында пос экономикалығ зона тӧстирдеңер федеральнай закон алыбысхан. Амды аны хоостыра Россияның Налог кодексінзер алызығлар кирілче. Ол алызығларҷа наа хозылған чирлернің чуртағҷыларына налог льготалары пирілче. Кӧзідімге, олар сағам парысха налог ахчазын тӧлебестер. Ідӧк ис-пайға налог тӧлирінең 10 чылға позыдылчалар паза чир налогын тӧлирінең – ӱс чылға.
Ӧӧркі Чӧп кнезі Владимир Штыгашевтің таниинаң, ол хабазығлар наа чирлерні, андар инвестиция ахчазын киріп, чапчаң оңдайлир кӧстегнең пирілчелер.
Ӧӧркі Чӧп президиумы пу федеральнай законға паза пасхазына даа хабазарға чарадығ алған.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
