ХОЗА ЧӦПТЕЗІГЛЕР ЧАРАДЫЛАР
19.05.2023
Хабарлар
Ӧӧркі Чӧп. Хакасияның Ӧӧркі Чӧп президиумы теестегі чыылиинда 14 сурығ ӱзӱрібіскен, ол санда алты закон проектін, парламент чарадииның тӧрт проектін паза пасха регионнарның закон сығарҷаң ӱлгӱ органнарының тӧрт айланызына хабазарын
Президиумның теестегі чыылии Хакасия Ӧӧркі Чӧбінің кнезі Владимир Штыгашевтің устаанынаң ирткен. Хайығ тартчатхан сурығлар санында республика правительствозы пастаанаң тимнелген закон проекті полған. Ол Хакас Республика бюджедіне федеральнай бюджеттең бюджет кредидін пирердеңер чӧптезіглерге хоза чӧптезіглерні чарадарынаңар полған. Закон хоостыра бюджет кредидін айландырарынҷа паза аның проценттерін тӧлирінҷе хайдағ даа хаалағлар хоза чӧптезігҷе иртірілчелер. Ағаа хоза, оларны регионның закон сығарҷаң ӱлгӱ органы сигіc ай аразына чарадарға кирек. Іди 2022 чылның кічіг хырлас айының 21-ҷі кӱнінде ікі хоза чӧптезіг иділген. Оларны хоостыра 2022 чылда кӧрілген тӧлеглерні, 793 миллионға чағын салковайны, 2029 чылда тӧлирге чарадылған. Хакасияның финанстар министрі Игорь Тугужековтың искіриинең, пӱӱнгі кӱнде республиканың хазна ӧдізі 23,5 миллиардча салковай, ол санда 21 миллиард азыра салковай бюджет кредидіне килісче. 2023 чылда кӱскӱзін республика облигация ӧдізінің халған чардығын, 2 миллиард азыра салковайны, чабызарға кирек. Пу закон проекті теестегі сессияның кӱн суриина сығарылар.
Чахсы пастағнаң сыхча орындағы пос устанысча, халых пірігіcтерінҷе паза нациялар аразындағы хайызығларҷа комитет кнезі Роман Челтыгмашев. Комитет депутаттары «Хакасиядағы пастағлар проекттерін чуртасха кирер алынҷа сурығлардаңар» закон проектін тимнебіскен. Пӱӱнгі кӱнде тиксі хазнада чуртағҷыларның пастағларын чуртасха кирерге хабазары тиліпче. Че Хакасияда амға теере ол кӧстегҷе тоғыс апарылбинчатханына хайығ айландырған Роман Абрекович. Сағам закон проекті право саринаң сыныхтағларны иртібіскен. Закон проектінде республика бюджедінең ахча позыдары кӧрілгеннеңер, правительствоның ӱндезиин алып аларға киректелче. Ол тузында тимде полза, пу сурығ теестегі сессияның ӱзӱриине сығарылар.
Хакасияның Ӧӧркі Чӧбі кнезінің орынҷызы – конституция законнарын сығарарынҷа, хазна пӱдіриинҷе, законностьча паза правопорядокча комитет кнезі Светлана Могилина устағ сурығларына теелчеткен алынҷа законнарға алызығлар кирерінеңер закон проектінең сыххан. Прай сурығлар Ӧӧркі Чӧптің, аның комитеттерінің, депутаттарының паза правительствоның тоғызына теелчелер. Алызығлар «Россия субъекттеріндегі азых ӱлгӱні тӧcтеҷең тиксі оңдайлардаңар» 414№ федеральнай законына килістіре кирілчелер. Президиум закон проектін, хандых айының 25-ҷі кӱніне теере тӱптестіріп, от айындағы сессияның кӱн суриина сығарарға чарат салған.
Килчеткен сессияда Хакасия пазының паза Ӧӧркі Чӧп депутаттарының табығларын турғызардаңар чарадығ алылар. Аны Ӧӧркі Чӧп табығлар кӱніне 90 – 100 кӱн халғанҷа алыбызарға кирек. Теестегі сессия ол тусха килістіре – ол хандых айының 7-ҷі кӱнінде иртер. Пірге табығлар кӱні, тізең, ӱртӱн айының ікінҷі позырых кӱніне турғызылча, іди пӱӱл ол ӱртӱн айының 10-ҷы кӱніне килісче.
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
