ААЛЛАР ӦҢНЕН ТУРЗЫННАР
05.05.2023
Хабарлар
Кирбі аал чӧбінің пазы Валентин КАРЧИГАШЕВ, орынҷызы Людмила НЕСТЕРОВА паза Арбыт аал чӧбінің пазы Сергей ЧЕБОДАЕВ
Марығ. С.П.Кадышевтің адынаң культура кінінде муниципальнай пӱдістернің (аалларның) чонға кирек иң артых проекттері марииның ікінҷі чардығы ирткен
Пу марығ кибірліг пол парған, аны 13-інҷі хати иртірчелер. Анда чиңіс тутханы аал чӧптері пастарына орындағы ағырсымнығ сурығларны пӧгеріне, чонның чуртас ондайларын чахсыландырарына чахсы полызығ полча. Хакасияның национальнай паза территориальнай политика министерствозы иртірчеткен марығда пӱӱл 74 муниципальнай пӱдіс араласхан. Аның халғанҷы чардығына он номинацияҷа иң кӧп балл чыып алған 34 проект сыххан.
– Чылдаң чылға марығ чиңісчілеріне пирілчеткен ахчаның сині ӧзіп одырча. Пӱӱл 40 миллион салковай салылған. Араласчылар саны даа пасха чыллардағызының хыринда иң кӧп. Мындағ полызығ сірерге сидіксіністерні тобырарға, ааллар кӧрімін чахсыландырарға, хумартхы тастарны турғызарға, нааҷылирға оңдай пирче. Хакасия правительствозы мыннаң мындар пу марыға хайығ саларын узарадар. Килчеткен чылға ахча синін хозарбызох. Пӱӱнгі кӱнде аалларны тилідері ӧӧн пӧгінібіс полча. Оларда чоныбыстың кибірлері хайраллалча тізе, саба полбас. Чуртағҷыларға аалда чуртирға истіг поларға кирек. Сірернің, муниципальнай пӱдістер устағ-пастааның, кӱстенізінең республикабыс чылдаң чылға ӧңненіп одырча. Проекттеріңні чуртасха кирерінде оң ползын, подрядчиктер тоғыстарын тузында толдыр турзыннар. Хакасияны тилідер тоғысты мыннаң мындар хада-пірге апарарбыс, – таныхтаан Хакасия пазы Валентин Коновалов.
Марығның халғанҷы чардығын пастир алнында кӧп чыл матлама тоғынған, орындағы пос устанысты тилідеріне улуғ хозым иткен ӱчӱн аал чӧптерінің тоғынҷыларына Хакасия пазының алғыстазы читірілген. Іди Орджоникидзе, Шира, Таштып, Ағбан пилтірі, Алтай аймахтарының специалисттері таныхтатханнар.
Аал чӧптері тимнеен проекттернің полғаны ла чиңіс тударға турыстығ полған. Хайзы даа аал чуртағҷыларына кирек паза чуртас оңдайларын чахсыландырарына туза ағылар. Оларны паалаан кізілерге иң артыхтарын таллирға оой ла полбаан полар. Андағ даа полза, чӧптезіглер соонаң марығ чиңісчілері паза сыйыхтығ орыннарға турысханнар адалғаннар.
Марығның халғанҷы чардығына сыххан араласчыларға дипломнар, танығлығ сыйыхтар паза ахчалығ сертификаттар читірілген. Іди пастағы номинацияда чиңіс тутхан аал чӧбіне 1,55 млн салковай пирілген, 2 орын ӱчӱн – 1,3 млн салковай, 3 орын ӱчӱн – 1,2 млн салковай. Пасха номинацияларда пастағы орынны холға киргеннер 1,35 млн салковай алғаннар, 2 орындағылар – 1,2 млн салковай, 3 орындағылар – 1 млн салковай.
Пастағы номинацияда пастағы орынға Пии аймаандағы Кирбі аал чӧбі турысхан. Аның пазы Валентин Карчигашев Илбек Ада чаада чат халған чааҷыларға хумартхы тасты нааҷылир проекттеңер чоохтаан. Пу кӧстеге ікіҷе млн салковай хорадылар тіп кӧрілче, марығда утхан ахчадаң пасха, аал чӧбі позы ӱзӱрлеен 500-че муң салковай хорадар, орындағы идінҷектер ідӧк хабас пирерге молҷааннар. Проект хоостыра наа хумартхы тас, Кирбі аалдаң Илбек Ада чааға парған чааҷылар аттары пазылған плиталар турғызылар. Ідӧк чазағ чӧрҷең чолыҷахтар, тасхархы чарытхы, одырҷаң орыннар тимнелер. Хумартхы тасты нааҷылирдаңар чарадығны прай чоннаң алғаннар, пу сурығны февральда ирткен чуртағҷылар чыылиинда ӱзӱргеннер. Аал чӧбінің устағ-пастаа тоғыстарны май – август айларда толдырыбызарға пӧгінче. Сентябрьда хумартхы тас пайрамни азылар тіп кӧрілче.
Марыға ідӧк аал кӧрімін чахсыландырар проекттер пирілгеннер. Кӧзідімге, Таштып аймааның Арбыт аал чӧбі хоккей ойнаҷаң орын тимнирге пӧгінче. Пу проекттің ікінҷі чардығы, пастағызын ирткен чылда тоосханнар, ол ідӧк муниципальнай пӱдістернің (аалларның) чонға кирек иң артых проекттері мариинда ікінҷі орын ӱчӱн алған ахчаа тимнелген. Аалдағы Культура туразы хыринда кӧп чон чыылысча, олғаннар даа пос тустарын анда хынып иртіредірлер. Аннаңар аны чахсыландырарын прайзы чидікпин сахтапча. Аал чуртағҷылары чахсы саринзар алызығларға ӧрінчелер, алғыс сӧcтерін читірчелер тіп чоохтапча Арбыт аал чӧбінің пазы Сергей Чебодаев.
Автор :
Татьяна КЫШТЫМОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
