ИМҶІЛЕР ЧИДІCПИНЧЕТКЕНІН ПӦГЕР ӰЧӰН
14.04.2023
Хабарлар
Ӧӧркi Чӧп кнезi Владимир ШТЫГАШЕВ пастағы орынҷызы Юрий ШПИГАЛЬСКИХНЕҢ
Ӧӧркі Чӧп. Хакасияның Ӧӧркі Чӧп кнезі Владимир Штыгашев президиумның теестегі чыылиин иртірген
Пу чыылығның ӧӧн сурығларының пірсі имнег тоғынҷыларына социальнай хабазығлардаңар республика законынзар алызығлар кирчеткен закон проекті полған. Закон проектінең Хакасияның хазых хайраллаҷаң министрі Олег Ананьевский таныстырған.
Закон проекті хоостыра хирургтарға, анестезиолог-реаниматологтарға паза акушер-гинекологтарға, хайзылары 50 муңа теере чуртағҷылығ муниципалитеттегі имнег туразынзар пастағызын на тоғысха кірчелер паза ол имнег туразында андағ специалисттер чох полған полза, республика бюджедінең социальнай хабазығ оңдайынаң iкiлер миллион салковай тӧлирі кӧрілче.
– Чоох парча Копьёв аалдаңар паза Сорығ городтаңар, – чарытхан республиканың хазых хайраллаҷаң министрі. – Оларда пу специалисттер саңай чоғыл. Амғы туста андағ специалисттерге социальнай хабазығлар кӧрілген: республика бюджедінең – 500 муң салковай, федеральнай бюджеттең – пір миллион салковайдаң 1,5 миллион салковайға теере.
Че ол хабазығлар кирілген тустаң (ирткен чылның сентябрьынаң) сығара тоғынар имҷілер табылбиндыр. Министрнің чооғынаң, Хызылчар крайында кирілген хабазығларнаң тиңнестірзе, пістің хабазығлар читкіҷе нимес. Кӧзідімге, Норильскте тоғынар имҷілерге регион бюджедінең ӱс миллион 800 муң тӧлелчеттір. Аннаңар Хакасия правительствозы наа хабазығ оңдайларын кирче.
– Iкi миллион салковай республика бюджедінең тӧлелер, – чоохтаан Олег Ананьевский. – Аннаң пасха, федеральнай бюджеттең пір миллион салковайдаң 1,5 миллион салковайға теере пирілер. Андағ оңдайнаң азахха турҷаң ахча сині 3,5 миллионҷа салковай пол парар. Ағаа хоза піс чурт пирчебіс. Специалист 10 чыл тоғын салза, ол чурт аның холына саңайға пирілче.
Хазых хайраллаҷаң министрнің искіриинең, пу тӧлеглер республика бюджедінің хорадығларын ӧcкірбес. Социальнай хабазығларны министерствоның пар ахчазынаң тӧлирі кӧрілче.
Аннаң пасха, закон проектінҷе чорыхтарға сыхчатхан ӱчӱн (чоох парча мобильнай имнег комплексінде тоғынчатханнардаңар) ай сай 10 муң салковай хоза алчатхан имнег тоғынҷылары переченьін алғыдары кӧрілчеттір.
– Закон проектін аларға кирек, – таныхтаан Ӧӧркі Чӧп кнезі Владимир Штыгашев. – Ол хазых хайраллаҷаң сферазар специалисттерні тартар. Пу сурығны теестегі сессияның кӱн суриинзар кирчебіс.
Олох туста Владимир Штыгашев министрге пістің республикада имнег тоғынҷылары кадрларын тимнирінҷе тоғыс хайди парчатханынаңар, нинҷе имҷі чидіспинчеткенінеңер сурығ пирген.
Олег Ананьевскийнің нандыриинаң, Хакасияда 270 имҷі паза 350 ортымах профессиональнай ӱгредігліг имнег тоғынҷызы чидіспинче. Сидіксіністі пӧгері хоостыра пӱӱл Россияның хазых хайраллаҷаң министерствозынаң чӧптезіглер апарылтыр, салтарында Томсктағы паза Новосибирсктегі вузтарда Хакасияа бюджет орыннары iкi хати ӧскіріл партыр.
– Полған 100-ер кізі, амды 200-ер полар, – искірген министр. – Ідӧк пу чылда ХГУ-да фельдшерлерні тимнирінҷе бюджет орыннары ӧскірілче, 25-тең 100-ке теере.
Амғы туста чӧптезігліг кӧcтегҷе 718 студент ӱгренчеттір. Ол санда 120 студент ортымах профессиональнай ӱгредіг алча – олар фельдшерлерге паза медсестраларға ӱгренчелер. Ол студенттерге республика бюджедінең ай сай стипендия тӧлепчелер: пӧзік ӱгредіг алчатханнарға – тӧрт муң салковай, ортымах ӱгредіг алчатханнарға – iкi муң салковай.
Закон хоостыра имҷілерге кӧстегліг оңдайнаң ӱгренері кӧріл парған, че ортымах профессиональнай ӱгредігҷе бюджет орыннарында кӧстегліг оңдайнаң ӱгренері чоғыл осхас. Аннаңар медсестраларға ӱгреніп алғаннарның ас чардығы ла имнег тураларынзар тоғынарға килчеттір. Олег Ананьевский Ӧӧркі Чӧп президиумын ол сурығҷа килістіре закон тимнеп тоғыныбызарға сурынған.
Паза пу чыылығда Ӧӧркі Чӧптің 2022 чылдағы тоғызынаңар искірігні ӱзӱрібіскеннер. Пу сурығнаң Ӧӧркі Чӧп кнезі Владимир Штыгашев хысхаҷахти таныстырған.
– Ирткен чылда Ӧӧркі Чӧп 10 сессия иртірген, тиксі 203 сурығ кӧрілген, ол санда 125 закон проекті, – искірген Ӧӧркі Чӧп устағҷызы. – Закон сығарҷаң пастағнаң Ӧӧркі Чӧп депутаттары, Хакасия пазы, республика прокуроры, Хакасияның Сыныхтағ-сананыс палатазы паза город-аймахтарның депутаттар чӧптері сыхханнар.
Ӧӧркі Чӧптің ирткен чылдағы ӧӧн тоғыс салтарларының аразында Владимир Штыгашев Россияның правительство кнезі Михаил Мишустиннің адына хара тас экспортына квота турғызардаңар паза Хакасия предприятиелеріне хара тасты іскер тимір чолҷа тартарға оңдай пирердеңер айланысты адаан. Паза 2022 чылда чардыхти мобилизация пасталыбысханы хоостыра килістіре законнарны чапчаң аларға киліскен. Іди Ӧӧркі Чӧп мобилизациядағыларға, ӧнетін чаа операциязына пос кӧңнінең парғаннарға паза оларның сӧбірелеріне хабазығлардаңар законнарны алған.
Сан пирістіг тус аразына Ӧӧркі Чӧп алты «правительство чазын» иртірген. Оларда депутаттар иң ағырсымнығ сурығларҷа республика правительствозы хайдағ тоғыс апарчатханын истіп алғаннар.
Президиум «Хакас Республиканың Ӧӧркі Чӧбінің 2022 чылдағы тоғызынаңар искірігдеңер» чарадығ проектін алыбысхан паза ол сурығны теестегі сессияның ӱзӱриине сығарарға чаратхан.
Президиумдағылар ідӧк Россияның Хазна Думазындағы Чииттер парламентінзер кирер кандидатураны ӱзӱрібіскеннер. Чииттер парламентінзер Ӧӧркі Чӧп депутады Михаил Молчановтың кандидатуразы сығарылған, паза кандидатура чох полған. ЛДПР фракциязар кірчеткен Молчанов иң чиит депутат полтыр. Пу сурығ ідӧк сессияа сығарылар. Сессия 21 апрельде иртер тіп кӧріл парған.
Автор :
Альберт ТОЛМАШОВ
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
