ЧАСХЫ СУУ ТАЗАРЫНА ТИМНЕНІС
24.03.2023
Хабарлар

Хакасия пазы Валентин Коновалов суғ чайыларына тимненісті сыныхтаан
Тоғыс чорығы. Хакасия пазы Валентин Коновалов 22 мартта Абазазар тоғыс чорығынаң чӧрген
Абазадағы 50№ ортымах школада республика пазы паза город пазы Валентина Филимонова Илья Соломачевке чарыдылған хумартхы тасты азарында араласханнар. Оол Украинада апарылчатхан ӧнетiн чаа операциязында чат халған. Илья 25 июльда 1991 чылда тӧреен, Абазадағы ӧкiстернiң туразында ӧскен, 50№ ортымах школада кадеттер клазында ӱгренiп, командир полған.
Олған тузынаң тигiрибзер чӧрҷең, улуғларнаң тиңе пономарь службазын апарҷаң. 14 частығда аны Николай паза Нина Зяблицкийлер сӧбiрезер алып алғаннар. 9-ҷы классты тоосханда, Илья Тюменьдегi православнай духовнай училищезер кiрiп алған, аны тоозып, Тобольскай духовнай семинарияда ӱгренген. 2012 чылда армияа хабылған, анаң контрактча служба апар сыххан. Халғанҷы чылларда Илья Соломачев Москвада чуртаан, Абазазар тӧремiл килҷең, пеер аны сӧбiрезi паза нанҷылары тартчаңнар. Оол «Дон» казактар подразделениезiнде пос кӧңнiнең чааласхан, 25 апрельде 2022 чылда, Донбасс чирлерiн арачылаанда, Изюм город хыринда чат халған... Позын махачы тудынған ӱчӱн казактар батальонының лейтенанты Илья Соломачевке Мужество орденi пирiлген (ӱреен соонда).
Валентин Коновалов теен:
– Илья казактар кибiрлерi хоостыра сын патриот чiли ӧскен, чуртас киреене ол Ада чир-суун арачылирын таллап алған. Ол тынын пiстiң ӱчӱн пирiбiскен, андағ кiзiлер олғаннарға даа, пiске дее чир-сууна хайди хынарға кирек полчатханының чахсы кӧзiдiмi полчалар. Аннаңар мин Хакасияның правительствозы алнында пӧгін турғысхам, полған на чат халған чааҷаа хумартхы тас тимнирге. Чонның сағызында андағ матырлар хаҷанға даа халзыннар!
Анаң город администрациязында сағыбаан саайлардаң, суғ тазарынаң паза ӧрттер сығызарынаң тоғыр комиссия чыылии ирткен. Валентина Филимонова суғ тазарынаң тоғыр апарылчатхан тоғыстаңар чоохтаан. 2004, 2014, 2021 чылларда Абаза суға пастырған, аннаңар пу сурыға улуғ хайығ салылча. Городта пис орын, хайзы суға кiр парарға айабас, дамбаларны тыыдарға инженерлер, армия, МЧС, рудник тоғынҷылары тартылчалар. Суғ тасса, 1989 кiзiнiң туразы суға кiр парар тiп санап салтырлар. Аннаңар администрацияда чадығдағы ағырығ кiзiлернi, азах аар ипчiлернi, палаларны прай санға алчалар, хорғыс полза, оларны иң пастап кӧзірерлер. 1 апрельдең сығара Ағбан суғ синін кӱннiң сай хараа-кӱнӧрте сыныхтирлар. Пӱӱнгi кӱнге пус халыны – 62 см, суғ чайылар тус чахсы ирт парыбызарына ізенчелер.
Пусты тибiредiбiзерге тiп, Ағбан суғда тығылыс полар орында чара чачырас тоғыстары иртiрiлген. Оларны пастир алнында Москвадаң килген МЧС тоғынҷылары Валентин Коноваловтың чарадиин сурап алғаннар. Чара чачырас тоғыстары дамбада чыыл парған республика паза аймах ӱлгӱлері, журналисттер кӧзіне иртiрiлген. Команда пирiлгенде, нинҷе-нинҷе метрге ӧӧр суғ чачырап парыбысхан, сах андох хысхаҷах суулас истілген.
Россия МЧС-ының ӧӧн устанызы пастығының орынҷызы Виктор Монцев Валентина Филимонованың чооғын пӧзiк паалаан:
– Нинҷе чӧрчем, пастағызын на андағ толдыра доклад истiм, улуғ алғыс сiрерге.
Сынап таа, Валентина Филимонова прай пiлдiстiг, чарыда чоохтаан, хыйал пол парза, хайдағ кӱстер тартылар, кiзiлер хайда чуртирлар, пат парған малларны хайди идерге паза пасха даа сурығлар прай кӧрiл парған.
– Республика суғ тазарынаң тоғыр тоғыстарға ахча пирчеткен ӱчӱн улуғ алғызым читiрчем, – теен Абаза пазы.
2004 чылны сағысха кирзе, андада, город суға кiр парыбысханда, тоғыс кiзi ӱреен. Аннаңар пiлдiстiг пол парча, ноға абазадағылар суғ тазарына iди чахсы тимненчелер, хыйал пазох пол парбас ӱчӱн...
Iдӧк Валентин Коновалов город пазынаң хада аймах ӧмелер хайди сағыбаан саайларға тимнен салғанын сыныхтаан. Площадьта аймах-пасха техника кӧзідіге сығарылған паза кiзiлер тимде полғаннар, прайзын ибiр пар килiп, республика пазы кем ниме ӱчӱн нандырчатханын пiлiп алған.
Абазадағылар сағыбаан саайларға тимделер, ӱлгӱ анзын таныхтаан.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде