ЭЭЛЕРI НАНДЫРЫҒА ТАРТЫЛАРЛАР
17.03.2023
Хабарлар
Брифинг. Пу кӱннерде Хакасияның энергетика паза тарифтернi хайығда тутчаң хазна комитедiнiң кнезi Манук Данданян паза «Атомэнергосбыт» компанияның ӧӧн директор орынҷызы Артём Михайлов хабарҷыларнаң чыылығ иртiргеннер
Анда административнай арестке алылған транспортты хайраллапчатхан идiнҷектер тарифтернi кӧдiрчеткенiнеңер чоох парған. Ағбандағы iкi идiнҷектең тоғыр пис кирекче протокол тимнелген. Полған на сайбағ ӱчӱн 50 муң салковайға теере штраф салыларға айабас.
Хакасияның энергетика паза тарифтернi хайығда тутчаң хазна комитедiнзер чуртағҷылардаң административнай арестке алылған транспортты штрафстоянказар апарарынҷа паза хайраллирынҷа полызығлар ӱчӱн артых ахча тӧлеп салғаннары хоостыра хоптар кiрген. Айланған кiзiлер идiнҷектерге ахча пирчеткеннерiн паза олар полызығлар ӱчӱн пiр дее квитанция, чек пирбеенiн суурған видеоны пиргеннер. Ол видео административнай сайбағны киречiлепче.
Пу чағында комитетсер хоза ӱс хоп кiрген. Амды айланыстар хоостыра сыныхтағлар пасталыбысты.
Хакасияда прай категориялығ транспортты штрафстоянказар пiр километр апарған ӱчӱн тӧлег 49,93 салковайға тиңнелче. Ағбандағы, Саяногорсктағы паза Хубачардағы ӧнетiн стоянкаларда транспортты хайраллаан ӱчӱн тӧлег мындағ: мотоцикл – 8,86 салковай 1 часха, 3,5 тоннаа теере кӧдiрiмнiг автомобиль паза грузовик – 17,74 салковай 1 часха, 3,5 тоннадаң аар кӧдiрiмнiг автомобильлер паза грузовиктер – 35,48 салковай 1 часха, килкiм транспорт – 53,20 салковай 1 часха.
Хакасияның транспорт министерствозы иртiрген аукционны санға алып, мындағ тарифтер турғызылғаннар.
– Полызығлар пирерiнҷе пос киреен апарар алнында идiнҷектерге тарифтерге теелчеткен амғы законнарнаң танызып аларға кирек, – таныхтаан Манук Данданян.
Идiнҷек квитанция алай чек пирбинчетсе, налог службазынзар айланарға чарир. Хакасияның пiр чуртағ–ҷызы мындағ сайбағҷа налог службазынзар айланған соонда идiнҷек ағаа прай ахчазын айландыр пирген.
Iкiнҷi сурығ законнаң хыйыстыра тоғынчатхан майнерлер чарытхы ӱчӱн олаңай чон чiли тӧлепчеткенiне чарыдылған.
Криптовалюта майнингiнең айғасчатхан кiзiлер чарытхыны уғаа кӧп хоратчалар – пiр айда нинҷе-де чӱс муң киловаттха чит парча. Аннаңар олар чарытхы ӱчӱн идiнҷектер чiли тӧлирге киректер. Че пӱӱнгi кӱнде чазырып тоғынчатхан майнерлер пар.
– Пiстiң пӧгiнiбiс – чарытхынаң тузаланар норма турғыс саларға, чуртағҷылар хыйалға кiрбес ӱчӱн. Тураларны чарытхынаң чылытчатханы санға алыларох. Майнерлер олаңай чуртағҷылардаң хай-хай кӧп чарытхы хорат салчалар. Аннаңар криптовалюталарнаң айғасчатхан кiзiлер чуртағҷылар чiли тӧлебеске киректер. Майнинг чарытхы сетьтерiне улуғ нагрузка полча. Оларнаң хонҷых полчатхан чуртағҷылар хыйалға кiрчелер. Сетьтерде чарытхы кӱзi синче. Саайлар поларынаң хорғыс сығыс килче, – теен Манук Данданян.
Артём Михайловтың чооғынаң, майнерлернi iлезiне сығарар оңдайлар пар. Олар хорат салған чарытхы синiн олаңай кiзi хорат полбинча. Аннаңар чарытхы ӱчӱн тариф аны хоратханы хоостыра алылар.
Чыылығда iдӧк «Хакасэнерго» ООО-ның сетьтерiн тыхтирына паза оларны хайығда тударына ахча читкiҷе пирiлчеткеннеңер чоох парған. Компания хоратчатхан ахча чарытхы тарифтерiне кiр парча. Че инвестиция программазына кӧрілген ахчадаң тыхтағ тоғыстарына асхынах ахча хорадылча. 2019 – 2021 чылларда инвестиция программазына 1 миллиард 130 миллион салковай кӧрiл парған полза, чарытхы объекттерiн тыхтирына 15,8 миллион салковай хорадылған.
2021 чылда компания чарытхы сетьтерiне пiрiгерiне кӧрiлген льготаа 214,5 миллион салковай хорат салған. Пӧгiн хоостыра iкi хати кӧп ахча хорадыларға кирек полған.
Автор :
Оксана ЧЕЛТЫГМАШЕВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
