ОЙЫН ТООЗА ХАРБАЗЫҒ ПАРҒАН
10.12.2021
Хабарлар
Меспектіг хоккей. Пу неделяда «Саяны» команда «СКА-Нефтяник-2» хоккей ӧмезінең тоғасхан
Орыс хоккейіне алай бендиге хынчатхан улустың «ізіг» тус пасталыбысты. «Саяны» команда тиксі Россия марығларында араласча нооза. Ирткен айда хоккеисттерібіс «Сибсельмаш-2» паза «Кузбасс-2» ӧмелернең ойнабызарға маңнанғаннар. Декабрьда, тізең, «Саяны» тӧрт команданаң тоғазар, прай матчтар Ағбанда иртерлер.
Пастағы ибдегі ойын 6 декабрьда полған. Кибір хоостыра аны пайрамни асханнар. Ойын алнында спортсменнерні паза кӧрігҷілерні «Chili» ӧме чайаачызынаң ӧріндірген. Артисттер, кӧйчеткен отнаң аймахти ойнап, чыылған чонның кӧңнін кӧдіргеннер. Анаң чыылысханнарны аарлығ аалҷылар алғыстааннар. Хакасия правительствозы адынаң республика пазының орынҷызы Ольга Пономарева чоох тутхан. Ол хоккеисттерге чиңістер тударға, сіліг ойын кӧзідерге алғаан. Ӧӧркі Чӧп кнезінің пастағы орынҷызы, Хакасияның меспектіг хоккей федерациязының президенті Юрий Шпигальских «Саяны» хаҷан-полза Суперлигада ойнир тіп ізенізінең ӱлескен. Ідӧк стадиондағы чонға Хазна Думазының депутады Сергей Сокол чылығ сӧстер читірген. Таныхтирға кирек, матчха кізілер чахсы чыылысханнар. Ирткен чылнаң тиңнестірзе, кӧрігҷілернің аразында чииттер хозыл партыр.
Хоккеисттер пуста пастағы минутадаң ӧткін хайын сыхханнар. «СКА-Нефтяник-2» ӧмеде чииттер ойнапчалар, олар пістің оолларыбыстаң халбасха кӱстенгеннер. Санны «Саяны» команда асхан. 6-ҷы минутада Алексей Севрюков Виталий Шнайдернің полызиинаң «ыырҷының» хаал-хазына меспекті кире сабысхан. Тӱрчедең Олег Селивёрсткин ӧріндірді. Сан - 2:0. Стадионға толдыра хысхырыс: «Ооллар, хандыра ойнапчазар!» Аны истіп, «Саянының» капитаны Александр Захваткин гол сабысты. Кӧрігҷілерге пазох ӧрініс. Че хабаровсктағылар чідірінмееннер. 19-ҷы минутада «СКА-Нефтяник-2» ӧменің хоккеизі Чингис Хандамаев «Саяныға» гол кирібіскен. Ойын тузында пу фамилияны удаа истерге киліскен. 19 частығ спортсмен - пӱрӱт чонның оолғы, ол Хабаровскта тӧреен. 2020 чылда, Россияның піріктірілген командазында ойнап, арғыстарынаң хада тилекей первенствозында чиңіс туттыр. Хабаровск крайында даа, Бурятияда даа спорт «чылтызына» саналчаттыр.
34-ҷі минутада сан 6:1 пол парған. Мында Фёдор Розвезевті, Михаил Селедковты паза Роман Козулинні махтирға кирек. Хабаровсктағылар удурласпастар ба? Кізінің сағызын піл салып, таң, аалҷылар ікі минута пазынаң пістіңнерге гол кире сабысханнар. Тайм тоозылғанҷа «Саянының» хаалхазынзар пазох меспек учух килді. Сан - 6:3.
Ікінҷі таймда хоккеисттерібіс ойнир орнына пуста олаңай чыл чӧрчеткен чіли пілдіргеннер. Итсе-де, 49-ңы минутада хоза пір гол кирібіскеннер. Анзы Михаил Селедковтың чидии. Сан 7:3 пол парғанда, оолларыбыс пос салыныбысханнар тиирге чарир. Аны сизініп, «СКА-Нефтяник-2» ӧме чапчаң хайын сыххан. Чарым час аразына хабаровсктағылар постарына ікі гол пас салғаннар. Прайзы пастағы матч 7:5 саннаң тоозылар тіп сағынған. Че Кирилл Бутенко ойынның халғанҷы минутазында «ыырңының» хаалхазына меспекті кире сабысхан. «Саяны» 8:5 саннаң чиҷіс тутхан даа полза, хоккеисттерібістің ікінҷі таймда ойнир хылыхтары читпин парғаны харахха тасталған.
7 декабрьда ирткен ойыннаңар чоохтаза, пастағы таймда пус пісти полған. Чир-суғҷыларыбыс, спорт хылиин кӧзідіп, «СКА-Нефтяник-2» ӧменің хаалхазына соон сӱрістіре читі меспек кире сабысханнар. Хоккеисттердең Олег Селиверсткинні, Иван Касаткинні, Кирилл Бутенконы, Фёдор Розвезевті паза Егор Егорычевті таныхтирға кирек. Розвезевнең Егорычев ікілер гол кирібіскеннер. Хабаровсктағылар даа хада-пірге тудынып ойнааннар. Аның сылтаанда 17-ҷі минутада пір гол кире сабызарға кӱстері читкен. Матчтың пастағы чардығы 7:1 саннаң тоозылған. «Саяны» алнында.
Ікінҷі тайм уламох хынығ парған. Спортсменнер голлар кирерге кӱстенгеннер. 51 минутада «Саянының» хаалхазынзар меспек учух килді, сан - 7:2. Хысхаҷах тус аразына сан 11:2 пол парған. Голларның авторлары - Константин Жаданов, Егор Егорычев, Михаил Селедков паза Александр Захваткин. Че 69-ҷы минутада ӧӧн тренер Евгений Ерахтин хаалха хадағҷызын алыстырабызарға чаратхан. Алексей Барабанщиковтың орнына 17 частығ Иван Гращенконы турғыс салғандох, «ыырҷы» «Саяныға» гол кирібіскен. Кізілер, пу киректі кӧріп, «Лёханы айландырыңар!» аахтас сыхханнар. Салтарында ойын 14:6 саннаң тоозылған. «Саяны», 13 сан чыып алып, турнир таблицазында прайзының алнында парча.
10-11 декабрьда 13.00 часта «Саяны» команданың теестегі ойыннары иртер. Спортсменнерібіс «Восток» ӧменең тоғазарлар. Прайзын хакас ӧменің ӱчӱн «ағырарға» хығырчабыс.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
