СААРБАХТАР МАРЫҒЛАСХАННАР
22.02.2023
Хабарлар
Ниик атлетика. Ағбандағы ниик атлетика манежінде чиит спортсменнер аразында марығлар ирткен
Пу наада Ағбанның наа спорт объектінде суум-саам турған. 14 паза 18 часха читкелек саарбахтар ниик атлетикаҷа марығларда кӱстерін cынааннар. Чоохтирға кирек, арға-мӧрій сыныхтағ пӧгіннең иртірілген. Аның тузында спортсменнерге чӱгӱрерге алай сегірерге истіг бе, пірее ниме харығ полча ба піліп аларға чарир. Ідӧк специалисттер пӱдірігнің, оборудованиенің тиксі тоғызын сыныхтапчалар. Анзы сығысхан читпестерні тузында чох идібізерге оңдай пирче.
Ниик атлетика манежінде ирткен пастағы марығларны пайрамни асханнар. Танығлығ мероприятиеде спорт министерствозының, Ағбан городтың устағҷылары араласханнар. Пастап чыылған чонға улуғ нимес видео кӧзіділген. Анда ол туста Ағбан пазы полған Николай Булакин спорт школазы ӧмезінең хада манеж пӱдірілер орында ӧрге саапчатханын кӧрерге чарир. Он артиинаң чыл пазынаң объект тимге сых парды. Ол Стол теннизі кінінең хада спорткомплекссер кірче, аның ӱзінҷі чардығы полча. Хайди чооғында таныхтаан Ағбан пазы Алексей Лёмин, ниик атлетика манежі ӧӧнінде муниципалитеттің кӱзінең пӱдірілген. Ахча таап аларға оой полбаан. Че пылтыр городтың устағ-пастаа Хакасияның физическай культура паза спорт министерствозы полызиинаң «Спорт – чуртас сині» программаҷа федеральнай ахча киріп алған. Анзы объектті читіре пӱдірібізерге, спорт тириин ал саларға оңдай пиртір. Аннаңар Алексей Викторович хабазығ ӱчӱн Россияның спорт министерствозына, Хакасияның правительствозына паза республиканың спорт министрі Сергей Кочанға алғызын читірген. Cпорт министрінің орынҷызы Елена Краснова чиит спортсменнерге наа манежте рекордтар турғызарға алғаан. Аның сӧстеріне чоннар аразындағы класстығ спорт узы, марафонец Дмитрий Бурмакин хозылған. Олимп ойыннарының араласчызы теен:
– Марығлар иптіг иртсін. Иң кӱстіг паза табырах спортсменнер чиңіс тутсыннар.
Арға-мӧрійде Ачинсктің, Железногорсктың, Хызылчарның, Лесосибирсктің, Минсуғның паза Хакасияның город-аймахтарының cаарбахтары араласханнар, тиксі 357 кізі. Олар ниик атлетиканың 39 дисциплиназында устарын кӧзіткеннер. Марығның программазында шесттіг пӧзікке сегірері паза ядроны ідері ле чох полған. Орындағы СМИ-ларның хабарҷылары 60 метрге чӱгӱрісче паза узунға сегірізінҷе марығларны пос хараанаң кӧріп алғаннар. Операторларның таниинаң, спринтёрларны суурарға сидік. Олар камераны айландырғанҷа, спортсмен чӱгӱрібісче. Сизінгенде, хакастардаң хысхаҷах дистанцияларға хыстар чӱгӱрчелер. Азах меетке сыхханнарның аразында Анастасия Асочакованы, Екатерина Конгарованы, Дарья Чучунованы, Алина Артонованы адирға кирек. Олардаң халғанҷы cпортсменні алынҷа таныхтирҷыхпын.
16 частығ Алина Асхыс аалдаң, Хакас гимназиязында 10-ҷы класста ӱгренче. Кічігде футбол секциязынзар чӧртір. Ниик атлетиканаң тӧртінҷі чылы айғас парир. Пастағы тренері – Ольга Борисовна Кашкарёва, амғы туста Сергей Николаевич Кашкарёвтың холында узын таптапча. Хакас саарбах 60, 100 метрге чӱгӱр чӧрче паза узунға сегірче. Чидіглерінеңер чоохтаза, пӱӱл январьда абахай чир-суғҷыбыс Сибирь первенствозында ікі медаль холға кирген: 60 метрге барьерліг чӱгӱріcте пастағы орынға сыххан, узунға сегіріcте ӱзінҷізі полыбысхан. Чидіглер хакас хысха Россия первенствозынзар чол асханнар. Марығ пу наада ирткен. Сегірісте Алинаа оң полбиндыр, барьерліг чӱгӱрісте cпортсмен чарым финалға читкен.
Манежте ирткен арға-мӧрійдеңер чоохтаза, 60 метрге Алина Артонова 8,03 секундаа чӱгӱрібістір. Алында саарбах мындағ салтар кӧзітпеҷең одыр. Узунға ол 5,36 метр сегірібіскен. Спортсменнің таниинаң, анзы тың на чахсы нимес. Алина 5,77 метр сегірібізер оңдайлығ. 17 февральда ол ікі алтын медаль утхан.
Специалисттернең паза спортсменнернең чоох алысханда, прайзы ниик атлетика манежіне пӧзік паалағ пирген. Хызылчардағы тренер Татьяна Зубрилина, сағыстарынаң ӱлезіп, теен: «Уғаа чахсы паза кирек объект. Тӧзелген чабығ кӧңніме кірче. Хакасиядағы спортсменнер ӱчӱн ӧрінчем. Наа чидіглер полар тіп ікінҷілес чоғыл».
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
