«Ағбанвагонмаш» – республиканың ӧӧн предприятиелерінің пірсі
22.11.2023
Хабарлар
Тоғазығ тузында
Тоғазығ. Хакасия пазы «РМ Рейл» компанияның ӧӧн директорынаң паза «Ағбанвагонмаш» АО-ның наа директорынаң тоғасхан
Анда Хакасия пазы Валентин Коновалов паза «РМ Рейл» компанияның ӧӧн директоры Максим Тевс иділген тоғыстың салтарларын паза таңдағызына планнарны ӱзӱргеннер. Ідӧк регион устағҷызын «РМ Рейл Ағбанвагонмаш» АО-ның наа устаҷаң директоры Андрей Симбирцевнең таныстырғаннар. Наа пастых предприятиенең октябрь айда устап сыххан.
Максим Тевс наа устағҷының профессиядағы алғым опыдын таныхтаан. Анзы турғызылған пӧгіннерні тӱзімніг толдырарға полызар тіп ізенізін читірген.
Республика пазы Андрей Симбирцевті устағҷаа турғызылғанынаң алғыстаан, тӱзімніг тоғыс алғаан. Ідӧк регион экономиказында ӧӧннернің пірсі полчатхан предприятиенің тилізі мыннаң мындар узарадыларына ізенізін читірген:
– «Ағбанвагонмаш» республика экономиказының ӧзіс орыннарының пірсі полча. Хакасия правительствозы предприятиені тилідер сурығларны пӧгеріне ӧткін хабасча. Мыннаң мындар пірге тоғыс ідӧк удур-тӧдір тузалығ парарына ізенчебіс, предприятиее прай саринаң хабазарға, пірге кӱстеністернең сығарысты мыннаң мындар тилідерге тимдебіс.
«РМ Рейл Ағбанвагонмаш» – Хакасияның ӧӧн промышленность предприятиелерінің пірсі. Ол хазнада таарлағ контейнерлерінің алғым сығарызынаң айғасчатхан чалғыс завод полча.
Предприятие сығарысты тӧреміл алғытча, 2022 чылдаң сығара, тізең, тимір чол вагоннарын тыхтап сыххан.
Вагоннарны ізестіг тыхтирына кирексініс ӧcче. Улам амғы туста, хаҷан Хакасиядаң ниме-нооны экспортха ызары паза аймах-пасха чирлерзер таарлағларны тартары тиліпче.
Предприятиенің паза Хакасия правительствозы аразында пірге тоғынардаңар чӧптезіг иділген. Аны хоостыра инвестиция программазын чуртасха кирері кӧріл парған.
Ирткен чылда «РМ Рейл Ағбанвагонмаш» АО-ға республика бюджедінең субсидия пирілген – наа оборудование аларына хорадығларны айландырарына. Пӱӱл Хакасияның промышленность тилізі чыындызынаң предприятиее наа оборудование аларына льготалығ займ пирілері кӧрілче.
Чӧптезігнің ӧӧн кӧстеглерінің пірсі – тоғынҷыларны ӱгредері паза оларның квалификациязын кӧдірері.
Пӱӱнгі кӱнде заводта 900 артиинаң кізі іcтенче. Ортымах чал ахчазы – 70 муң салковай азыра. Ол пу чылда ла ӱс хати кӧдірілген. «РМ Рейл Ағбанвагонмаш» – социальнай саринаң нандырығлығ паза ізестіг тоғыс пирчеткен предприятие. Анда тоғынҷыларға социальнай хабазығ пирҷең алғым программа тоғынча, істеніске паза тынаға истіг оңдайлар тӧстелген.
Предприятие позының алнында мыннаң мындархы тилізінҷе алғым пӧгіннер турғысча.
«РМ Рейл» компанияның ӧӧн директоры Максим Тевс тоғазығ тузында «РМ Рейл Ағбанвагонмаш» АО-ның ӧзеріне ізестіг предприятие полчатханын алынҷа таныхтаан:
– Таарлағларны контейнерлерде тартары тохтабин ӧсче, предприятие ол кирексіністі толдыразынаң чабарға тимде. Компанияда пос инжиниринг кіні – «РМ Рейл Инжиниринг» – пар полғаны наа модельлерні тимнирге паза хысха тус аразына пӧзік синде сығарып пастирға оңдай пирче. Пістің контейнерлер, импортнайларнаң тиңнестірзе, хай-хай артых. Анзы тузаланыстың салтарларынаң киречілелче.
Сом Хакасия пазы пресс-службазыни
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
