«Саяны» пик хылиин кӧзітті
19.01.2024
Хабарлар
Хоккеисттерібіс «Байкал-Энергия» командаа гол кире саапчалар
Спорт. Пістің хоккеисттерібіс ікі ойын иртірібіскеннер. Олар «Байкал-Энергия» паза «Волга» командаларнаң тоғасханнар
Амғы туста Суперлигазар 14 команда кірче. Алты иң кӱстіг клуб – «Водник», «Динамо», «СКА-Нефтяник», «Байкал-Энергия», «Кузбасс» паза «Енисей» – удур-тӧдір тӧреміл сыйыхтығ орын ӱчӱн харбасча. Пасхазының ӧӧн пӧгіні – плей-оффсар таллағ иртібізері. Адалған ӧмелернің чиңістеріне прайзы даа кӧнік парған. Че 11 январьда кирек сағыбаан оңдайнаң парыбысхан. Тиктең нимес ол кӱн ирткен ойыннарны специалисттер паза кӧрігҷілер амға теере ӱзӱрчелер.
Хайди чапсыбассың? Саблығ «Енисей» клуб «Мурманға» 1:3 саннаң утыр салған. Пу чидігні мурмансктағылар матап таныхтааннар, неке. «Динамоның» паза «Волганың» аразында ирткен матч ідӧк таңнатхан. Харбазығ ойын тооза партыр. Салтарында москвадағылар 7:6 саннаң чадап чиңіп алғаннар. Сах андох чоох тараан: «Волга» чахсы ойнап полчаттыр!» Ідӧк 11 январьда «Саяны» пик хылиин кӧзіткен. Че аннаңар алғыда.
Орындағы стадионда хоккеисттерібіc «Байкал-Энергия» команданаң тоғасханнар. Клуб Иркутскта 1923 чылда тӧстелтір. Адын пір ле хати алыстырбиндыр. «Байкал-Энергия» Россияның чемпионадында ӱс хати кӱмӱс медаль холға кирген, тӧрт хати хола призер полған. Пу чидіглерде «Саянының» амғы ӧӧн тренері Евгений Ерахтиннің хозымы парох. Евгений Владимирович Иркутсктағы клуб ӱчӱн 10 чыл ойнаан, ідӧк илееде тус «Байкал-Энергияның» ӧӧн тренері полып істенген. Аның устаанынаң cаблығ клуб ікі хати Россия чемпионадының азах меедіне сыххан. Е.В.Ерахтин «Байкал-Энергия» клубтың иң саблығ тренерлерінің санына кірче.
Матч хайди парар ни? Ойын пасталғандох, хоккеисттерібіс пуста ӧткін хайын сыхханнар. Алындағы утырысха ӧкпелен парғаннар, таң. 8 январьда Хакасиядағы ӧме «СКА-Нефтяникке» 0:6 саннаң чиңдір салған. Че 25-ҷі минутада меспек «Саянының» хаалхазынзар учухча. «Ағырчатхан» улус ачырғанызын чазырбинча. Тӱрчедең пістіңнер нандыр пиргеннер. Голның авторы – Руслан Гавричков. Сан – 1:1. Аның соонда пус чазызында пинг-понг пасталыбысхан тирге чарир. «Байкал-Энергия» «Саяныға» гол кире сабысча, ағбандағылар нандыр пирчелер. Командалар тиңнең тиңе ойнааннар. 47-ҷі минутада сан 2:2 полған, 64-ҷі минутада – 3:3. Андағ ойыннарны кӧрерге хынығ. Пір туста «Саяны» алнында парчатхан. 73-ҷі минутада сан 5:3 полған. Ікі ӧме хайым (тиңни) ойнабысхан. Сан – 6:6. Матчтың матырына Никита Терёхинні санирға чарир. 24 частығ хоккеист хет-трик идібіскен. Ол ойын тузында «ыырҷының» хаалхазынзар ӱс меспекті кире сабысхан. Пу чемпионатта хет-триктернең Алмаз Миргазов сабланча.
Чоохтирға кирек, 11 январьда ирткен ойын – «Саянының» паза «Байкал-Энергияның» ӱзінҷі тоғазии. Августта Россияның кубогы ирткенде, Хакасиядағы ӧме иркутсктағыларға 0:7 саннаң унада саптырыбысхан. 6 ноябрьда матч 4:7 саннаң тоозылған. Амды командалар тиңни ойнабысханнар. Салтарлар киречілепче, хоккеисттерібістің узы ӧсче. Специалисттер сӧстерге харанмааннар. Прайзы таныхтапча: «Хандыра матч полған». Кӧрігҷілернің чӱреенде – ӧрініс, поғдархас паза киртініс.
Иркутсктағыларнаң ойнабысхан соонда «Саяны» чорыхха сығыбысхан. 15 январьда команданы Ульяновсктағы «Волга» удурлаан. Пастағы таймда оолларыбыс турыстыра кӧрінгеннер. Голларны постарының аттарына Сергей Дёминнең Кирилл Толмачёв пас салғаннар. Матчтың пастағы чардығы 2:3 саннаң тоозылған. Тынағ тузында «Волганың» хоккеисттері наа тыныс алынып алғаннар, таң. Олар хысхаҷах тус аразына «Саянының» хаалхазынзар хоза ікі меспек кире сабысханда, пістің пус чазызы ээлеріне чит полбааннар. Ойын 4:8 саннаң тоозылған. Пос чазызында прай кӱс салып ойнирға кирек. Ирткен ноябрьда «Саяны» паза «Волга» Ағбанда тоғасханнар. Ағбандағылар хайдағ-да сылтағнаң 3:4 саннаң утыр салғаннар. Ульяновсктағыларны махтирға кирек. 11 январьда «Динамоға» маң пирбееннер, 15 январьда «Саяныны» чиңіп алғаннар.
31 январьда «Саяны» Ағбанда «Мурманнаң» хада ойнир. Меспектіг хоккейге хынчатханнарға ол ойынны хайди даа пос хараанаң кӧріп аларға кирек. Хызылчардағыларны утчатхан «Мурманға» оолларыбыс сыданарлар ни?
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
