Пӱдіріг тоғыстары – хайығда
28.10.2026
Хабарлар
Ағбандағы олғаннар поликлиниказы 90%-ке тимде
Тоғыс чорығы. 26 чарыста Хакасия пазы Валентин Коновалов Ағбанда паза Харатаста пӱдірілчеткен паза тиксі тыхталчатхан пӱдіріглерде сыныхтағнаң пол килді
Ағбанда паза Харатаста тӧӧй проекттерҷе олған поликлиникалары турғызылча. Ікізі дее «Хазых хайраллиры» нацпроекттің «Хазых хайраллирының ӧӧн чардығын нааҷылиры» федеральнай проектке пір туста кирілгеннер, аннаңар тоғыстар даа тиң пасталғаннар: 2023 чылда. Пӱдіріглерде ікі пасха подряд пірігістері тоғынчалар, аннаңар пӱӱнгі кӱнде оларның сині пасхалалча. Ағбандағы олған поликлиниказы 90 азыра процентке тимде полза, Харатастағызы – 75 ле процентке.
– Пӱӱнгі кӱнде Арбандағы олған поликлиниказында пӱдіріг тоғыстары толдырыл таа парир: істіндегі тоғыстар апарылча, чарытхы сыныхталча паза тура хыри иптелче. Кічіг хырлас айына ӧӧн тоғыстар толдырыл парар, имнег туразы тиріглелер, анаң лицензия аларынҷа тоғыс апарылар. Ізенчебіc, чыл тоозылғанҷа имнег туразын тузаланысха киріп аларға, – чарытхан Хакасияның пӱдіріг министрінің пастағы орынҷызы Иван Евдокимов.
Хакасия пазы Валентин Коноваловтың устаанынаң правительство делегациязы Арбандағы имнег поликлиниказының ӱс хадылын прай кӧрібіскен. Ӱзінҷі паза ікінҷі хадылларда улуғ нимес тоғыстар халтыр, ӧӧн тоғыстар сағам пастағы хадылда толдырылчалар. Тура тастында тротуар плитканаң салыл парған, хыринда сырыптар одыртыл парған. Чолда асфальт тӧзиріне «тӧзек» тимнел парған. Тасхархы кии чылии асфальт тӧзирге ам даа килістіре тіп ізендіргеннер пӱдірігҷілер.
Харатастағы олған поликлиниказында тоғыстар сала сӧӧ тартыл парыбысханы чахсы кӧрінче. Аның чирі ам на тимнелче, сай паза хум ағыл салтырлар, кӱреп пастабыстырлар. Тураның пасхыстар орыннарында кӧзенектер турғызылбаан. Андар витражтар чахып салтырлар. Сағам, тізең, пӱдірігҷілер аны пластикнең паза пленканаң туйухтап салғаннар. Тура істінде инженер сетьтері ам даа тартылча, читіре иптелбееннеңер, потолок плиткалары даа тӧзелбеен. Ӱзінҷі паза ікінҷі хадылларда стенелер сырлалча, поллар тиңнелче, хуруп парза, проект хоостыра плита алай линолеум тӧзелер. Тиксі алза, пӱдіріг 75,4%-ке тимде.
– Тоғыстар сӧӧ тартылғаны, чыл пасталғанда, туразар чылығ пирілбеенінең палғалыстығ, – чарытхан Иван Николаевич. – Чылығны ам на пиргеннер, аннаңар тоғыстар 2-3 айға соонаң толдырыларлар. Тиксі поликлиника сала соонаң тузаланысха кирілер. Ахча саринаң хорадығлар тӧӧй.
Хакасия пазы пӱдіріг тоғыстарын кӧріп алғанда, тоғысты айныдар ӱчӱн, подряд пірігізіне тоғынҷыларны хозарға киректелчеткеніне хайығ айландырған. Пу ікі пӱдірігде республика пазын аның орынҷызы Дмитрий Бученик, пӱдіріг министрі Виталий Пестриков паза хазых хайраллирының министрі Максим Максимов удурлааннар.
Харатаста чииттерге ікі хадыллығ кін тимнелче. Турада тиксі тыхтағ тоғыстары «Чииттерге регион» программаҷа паза «Россия – оңдайлар хазназы» проектче толдырылчалар.
– Чииттер кінінде пӱӱн-таңда прай тоғыстар толдырыл парарға кирек. Чылығ пирчеткен сетьке хозылғаны ла ӱс неделяа сӧӧ тартыл парыбызар. Анаң чииттер кіні тоғысха тимде полар. Пӱдірігде тиксі тыхтағ тоғыстары толдырылған, аннаңар аны тузаланысха кирерге киректелбинче. Сынны чоохтаза, піс чапчаң тоғыныбысхабыс. Проект паазы 100 миллион азыра салковай полған, чарым чыл аразына піс тоғыстарны толдырыбысхабыс. Тура ікі хадыллығ, аның тиксі улии – 1000 квадраттығ метр. Ідӧк цоколь пар, ағаа хоза хости чирні иптирі проектке кирілгенӧк, – чарытхан Иван Евдокимов.
Тиксі тыхтағ тоғыстарында тура тастын, фундаментін, хырын, істіндегі инженер сетьтерін (чылығ, суғ читірҷең, канализация, чарытхы пирҷең) тиксі нааҷылиры паза пӧліктерні істінең иптирі кӧрілген.

Республика правительствозының делегациязы Чииттер кіні істі-тастынаң нааҷылал парғанын кӧрче
Хакасияның чииттер политиказы паза халых тилізі министрі тоғызын толдырчатхан Лилия Боргоякова делегацияа тураның істі-тастын кӧртіскен. Устағҷының таниинаң, пу кӱннерде наа мебель читірілер, тоғынҷылар аны чыып пастирлар. Улуғ хырласта Чииттер кіні ізіктерін азар. Хакасия пазы толдырылған тоғыстарға чӧпсінген, пӱдіріг пірігізіне паза тоғынҷыларға алғызын читірген.
Сомнар Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде



