Спорт, кибірлер, Сибирь
28.10.2026
Хабарлар
Хакасия пазы Валентин Коновалов Ломотьколар сӧбірезінең хада – «Спорт сӧбіре – Россияның кӱзі!» фестивальда
Форум. 21 – 23 чарыста Хакасияның делегациязы «Россия – спорт державазы» чоннар аразындағы форумда араласхан
Хазии уйан улус – улуғ хайығда
Чоннар аразындағы форум – кибірліг мероприятие. Ол Россия президенті Владимир Путиннің чарадиинаң 2009 чылдаң иртірілче. Аның ӧӧн пӧгіннері – хазнадағы спорт сферазының иң ағырсымнығ сурығларын ӱзӱрері, чыл салтарларын идері паза таңдағызына пӧгіннер турғызары. «Россия – спорт державазы» форумны чыл сай наа город удурлапча. Пӱӱл ол Хызылчарда ирткен. Хонҷых регионда аймах хазналарның кізілері чыылысханнар. Форумның пай программазы нинҷе-де улуғ марығдаң, саблығ спортсменнернең тоғазығлардаң, аймах чыылығлардаң, сессиялардаң пӱткен.
Чоохтирға кирек, Хакасияның делегациязы иң танығлығ спорт мероприятиезінде тӧреміл араласча. Че 2026 чылда пастағызын на республика ӱчӱн улуғ ӧме турысхан. Делегациязар кіргеннер Хакасия пазы Валентин Коновалов, Ӧӧркі Чӧп кнезі Сергей Сокол, сенатор Олег Земцов, физическай культураның паза спорттың министрі Пётр Макарчук, республикадағы спорт школаларының паза федерацияларының устағҷылары, спортсменнер.
Республика пазы Валентин Коновалов форумда ікі кӱн тоғынған. 22 чарыста Валентин Олегович Россия президентiнiң Сибирьдегi полномочиелiг кiзiзi Анатолий Серышевнең паза пасха губернаторларнаң хада «Тигір хуры» кӧп кӧстегліг спорт комплексінде пол килгеннер. Анда регионнар устағҷылары хазии уйан улусха кӧрілген ачыхнаң танысханнар. Экскурсия «Спорт сӧбіре – Россияның кӱзі!» инклюзия фестивальынаң узарадылған. Фестивальда СВО ветераннары сӧбірелерінең хада кӱстерін сынааннар. Марығда 30 сӧбіре араластыр, оларның санында Саяногорсктағы Ломотьколар. Денис Ломотько ухтығ атыста паза шахматта узын кӧзіткен, аның ипчізі Олеся паза хызы Валерия – дартста паза стол теннизінде. Марығлар эстафетанаң тоозылғаннар. Чир-суғҷыларыбыс «Ӧрініс ағылчатханнар» номинацияда чиңіс тутханнар. Оларны Валентин Коновалов сыйыхтаан.
Олох кӱн Россия президентiнiң Сибирьдегi полномочиелiг кiзiзiндегі Чӧбінің паза «Сибирьдегі чӧптезіг» регионнар аразындағы ассоциацияның (МАСС) піріктірілген чыылии ирткен. Ӧӧн сурығ – хазии уйан улусха спортнаң айғасчаң истіг оңдайлар тӧстирі. Хайди таныхтаан Анатолий Серышев, чыл тоозылғанҷа СФО-ның полған на регионында кинектернi спортха кӧнiктiрчеткен кіннер тоғынарға киректер. Хакасияның ӱлгӱлері пу сурығны тӧреміл хайығда тутчатханнаңар, республиканың поғдархаҷаң ниме пар. Инфраструктура саринаң піcтің регион пастағылар санында: 1280 спорт объектінің 63 процентінең хазии уйан улус тузалан полар оңдайлығ. Кинектер аразында спортнаң айғасчатханнарның саны ӧсче. Ӧӧн тоғысты апарча Республиканың паралимп резерві cпорт школазы. Ол пӱӱл 10 чылын таныхтап салған. Аның ӱгренҷілерінең пір кізі ниик атлетикаҷа чоннар аразындағы класстығ спорт узы нормативті толдырыбысхан. Чиңістерінең теннисисттер паза ниик атлетиканаң айғасчатханнар ӧріндірчелер. Пылтыр Хакасияда следж-хоккейҷе команда тӧстелген. Анда СВО ветераннары ойнапчалар. Пӱӱл ӱртӱн айында «Звезда-ЦСКА» адалчатхан ӧме тиксі Россия мариинда ікінҷі орынға сыххан.
МАСС-тың араласчылары 2027 чылға пӧгіннер турғысханнар паза Ассоциацияның чӧбінің наа кнезін тапханнар. Килер чылда пу тоғысты Омск облазының губернаторы Виталий Хоценко толдырар.
Национальнай спорт кӧрімнері
23 чарыста Хакасия пазы Валентин Коновалов «Россияның худы. Спорт – кӱстің пик хуйағы: кибірлерге наа кӧріc» сессияда чоох тутхан. Мероприятиені апарған Россияның вице-премьерi Дмитрий Чернышенко. Дискуссияда араласханнар Россияның спорт министрі Михаил Дегтярев, Хызылчар крайының губернаторы Михаил Котюков, олимп чемпионнар Никита Нагорныйнаң (спорт гимнастика) Олег Саитов (бокс), регионнарның, федерацияларның, аймах медианың кізілері.
Хайди таныхтаан Валентин Коновалов, амғы туста республикада кибірліг спорт кӧрімнерi спорт системазынзар кірчелер. Регионда хакас чонның кӱрезі, охчаадаң атыс, тобит, ат чарызы, хапчаң тас, ағаснаң тартыс, урух тастааны тиліпче. Ол тоғыснаң национальнай спорт кӧрімнерінҷе федерация айғасча. Салтарлардаңар чоохтаза, Хакасияда марығлар саны ӧс парған, анда улуғлар даа, кічіглер дее кӱстерін cынапчалар. 2025 чылда республика «Ӧбекелер ойыннары» национальнай кӱрестерҷе I фестивальны удурлаан. Араласчылар ӧмелер мариина пӧзік паалағ пиргеннер. Теестегі фестиваль Тағлығ Алтайда 2027 чылда иртер. Амды Хакасияның правительствозы инфраструктураны чахсыландырарға, специалисттерні тимнирге паза кибірліг спорт кӧрімнерін ӱгредіг программазынзар кирерге пӧгінче.
Халғанҷы мероприятие «Спорт: алызығлар тузында тилекейні піріктірерге» пленарнай чыылығ полған. Анда чоннар аразындағы хайызығларны тыыдарға, регионнарның спортты тилідерінҷе опыттарын чуртасха кирерге чоохтас салғаннар. Хакасия «Россия – спорт державазы» чоннар аразындағы форумда позын турыстыра кӧзіткен. Аның кинектернi спортха кӧнiктiрчеткен паза кибірліг спорт кӧрімнерін тилітчеткен тоғызын пасхазы кӧзідімге алғаннар.
Cом Хакасия пазының пресс-службазыни
Автор :
Тимнеен Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде



