Техника «тiнiн» тударға ӱгретче
23.10.2026
Хабарлар
Тастыптағы 16 № профессиональнай училищенің ӱгретчізі Григорий Чучумаков
25 чарыста – Автомобилист кӱнi. Тастыптағы 16 № профессиональнай училищеде школа тоосханнарға аал хонии тоғыстары узының профессиязын алып аларға чарир. Чиит ооллар анда тракторлығ паза ГАЗ-53 таарлағ машиналығ чӧрерге ӱгренчелер
Маңнаныстығ ӱгренген соонда олар тракторист паза «С» категориялығ водитель удостоверениезiн алып алчалар. Анаң кӧбiзi аал-хониинзар тоғысха кіріп істенче, пасхазы, постарының сӧбірелерінің асхынах нимес мал-хузына азых пилетеп, ибдегілеріне туза полча.
Григорий Чучумаков 31 чыл училищеде производственнай ӱгредіг узы полып істенче. Санап таа полбассың, нинҷе олған, аның холында ӱгреніп, амды тракторист, водитель полып тоғынча.
Григорий Николаевич позының чуртазынаңар чооғын піди пастаан:
– Тӧреен-ӧскен чирім Тастып аал полча. Іҷем Мария Фёдоровна мині чалғызан ӧскірген. Тастыптағы пастағы ортымах школаны тоозып, аалдағы училищезер «тракторист-машинист» специальностьха ӱгренерге кірібіскем.
1995 чылда, училище тоосхан соонда, істеніс чолын мындох пастаам. Олох чылда Ачинсктегі индустриально-педагогическай колледжсер заочно ӱгренерге кіріп алғам, «Мастер производственного обучения» специальностьты таллап алғам. Аннаң сығара мында тоғынчам, олғаннарны тракторлығ, машиналығ чӧрерге паза, техника оодыл парза, тыхтап пілерге ӱгретчем. Чылдаң чылға «Мастер сельскохозяйственных работ» кӧстегҷе студенттер группазы толдыра чыыл парча, олғаннар ӱгренерге хынып килчелер. Пу 2026-2027 ӱгредiг чылында минің холымда 28 олған. Паза тӧлеп ӱгренчеткен группа пар, анда 9 кізі ӱгренче. Ирткен чылда пір ипчі кізі паза ікі хыс тракторист правазын алып алғаннар.
– Сірернің тоғыстарыңда хайдағ сидіксіністер учурапча? – cурғам Григорий Николаевичтең.
Ол пiди нандырған:
– Пістің олған туста пала ибде одырбаҷаң, соохты соох тібин, ойнап чӧрҷеңміс. Сағыс-кӧгіс алғыдылҷаң, аар-пеер харахсынып, сағыс тыыҷаң. Че амғы тӧл ӧӧнінде телефонда ла одырча. Итсе, прайзы ла андағ нимес. Піс аймах-пасха марығларда утып алчабыс. Кӧзiдiмге, «Лучший пахарь» марығда пір ле хатап араласпинчабыс. 2013 чылда пістің училище республика синiндегi марығда пастағы орын алып алған. Тиксі Россия мариина Тамбов облазынзар парғабыс. Анда даа позыбысты чахсы кӧзіт пиргебіс.
– Cірернiң студенттерің хайда практика иртчелер? – полған теестегi cуриим.
– Тастыпта «Нива» ООО пар, олғаннар чыл сай анда практика иртчелер. Ол хоныхта хыралар кӧп, тоғызы аннаң даа кӧп, пу чайғызын пір ай чарымға тӧрт оол 150 муң салковай тоғынып алған, – теен ол.
Піс прайзы даа пілчебіс, матлама, кӱлӱк, сымдах ир кізінің кистінде хаҷан даа ипчізі турча. Григорий Чучумаковтың хада хонғаны Татьяна Станиславовна тархын паза обществоведение ӱгретчізі полып істенче. Олар пір оол ӧскірчелер.
Пістің Россияа хазна экономиказын тилідерге, чонның чуртазын чахсыландырарға сымдах трактористтер, водительлер кирек. Аннаңар Григорий Николаевич осхас кізілер, пістің ӧсчеткен тӧлібісті орта чолға сығарып, прай кӱстерін салчалар тізе, пір дее саба полбас.
Cом авторни
Автор :
Евгения Табурчинова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
