Хакас театры «Балтийский дом» фестивальда араласты
23.10.2026
Хабарлар
Хакас драма театрының ӧмезі фестивальның араласчыларын чӧпсіндірді
Фестиваль. Чарыс айының 3 – 15 кӱннерiнде Санкт-Петербургта «Балтийский дом» чоннар аразындағы 36-ҷы театр фестивальы ирткен
Пӱӱл фестиваль, Россияның, Индияның паза Хыдаттың 9 чайаачы ӧмезiн пiрiктiрiп, аймах чоннар культуразын кӧзiтчең хайхастығ ачыхха айлан парған. А.М.Топановтың адынаң Хакас национальнай драма театры позының пайрамнығ 95-ҷi чылында танығлығ мероприятиеде iдӧк араласхан. С.П.Кадышевтiң адынаң чон чайаачызының национальнай кiнiнiң «Алтыр» мода театры чӧргенӧк. Пiстiң республиканың улуғ делегациязынаң Хакасияның культура министрi Светлана Окольникова устаан.
Фестивальның пай программазына Хакас культуразының кӱнi кирiлген. Анда Санкт-Петербургтың чуртағҷылары паза аалҷылары Хакас Республиканың кибiрлерiнең танысханнар, хакас кӧглерiн искеннер, чоныбыстың татхыннығ ас-тамаан амзааннар паза сiлiг кип-азаан паалааннар.
Хакас драма театры ӧӧн режиссёр Тимур Казнов турғысхан «Чазы. Тастың ыры» ойынны кӧзiткен. Пу спектакль Улуғ Хуртуйах тасха чарыдылған. Аны тиксi республикада аарлапчалар. Ойын, Санкт-Петербургтағы кӧрiгҷiлернiң кӧңнiне кiр парып, кӧп чылығ ӱндезiг алған. Олар чарытхы тоғызын, сценографияны паза артисттернiң киртiстiг ойынын пӧзiк паалааннар. Хакас тiлiнең парчатхан спектакльның тiлбестее сценадағы улуғ экранда орыс тiлiнең пирiлген, аннаңар аны прайзы чахсы оңарған. Ойын соонда кӧрiгҷiлер iзiг айа сабызынаң хакас артисттернi сценадаң позыдарға хынмааннар. Фестивальның устағҷызы, «Балтийский дом» театр фестивальының хоос устағҷызы Сергей Шуб Хакас театрға алғыстастығ пiчiк читiрген. Iдӧк пiстiң театр «Балтийский дом» чоннар аразындағы 36-ҷы театр фестивальының дипломынаң таныхтатхан.
А.М.Топановтың адынаң Хакас драма театрының ойынын кӧрерге килгеннер: хореограф Павел Рябов, РГИСИ-ның профессоры Владимир Норенко, тоғызынҷы хакас студияның студенттерi, «Чир» хакас землячествоның араласчылары паза Хакас театрның саблығ тоғынҷыларының Санкт-Петербургта чуртапчатхан туған-чағыннары.
Театрның тӧстегҷiзi, пастағы хоос устағҷызы Александр Михайлович Топановтың тӧлi Игорь Топанов Ольга паза Полина хыстарынаң хада, iдӧк илбек артист Анастасия Ивановна Тодикованың кӧргенегi Екатерина Шарапова спектакльға ӧнетiн килгеннерi танығлығ полған.
Ойын соонаң кӧрiгҷiлер театрның группазында ӱндезiглер артысханнар:
«1 час 10 минута парчатхан хайхастығ спектакль чӱреемнi саңайға аптап алған. Мин, чазыдағы от хыринда одырып алып, часкалығ ипчiдеңер сарынны Хуртуйахнаң хада сарнаанға тӧӧй полған. Мындағ хайхасты сыйлап пиргеннерiң ӱчӱн улуғ алғызымны читiрчем. Мин пу ойынны хаҷан даа ундутпаспын!» – кӧңнiнең ӱлесче Наталья.
«Сiрер пiр час аразына ла муңарлап чыллар турчатхан ызых тастың кип-чоохтығ тархынын прай пiлдiстiг чарыт пиргезер. Ол тастаңар хаҷан даа испеен кiзiлер амды аннаңар хаҷан даа сағын чӧрерлер. Мин кӧп чыл аразына «Балтийский дом» фестивальда зал, азах узында турып, iзiг айа саапчатханын ам на кӧрдiм», – пасча Наталья Кравчук.
«Ойын хакас тiлiнең парған... че прай ниме тiлбестег дее чох пiлдiстiг полған. Анда прай чоннарның чуртазынаңар чоох парча нооза», – ӱндесче Римма Платонова.
«Уғаа хайхастығ! Спектакльда актёрларның ойынына, костюмнарына, декорацияа тың морсын пардым!» – таныхтапча Екатерина Грибкова.
Хакас национальнай театрның 95 чыллығ тархыны Санкт-Петербург городнаң пик палғалыстығ. 1939 чылда пастағы хакас студия Ленинградсар ӱгренерге парған. Илееде чыл аразына Россияның хазна сцена искусстволары институдының профессорлары паза устары Хакасияа актёрларның, режиссёрларның, сценографтарның, театроведтернiң cигiс курзын тимнеп пиргеннер. Тӱрчедең андартын тоғызынҷы курс сығар. Пiстiң культура тоғынҷылары «Балтийский дом» фестивальда араласханы Хакасияның паза Санкт-Петербургтың ынархазын улам тыытча.
Сом А.М.Топановтың адынаң Хакас национальнай драма театрыни
Автор :
Светлана Селигеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
