Сидіксіністер паза пӧгіннер
23.10.2026
Хабарлар
Тоғазығ тузында
Тоғазығ. Хакасия пазы Валентин Коновалов Ағбан пилтірі аймааның пазы Нина Леонченконаң паза Ағбан пилтірі поселок чӧбінің пазы тоғызын толдырчатхан Татьяна Можарованаң тоғысчы тоғазығ иртірген
Регион устағҷызы пастап Нина Леонченконы Ағбан пилтірі аймааның пазына табылғанынаң хати алғыстаан.
– Пу тоғыс уғаа нандырығлығ, че мин ізенчем – Сірер сыданарзар, – айланған ол Ағбан пилтірі аймааның наа пазынзар.
Валентин Коновалов, Ағбан пилтірі республиканың ӧӧн аймах кіннерінің пірсі полчатханын таныхтап, ол поселок чӧбінің пазы тоғызын толдырчатхан Татьяна Можароваа ідӧк ізенчеткенін искірген.
– Сірернің опыдыңар уғаа улуғ, – теен Хакасия пазы. – Чуртаста даа, муниципальнай тоғыста даа. Киртінчем, Сірернің прай ниме килізер.
Валентин Коновалов Ағбан пилтірі аймаа Хакас Республикада алынҷа орыннығ полчатханын таныхтаан.
– Ағбан пилтірі аймаа пістің республикада чуртағҷылар санынҷа иң улуғ полча, – теен Валентин Коновалов. – Анда ідӧк промышленность паза аал хонии предприятиелері кӧп. Ол, тиксі алза, республиканың экономиказына улуғ туза ағылар оңдайлығ.
Тоғазығда пірге тоғынар сурығлар, аймахтың пӱӱнгі сидіксіністері паза таңдағызына пӧгіннері ӱзӱрілген. Нина Леонченко чооғын ағырсымнығ сурығларнаң пастаан – Ағбан пилтірі аймаанда амғы туста ӱгредіг учреждениелерінің счеттары чабылчатханынаң сидіксіністер пар полтыр. Ідӧк Ағбан пилтірі аймаа музыка школазы паза библиотека пӱдірілерін 10 чыл артиинаң сағып парир осхас. Хайди чарытхан Нина Леонченко, ол пӱдіріглерге чир участоктары прай пиріл парған, че сурығ орнынаң тибіребинче. Паза аймахтың пазы хайзы школалар тыхтағ тоғыстарын толдырҷаң программазар кірбин парғаны хоостыра хомзынған. Халғанҷы ағырсымнығ сурығ Ағбан пилтірі – Чарков чолны нааҷылирдаңар полған.
Хакасия пазы кӧдірілген сурығларны пічікте пазып одырған. Чол хоостыра сах мындох нандыр пирген.
– Піс ол чолны 3 чыллығ планзар кир салғабыс, пазағы чылда тыхтағ тоғыстарын пастабызарбыс, – таныхтаан ол. – Че оңдай табылза, піс аны нааҷылирын сала ирте, 2028 чылда, тоос саларбыс.
Нина Леонченко, алғызын читіріп, ідӧк хайдағ пӧгіннер парынаңар искірген.
– Аймахтың тиліс оңдайлары улуғ, ӱр ниместе чахсы опыттығ специалистті тоғысха алып алғам, – чоохтап пирген ол. – Ол Ағбан пилтірі аймаанзар инвестициялар тартар сурығҷа тоғынар. Ідӧк пӧгінде улуғ предприятиелернің устағҷыларынаң чӧптезіглер апарары. Чоох парча ол предприятиелердеңер, хайзылары Хакасияның тастында санға алылғаннар.
Ағбан пилтірі поселок чӧбінің пазы тоғызын толдырчатхан Татьяна Можарова муниципалитетте хайдағ тоғыстар апарылчатханынаңар, хысхы тусха тимненіс хайди парчатханынаңар чоохтап пирген.
Ідӧк сидіксіністердеңер искірген. Ағбан пилтірінде амғы туста ӧӧн ағырсымнығ сурығ чуртағҷыларны иргі, изелчеткен туралардаң нааларзар кӧзірері полча тіп чоохтаан ол. Ағбан пилтірі ол программазар кірбин партыр, аннаңар пу чағында ол сурығ пӧгілеріне ізеніс чоғыл осхас.
Хакасия пазы Валентин Коновалов пу сурығҷа федеральнай кіннең тоғыс апарылча, оңдай табылза, піс сірерні ол программазар кирібізербіс тіп ізендірген.
Сом r-19.ru сайттаң
Автор :
Альберт Толмашов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
