Хакасияда Валентина Матвиенко тоғынча
21.10.2026
Хабарлар
Валентина Матвиенко паза Валентин Коновалов Тадар Тистегі наа поликлиника істінде
Улуғ аалҷы. Пістің республиказар Россияның Федерация Чӧбінің кнезі Валентина Матвиенко тоғысчы чорығынаң килген
Федерация Чӧбінің кнезі Валентина Матвиенко Хакасиязар 19 чарыста учух килген. Ағбандағы аэропортта улуғ аалҷыны Хакасия пазы Валентин Коновалов, Россия президентінің Сибирьдегі федеральнай округтағы полномочиеліг кізізі Анатолий Серышев, Хакасиядаң сығара сенаторлар Олег Земцов паза Александр Жуков, Ӧӧркі Чӧп кнезінің пастағы орынҷызы Пётр Воронин паза республикадағы ведомстволарның устағҷылары удурлааннар.
Киҷее Федерация Чӧбінің кнезі республиканың социальнай объекттерінде пол килген паза регион устағҷызынаң тоғысчы тоғазығ иртірген.
Че иң пурун Валентина Матвиенко Хакасия пазы Валентин Коноваловнаң, Хакасия сенаторларынаң паза республика министрлерінең хада Боград аймаандағы Тадар Тис аалда пол килгеннер. Россия президентінің Сибирьдегі федеральнай округтағы полномочиеліг кізізі Анатолий Серышев ол чорыхта ідӧк араласхан.
Улуғ пастыхтар анда наа поликлиниканы кӧріп алғаннар. Таныхтирға кирек, наа имнег туразы Россияның Федерация Чӧбінің кнезі Валентина Матвиенконың паза Федерация Чӧбінің хабазиинаң пӱдірілген. 2024 чылда Т.И.Ануфриеваның адынаң Боград аймааның имнег туразының ӧӧн сидіксінізінеңер, изелчеткенінеңер, учреждениенің ӧӧн имҷізі Елена Труфанова Федеральнай Чыылыға искір пирген. Андада Валентина Матвиенко регионға федеральнай бюджеттең 250 миллион салковай алып аларға хабас пирген – Тадар Тис аалда модульлығ наа поликлиника пӱдіреріне. Пӱдіріге паза андар имнег оборудованиезін аларына ахча «Узах паза ӧткін чуртас» национальнай проект хоостыра позыдылған.
Наа поликлиника ирткен чылда тузаланысха кирілген, амды наа учреждение хыринда наа стационар тимге сых парир. 30 орғанға, ол санда хирургия пӧлииндегі 10 орғанға, кӧрілген стационар ідӧк Федерация Чӧбінің хабазиинаң пӱдірілче. Аның пӱдірии «Узах паза ӧткін чуртас» национальнай проекттің «Пастағы имнег полызиин пирҷең имнег учреждениелерін нааҷылиры» программазы хоостыра апарылча – федеральнай бюджеттең 200 миллион салковай позыдылған. Аннаңар Россияның Федерация Чӧбінің кнезі пу ікі объектке алынҷа хайығ салған.
Наа поликлиника істінде Валентина Матвиенко имнег кабинеттерін кӧріп алған, имҷілернең паза имнег туразынзар килген олаңай чуртағҷыларнаң чоох алысхан. Федерация Чӧбінің кнезі кізілердең хайди чуртапчатханнарынаңар, хоптар пар ба тіп сурған. Аймахтың кінінде мындағ наа имнег туразы азылғанына прайзы чӧпсінче, мының алнында хайдағ полғанынаң тиңнестiрҷее дее чох тіп нандырчалар. Ағаа хоза амды наа поликлиникада имҷілер саны хозыл парғанын таныхтапчалар. Т.И.Ануфриеваның адынаң Боград аймааның имнег туразының ӧӧн имҷізі Елена Труфанованың таниинаң, нинҷе-де имҷі кӧстегліг ӱгредігні тоосхан соонаң тоғысха алылған.
Наа имнег туразында полып алған соонаң улуғ пастыхтар хости орныхчатхан, пӱдіріл тее парған тирге чарир, стационарзар чол тутханнар. Андағы істінде апарылчатхан тоғыстарнаң танысханнар, ниме иділ парғанын кӧріп алғаннар. Пӱдіріг объекті тӱрчедең толдыразынаң тимде полар, оох-теек тоғыстар ла халтыр. Аның соонаң стационарзар наа имнег оборудованиезін турғызып пастирлар. План хоостыра Тадар Тис аалдағы модульлардаң пӱдіріл парған стационар, 2027 чыл пасталчатса, тузаланысха кирілер.
Федерация Чӧбінің кнезі Валентина Матвиенко, стационарның пӱдіриинең танызып, наа имнег объекті Россияның аймах кіннері полчатхан аалларына кӧзідім поларға кирек тіп таныхтаан. Делегация мының соонаң Ағбанзар чол тутхан.
Сом Федерация Чӧбінің пресс-службазыни
Автор :
Альберт Толмашов
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
